ബി.എഡ്​ കോളജുകളെ ആർട്​സ്​ ആൻഡ്​ സയൻസ്​ കോളജുകളുമായി ലയിപ്പിക്കാം; എൻ.സി.ടി.ഇ മാർഗരേഖയായി

തിരുവനന്തപുരം: ടീച്ചർ എജുക്കേഷൻ കോളജുകളെ (ബി.എഡ്​ കോളജുകൾ) ആർട്​സ്​ ആൻഡ്​ സയൻസ്​ കോളജ്​ മാതൃകയിലുള്ള മൾട്ടി ഡിസിപ്ലിനറി സ്ഥാപനങ്ങളാക്കി പരിവർത്തിപ്പിക്കുന്നതിന്​ മാർഗരേഖ പുറത്തിറക്കി നാഷനൽ കൗൺസിൽ ഫോർ ടീച്ചർ എജുക്കേഷൻ (എൻ.സി.ടി.ഇ). നിലവിലുള്ള ബി.എഡ്​ കോളജുകളെ വിവിധതരം കോഴ്​സുകൾ പഠിപ്പിക്കുന്ന മൾട്ടി ഡിസിപ്ലിനറി സ്ഥാപനങ്ങളാക്കി മാറ്റാമെന്നതാണ്​ മാർഗരേഖ മുന്നോട്ടുവെക്കുന്ന ഒന്നാമത്തെ രീതി. നിലവിലുള്ള മൾട്ടി ഡിസിപ്ലിനറി സ്ഥാപനങ്ങളുമായി ബി.എഡ്​ കോളജുകളെ ലയിപ്പിക്കുന്നതാണ്​ മറ്റൊരു രീതി. ഒരേ മാനേജ്​മെന്‍റിന്​ കീഴിലുള്ള സ്ഥാപനങ്ങളും വ്യത്യസ്ത മാനേജ്​മെന്‍റുകൾക്ക്​ കീഴിലുള്ള സ്ഥാപനങ്ങളും ലയിപ്പിക്കാം. നിലവിലുള്ള മൾട്ടി ഡിസിപ്ലിനറി സ്ഥാപനങ്ങളുമായി യോജിച്ച്​ പ്രവർത്തിക്കുന്നതാണ്​ മാർഗരേഖ മുന്നോട്ടുവെക്കുന്ന മൂന്നാമത്തെ രീതി.

ദേശീയ വിദ്യാഭ്യാസ നയത്തിന്‍റെ ഭാഗമായി ടീച്ചർ എജുക്കേഷൻ മേഖലയിൽ നടപ്പാക്കുന്ന പരിഷ്​കാരങ്ങളുടെ ഭാഗമായാണ്​ തനിച്ച്​ നിൽക്കുന്ന ബി.എഡ്​ കോളജുകളെ വിവിധ വിഷയങ്ങൾ പഠിപ്പിക്കുന്ന കോളജുകളാക്കി മാറ്റാനുള്ള നടപടി തുടങ്ങിയത്​. നിലവിലുള്ള രണ്ടുവർഷ ബി.എഡ്​ കോഴ്​സിന്​ പകരം ബിരുദവും ബി.എഡും ഒന്നിച്ച്​ പൂർത്തിയാക്കുന്ന സംയോജിത പ്രോഗ്രാമിന്​ (ഐ.ടി.ഇ.പി) എൻ.സി.ടി.ഇ രൂപം നൽകിയിട്ടുണ്ട്​. ഈ കോഴ്​സ്​ നടപ്പാക്കുന്നതിന്‍റെ ഭാഗം കൂടിയാണ്​ നിലവിലുള്ള ബി.എഡ്​ കോളജുകൾ മൾട്ടി ഡിസിപ്ലിനറി വിദ്യാഭ്യാസ സ്ഥാപനങ്ങളാക്കി മാറ്റാനുള്ള നിർദേശം.

ഐ.ടി.ഇ.പി പ്രകാരം ബി.എ, ബി.എസ്​സി, ബി.കോം കോഴ്​സുകൾക്കൊപ്പം തന്നെ നാലു​ വർഷം കൊണ്ട്​ ബി.എഡും പൂർത്തിയാക്കാൻ കഴിയും. 2030ഓടെ മുഴുവൻ ബി.എഡ്​ കോളജുകളും മൾട്ടി ഡിസിപ്ലിനറി സ്ഥാപനങ്ങളായി മാറണം. ഈ ലക്ഷ്യം മുൻനിർത്തിയാണ്​ സ്ഥാപനങ്ങൾക്ക്​ രൂപാന്തരം വരുത്താൻ എൻ.സി.ടി.ഇ പ്രത്യേക മാർഗരേഖ കൊണ്ടുവന്നത്​. ഐ.ടി.ഇ.പി നടപ്പാക്കുമ്പോൾ ടീച്ചർ വിദ്യാഭ്യാസത്തിനൊപ്പം ബി.എ, ബി.എസ്​സി, ബി.കോം കോഴ്​സുകൾക്ക്​ കീഴിൽ പഠിക്കുന്ന വിഷയങ്ങളും വിദ്യാർഥികൾക്ക്​ പഠിക്കേണ്ടിവരും. ഇത്​ ലക്ഷ്യമിട്ടാണ്​ ബി.എഡ്​ കോളജുകൾ രൂപമാറ്റം വരുത്തുന്നത്​.

സ്ഥാപനങ്ങളുടെ ലയനം ബന്ധപ്പെട്ട സംസ്ഥാനങ്ങളിലെ സർക്കാർ, സർവകലാശാലകളുടെയും ബാധകമായ സൊസൈറ്റീസ്​ രജിസ്​ട്രേഷൻ ആക്ടിനും അനുസൃതമായിട്ടായിരിക്കണം. ഒരേ സർവകലാശാലക്ക്​ കീഴിലുള്ള ബി.എഡ്​ കോളജിനും മൾട്ടി ഡിസിപ്ലിനറി സ്ഥാപനത്തിനും മാത്രമേ യോജിച്ച്​ പ്രവർത്തിക്കാനാകൂവെന്ന്​ മാർഗരേഖ വ്യവസ്ഥ ചെയ്യുന്നു. യോജിച്ച്​ പ്രവർത്തിക്കുന്ന മൾട്ടി ഡിസിപ്ലിനറി സ്ഥാപനത്തിൽ ചുരുങ്ങിയത്​ രണ്ട്​ പഠന വകുപ്പെങ്കിലുമുണ്ടായിരിക്കണം. സ്ഥാപനങ്ങൾക്കിടയിൽ യോജിച്ച്​ പ്രവർത്തിക്കുന്നതിന്​ ധാരണപത്രം ഒപ്പിടണം.