വെസ്റ്റ് റിഫയിലെ കടകൾക്ക് രാത്രി പ്രവർത്തനസമയത്തിൽ നിയന്ത്രണം
text_fields
മനാമ: വെസ്റ്റ് റിഫയിലെ കടകൾക്ക് രാത്രി പ്രവർത്തന സമയത്തിൽ നിയന്ത്രണം ഏർപ്പെടുത്താൻ മുനിസിപ്പൽ കൗൺസിലിൽ നിർദേശം. രാത്രി വൈകിയും പ്രവർത്തിക്കുന്ന കടകൾക്കെതിരായി താമസക്കാരുടെ പരാതികൾ ഉയർന്നതിനെ തുടർന്നാണ് പുതിയ പ്രവർത്തന സമയം ഏർപ്പെടുത്താൻ മുനിസിപ്പൽ കൗൺസിൽ ആലോചിക്കുന്നത്.
ബ്ലോക്ക് 904ലെ റോഡ് 411, ബ്ലോക്ക് 912ലെ റോഡ് 1205, 1211 എന്നിവിടങ്ങളിൽ 24 മണിക്കൂർ പ്രവർത്തന ലൈസൻസ് ഇല്ലാത്ത കടകൾ അർധരാത്രിക്കു മുമ്പ് അടക്കണമെന്നാണ് നിർദേശം. ഈ കടകൾ രാവിലെ അഞ്ചു മണിക്ക് മുമ്പ് തുറക്കരുതെന്ന നിർദേശവും കൗൺസിൽ ഏകകണ്ഠമായി അംഗീകരിച്ചു. പ്രദേശത്തെ താമസക്കാർക്ക് രാത്രി വൈകിയുള്ള കച്ചവടം ശല്യമാവുന്നത് ഒഴിവാക്കുകയും സമാധാനജീവിതം ഉറപ്പുവരുത്തുകയും ചെയ്യുകയെന്ന ലക്ഷ്യത്തോടെ സതേൺ മുനിസിപ്പൽ കൗൺസിൽ വൈസ് ചെയർമാനും ഏരിയ കൗൺസിലറുമായ അബ്ദുല്ല ബൂബ്ശൈത് ആണ് നിർദേശം മുന്നോട്ടുവെച്ചത്.
രാത്രി മുഴുവൻ തുറക്കുന്ന കടകളെക്കുറിച്ച് പ്രദേശവാസികളിൽനിന്ന് പരാതികൾ വർധിക്കുന്നത് ചൂണ്ടിക്കാട്ടിയാണ് അദ്ദേഹത്തിന്റെ നിർദേശം. കടകളിൽനിന്നുയരുന്ന ബഹളവും ശബ്ദവും സംബന്ധിച്ച് താമസക്കാർ ആവർത്തിച്ച് പരാതി പറഞ്ഞതായും അദ്ദേഹം പറഞ്ഞു. മേൽപറഞ്ഞ റോഡുകളിൽ നിയമപരമായി അനുവദനീയമായ സമയത്തിന് ശേഷവും പ്രവർത്തിക്കുന്ന കടകളുണ്ട്. ഇത് ശാന്തമായ പാർപ്പിട മേഖലകളാണ്. കടകളുടെ പ്രവർത്തന സമയം ഇതിനനുസരിച്ച് ക്രമീകരിക്കണം -അദ്ദേഹം കൂട്ടിച്ചേർത്തു.അതേസമയം, കച്ചവടക്കാർക്ക് പ്രയാസമുണ്ടാക്കുകയെന്നതല്ല, മറിച്ച്, താമസക്കാർക്ക് സ്വസ്ഥമായി കഴിയാനുള്ള അവകാശം സംരക്ഷിക്കുകയാണ് നിയന്ത്രണത്തിന്റെ ലക്ഷ്യമെന്ന് കൗൺസിൽ സാങ്കേതിക സമിതി ചെയർമാൻ മുബാറക് ഫരാജ് പറഞ്ഞു. ആവശ്യമുള്ളവർക്ക് കടകൾക്ക് 24 മണിക്കൂർ ലൈസൻസിന് അപേക്ഷിക്കാവുന്നതാണ്. അപേക്ഷകൾ പരിശോധിച്ച് അർഹരായവർക്ക് അത് നൽകുമെന്നും അദ്ദേഹം പറഞ്ഞു.
