എല്ലാക്കാലവും കൃഷി ചെയ്യാം, എളുപ്പം വിളവെടുക്കാം; പയർ കൃഷി ഇത്ര സിംപിളാണോ? ശ്രദ്ധിക്കേണ്ട കാര്യങ്ങൾ

വർഷത്തിൽ എല്ലാ സമയവും കൃഷിചെയ്യാവുന്ന പച്ചക്കറിയാണ് പയർ. മഴക്കാലമെന്നോ വേനലെന്നോ നോക്കാതെ കൃഷി ചെയ്യാം. പരിചരണം അൽപ്പം കുറഞ്ഞാലും പയർ പിടിച്ചുവളരും. പ്രോട്ടീന്‍റെ കലവറയായ പയർ അടുക്കളത്തോട്ടത്തിൽ ഒഴിവാക്കാൻ പറ്റാത്ത ഒന്നാണ്.

രണ്ടു തരം പയറുകളുണ്ട്​. കുറ്റിപ്പയറും വള്ളിപ്പയറും. അടുക്കളത്തോട്ടമായും വാണിജ്യകൃഷിയായും പയർ സ്​ഥാനംപിടിച്ചിട്ടുണ്ട്. രണ്ടുമൂന്ന് േഗ്രാബാഗ് പയർ കൃഷി ഇന്ന്​ ഓരോ വീട്ടിലും സർവസാധാരണമാണ്​. ഭാഗ്യലക്ഷ്മി എന്ന ഇനമാണ് കുറ്റിപ്പയറിൽ മികച്ചത്. കൂടാതെ കൈരളി, അനശ്വര എന്നിവയുമുണ്ട്. ലോല, വൈജയന്തി, ശാരിക, വെള്ളായണി ജ്യോതിക എന്നിവ മികച്ച പടരുന്ന പയറിനങ്ങൾ ആണ്.

ഇതുകൂടാതെ അത്യുൽപാദനശേഷിയുള്ള ഇനം ഹൈബ്രിഡ് വിത്തുകളും സുലഭമാണ്. വാങ്ങുമ്പോൾ കാലാവധി കഴിഞ്ഞില്ലെന്ന് പാക്കറ്റ് നോക്കി ഉറപ്പുവരുത്തണം. േഗ്രാബാഗിലും ചെറുതടങ്ങളിലും മണ്ണിൽ നിന്നും ഉയർത്തി കൂനകൂട്ടിയും ഒരു ദിവസം കുതിർത്ത അല്ലെങ്കിൽ നേരത്തേ പാകിമുളപ്പിച്ച തൈകളും ഉപയോഗിക്കാം. 45 സെ.മീ. x 15 സെ.മീ. അകലത്തിൽ നടാം. ഒരു തടത്തിൽ മൂന്ന് തൈകൾ വരെ നടാം. കൃഷിയിടം നന്നായി ഉഴുതുമറിച്ച് കട്ടകൾ ഉടച്ച് മണ്ണ് പരുവപ്പെടുത്തിയശേഷം കുമ്മായം ചേർക്കണം. ഇത് നടീലിന്​ 15 ദിവസം മുമ്പ് ചേർക്കുന്നതാണ് നല്ലത്.

