ഓഹരി സൂചികകളിൽ വൻ തിരിച്ചുവരവ് | Huge rebound in stock indices

പ്രസിഡന്റ് ഡോണൾഡ് ട്രംപ് ഇലക്ട്രോണിക് ഉൽപന്നങ്ങൾക്കുള്ള താരിഫിൽ ഇളവ് വരുത്തുകയും വാഹന തീരുവ പുനഃപരിശോധിക്കാമെന്ന സൂചന നൽകുകയും ചെയ്ത ആവേശത്തിൽ ആഗോള ഓഹരി വിപണിയിലുണ്ടായ ഉണർവിൽ കുതിച്ച് ഇന്ത്യൻ സൂചികകളും
സെൻസെക്സും നിഫ്റ്റിയും നീണ്ട ഇടവേളക്കു ശേഷം രണ്ടു ശതമാനത്തിലേറെ കയറി.
രണ്ടു ദിവസത്തെ മുന്നേറ്റത്തിൽ നിക്ഷേപകർക്ക് മൊത്തം ഓഹരി മൂല്യത്തിൽ 18.42 ലക്ഷം കോടിയുടെ വർധനയുണ്ടായി.
ഏപ്രിൽ രണ്ടിന് ട്രംപ് പകരച്ചുങ്കം പ്രഖ്യാപിച്ചശേഷമുണ്ടായ നഷ്ടം ഇരുസൂചികകളും നികത്തി. ഏപ്രിൽ രണ്ടു മുതൽ ഏഴുവരെ സെൻസെക്സ് 3479.54 പോയന്റാണ് നഷ്ടപ്പെടുത്തിയത്.
സെൻസെക്സ് ഒരു ഘട്ടത്തിൽ 1750 പോയന്റ് വരെ കുതിച്ചു. നിഫ്റ്റി 539 പോയന്റും.
ഇന്നലെ എല്ലാ മേഖലകളിലും കുതിപ്പ് ദൃശ്യമായി. ബാങ്ക് ഓഹരികളാണ് തിരിച്ചുവരവിന് നേതൃത്വം നൽകിയത്.
സെൻസെക്സ് ഓഹരികളിൽ 6.84 ശതമാനം കുതിച്ച ഇൻഡസിൻഡ് ബാങ്കാണ് മുന്നിൽ.
എച്ച്.ഡി.എഫ്.സി ബാങ്ക്, ഐ.സി.ഐ.സി.ഐ, ആക്സിസ് ബാങ്ക്, കനറ ബാങ്ക്, എസ്.ബിഐ, ബാങ്ക് ഓഫ് ബറോഡ, ഫെഡറൽ ബാങ്ക് തുടങ്ങിയക്കും വില കയറി
ടാറ്റ മോട്ടോർസ്, എൽ ആൻഡ് ടി, ആക്സിസ് ബാങ്ക്, അദാനി പോർട്സ്, എച്ച്.ഡി.എഫ്.സി ബാങ്ക്, ഐ.സി.ഐ.സി.ഐ ബാങ്ക്, എച്ച്.സി.എൽ തുടങ്ങിയവയും നേട്ടമുണ്ടാക്കി.
ഐ.ടി.സിയും ഹിന്ദുസ്ഥാൻ ലിവറും നഷ്ടത്തിലായി.