നിങ്ങളുടെ ഡൈനിങ് റൂം ചെറുതാണോ? എങ്കിൽ അവ വലുതാക്കാനുള്ള നുറുങ്ങു വിദ്യകളിതാ...
text_fields
കുറച്ചു കാര്യങ്ങളിൽ ശ്രദ്ധ ചെലുത്തിയാൽ നിങ്ങൾക്ക് ഒരു ചെറിയ ഡൈനിങ് റൂം ഒരു വലിയ ഡൈനിങ് റൂം പോലെ മനോഹരമാക്കാൻ കഴിയും. കുറഞ്ഞ സ്ഥലത്തിൽ ഉപയോഗിക്കാൻ കഴിയുന്ന ശരിയായ ഫർണിച്ചർ, സംഭരണ ഓപ്ഷനുകൾ, ആക്‌സസറികൾ എന്നിവ തിരഞ്ഞെടുക്കുക എന്നതാണ് അതിനുള്ള ആദ്യ പടി.
ഏത് ചെറിയ ഡൈനിങ്ങിനെയും നിറം കൊണ്ട് മാറ്റാൻ കഴിയും. വാൾപേപ്പർ, വെളിച്ചം നിറഞ്ഞ ഒരു ജനൽ, അല്ലെങ്കിൽ സീലിങ് എന്നിവ ഉപയോഗിച്ച് ആ മുറിയെ ഒരുക്കിനോക്കൂ.
ചതുരാകൃതിയിലുള്ള ഡൈനിംഗ് ടേബിളുകൾ ഏറ്റവും സാധാരണമായ ഓപ്ഷനായിരിക്കാം. എന്നാൽ, ചെറിയ ഇടങ്ങളിൽ വൃത്താകൃതിയിലുള്ള ടേബിളുകൾ തെരഞ്ഞെടുക്കാം. 48 ഇഞ്ച് വൃത്താകൃതിയിലുള്ള ടേബിളിൽ സാധാരണയായി നാലു മുതൽ ആറ് വരെ സീറ്റുകൾ സ്ഥാപിക്കാം. അതേസമയം, 60 ഇഞ്ച് ടേബിളിൽ ആറ് മുതൽ എട്ട് വരെ സീറ്റുകൾ ഉണ്ടാകും. വൃത്താകൃതിയിലുള്ള ടേബിളുകൾ സംഭാഷണത്തിനുകൂടി പറ്റിയ മികച്ച ക്രമീകരണമാണ്.
ചെറിയ ഇടങ്ങൾക്ക് കൈകളില്ലാത്ത കസേരകൾ തെരഞ്ഞെടുക്കാം. അവ അകത്തേക്ക് തള്ളുമ്പോൾ പുറത്തെ സ്ഥലം കവരാതെ ഡൈനിംഗ് ടേബിളിനടിയിൽ തന്നെ എളുപ്പത്തിൽ വിശ്രമിക്കും.
ഡൈനിങ് റൂമുകൾക്ക് സാധാരണയായി ശോഭയുള്ള ടാസ്‌ക് ലൈറ്റിങ് ആവശ്യമില്ല. പകരം, സമയമെടുത്തുള്ളതും സംഭാഷണാത്മകവുമായ അത്താഴ പാർട്ടികൾക്കിണങ്ങുന്ന തിളക്കമാണ് ചേരുക. ഒരു വൃത്താകൃതിയിലുള്ള മേശക്ക് മുകളിൽ വലുതും കൂടുതൽ ശ്രദ്ധേയവുമായ ഒരു പെൻഡന്റ് സ്ഥാപിച്ചു നോക്കൂ.
ഒരു ചെറിയ ഡൈനിങ് റൂം രൂപകൽപ്പന ചെയ്യുമ്പോൾ സാധനങ്ങൾ സൂക്ഷിക്കാനുള്ള സ്ഥലവും ചേർക്കാം. ഇതിൽ വസ്തുക്കൾ ചിതറിക്കിടക്കാതെ ഒതുക്കി വെക്കാം.
ജനലിന്റെ അരികിൽ തൂക്കിയിട്ടിരിക്കുന്ന ഫ്രെയിം ചെയ്ത വലിയ ചിത്രം അല്ലെങ്കിൽ ഒരു വലിയ കണ്ണാടി എന്നിവ മറ്റ് പ്രതലങ്ങളിൽ നിന്നുള്ള പ്രകാശം പ്രതിഫലിപ്പിക്കുമ്പോൾ മുറി വലുതായി തോന്നിപ്പിക്കുമെന്ന് ഡിസൈൻ വിദഗ്ധർ പറയുന്നു. ഇത് ചെറിയ സ്ഥലത്തിന് വെളിച്ചവും വ്യക്തിത്വവും നൽകും.