അടിവളമായി ചാണകം, മണ്ണിരക്കമ്പോസ്​റ്റ്​, കോഴിവളം എന്നിവ ഉപയോഗിക്കാം. ജൈവവളങ്ങൾ തടങ്ങളിൽ രണ്ടാഴ്ച ഇടവേളകളിൽ ഇട്ടുകൊടുക്കണം. വളർച്ചാത്വരകങ്ങളായ മത്തി ശർക്കര മിശ്രിതം, വെർമിവാഷ്, പഞ്ചഗവ്യം എന്നിവ വെള്ളത്തിൽ നേർപ്പിച്ച് തടത്തിൽ ഒഴിക്കാം. വള്ളികളിൽ തളിച്ചുകൊടുക്കാം. മേൽവളം ഇട്ടശേഷം ചെറുതായി മണ്ണിളക്കി കൊടുത്താൽ ചെടിക്ക് നല്ല വേരോട്ടവും വളർച്ചയും കൂടും. വള്ളി വീശാൻ തുടങ്ങുമ്പോൾ പന്തലിൽ കയറ്റിവിടണം. ചൂടിക്കയറുകൊണ്ടുള്ള പന്തലും പ്ലാസ്​റ്റിക് നെറ്റ് ഉപയോഗിച്ചുള്ള പന്തലും ഉപയോഗപ്പെടുത്താം. കുറ്റിപ്പയർ ആണെങ്കിൽ ഉണങ്ങിയ മരച്ചില്ലകൾ നാട്ടിക്കൊടുക്കാം. നല്ല കായിക വളർച്ച ഉണ്ടാകുന്ന അവസരത്തിൽ ഇലകൾ ചെറുതായി നുള്ളിക്കളഞ്ഞാൽ പൂവിടുന്നത് കൂടുന്നതായി കാണപ്പെടുന്നു. പയർ അധികം മൂക്കുംമുമ്പേ വിളവെടുത്ത്​ തുടങ്ങണം.

ഇക്കാര്യങ്ങൾ കൂടി ശ്രദ്ധിക്കാം...

• പയറിനു കുമിള്‍രോഗങ്ങളും പുഴുക്കളുടെ ആക്രമണവും തടയാന്‍ കഞ്ഞിവെള്ളത്തില്‍ ചാരം ചേര്‍ത്തു തളിക്കണം.
• പയറിലെ ചിത്രകീടത്തെ നിയന്ത്രിക്കാന്‍ ഒരു ലിറ്റര്‍ കരിങ്ങോട്ടയെണ്ണയില്‍ 50 ഗ്രാം സോപ്പ് ചേര്‍ത്തു പതപ്പിച്ച ലായനി എട്ടിരട്ടി വെള്ളം ചേര്‍ത്തു നേര്‍പ്പിച്ച് ചെടികള്‍ക്കു തളിക്കുക.
• കടചീയലിനു ചാണകത്തിന്റെ തെളിവെള്ളം കടയ്ക്കല്‍ ഒഴിക്കുന്നതു നന്ന്.
• മുഞ്ഞയ്‌ക്കെതിരേ രാവിലെ ചാരം തൂവുന്നതു ഫലപ്രദം.
• കഞ്ഞിവെള്ളം തളിച്ചു പയറിന്റെ നീരൂറ്റിക്കുടിക്കുന്ന പ്രാണികളെ നശിപ്പിക്കാം.
• അമരപയറിന്റെ തടത്തില്‍ പഴയ കഞ്ഞിവെള്ളം നിറച്ചു നിര്‍ത്തുന്നതു നന്നായി പൂക്കുന്നതിനും കായ്ക്കു ന്നതിനും സഹായിക്കും.
• പയര്‍ നട്ട് 35 ദിവസം പ്രായമാകുമ്പോള്‍ അടുപ്പുചാരം 100 ചുവടിന് 25 കിലോ എന്ന തോതില്‍ ചുവട്ടില്‍ വിതറിയാല്‍ പൂപൊഴിച്ചില്‍ നിയന്ത്രിക്കാം.
• പയറിലെ പൂവിലുണ്ടാകുന്ന പുഴുവിനെ തുരത്താന്‍ 20 ഗ്രാം കായം 10 ലിറ്റര്‍ വെള്ളത്തില്‍ ലയിപ്പിച്ചു തളിക്കാം.
• നീരൂറ്റിക്കുടിക്കുന്ന പ്രാണികളെ അകറ്റാന്‍ 250 ഗ്രാം കൂവളത്തില ഒരു ലിറ്റര്‍ വെള്ളത്തില്‍ തിളപ്പിച്ച് തണുത്തശേഷം അതിലേക്ക് 250 മില്ലി പുതിയ ഗോമൂത്രം ചേര്‍ത്തു 10 ലിറ്റര്‍ വെള്ളത്തില്‍ നേര്‍പ്പിച്ചു പയറില്‍ തളിക്കുക.