പ്രോട്ടീൻ സമ്മർ ഫിയസ്റ്റ സീസൺ 2; അസ്രി ഷിപ് യാർഡിലേക്ക് പഠനയാത്ര നടത്തി വിദ്യാർഥികൾ
text_fields
പ്രോട്ടീൻ സമ്മർ ഫിയസ്റ്റയോടനുബന്ധിച്ച് നടന്ന പഠനക്യാമ്പിൽനിന്ന്
മനാമ: കെ.എം.സി.സി ബഹ്റൈൻ മലപ്പുറം ജില്ല കമ്മിറ്റി സംഘടിപ്പിക്കുന്ന പ്രോട്ടീൻ സമ്മർ ഫിയസ്റ്റ സീസൺ 2-യുടെ പതിനാലാമത് ദിവസം വിദ്യാർഥികൾക്ക് ആവേശം നിറഞ്ഞ പഠനാനുഭവമായി. അറബ് ഷിപ് ബിൽഡിങ് ആൻഡ് റിപ്പയർ യാർഡ് (അസ്രി) സന്ദർശനം വിദ്യാർഥികൾക്കും പരിശീലകർക്കും ഒരുപോലെ കൗതുകമുണർത്തി. കപ്പലുകളുടെ നിർമാണം, പരിചരണം, ടാർഗറ്റ് മാനേജ്മെന്റ് തുടങ്ങി വ്യവസായിക പ്രവർത്തനങ്ങളെക്കുറിച്ച് നേരിൽ കണ്ടും ഉദ്യോഗസ്ഥരുമായി സംവദിച്ചും വലിയൊരു വിദ്യാഭ്യാസ അനുഭവമാണ് സംഘത്തിന് ലഭിച്ചത്.
വിദ്യാർഥികൾക്ക് നിർമാണരംഗത്തെ താൽപര്യങ്ങൾ വളർത്താനും പുതിയ തൊഴിൽ ദിശകളെക്കുറിച്ച് ആലോചിക്കാനും പ്രചോദനമായ സന്ദർശനം, പഠനത്തോടൊപ്പം അനുഭവം കൂടി ചേർന്നപ്പോൾ വളർച്ചക്ക് പുതിയ വഴികളാണ് തുറന്നത്. പ്രത്യേകമായി തയാറാക്കിയ വിഡിയോ പ്രദര്‍ശനം, ഷിപ് യാർഡിൽ ജീവനക്കാരുടെ നേതൃത്വത്തിൽ നടന്ന ടൂർ, സംശയ നിവാരണം എന്നിവ വിദ്യാര്‍ഥികളുടെ പങ്കാളിത്തം ഉറപ്പാക്കുകയും കാഴ്ചപ്പാടുകളും ചോദ്യങ്ങളും തുറന്നുപറയാനുള്ള അവസരമുണ്ടാക്കുകയും ചെയ്തു. ഷിപ് യാർഡ് സേഫ്റ്റി ഓഫിസർ അഹമ്മദ് ദിൽഷാദ്, മുഹമ്മദ് ദർവേഷ് എന്നിവർ ഷിപ് യാർഡ് പ്രവർത്തനങ്ങൾ വിദ്യാർഥികൾക്ക് വിശദീകരിച്ചു.
അസ്രി പബ്ലിക് റിലേഷൻ ടീം അംഗങ്ങളായ ഫാത്തിമ അൽ മാജിദ്‌, ഇമാൻ ഹമീദ്, മഹ്മൂദ് ഖുർബാൻ, നൂർ അൽ സാഖർ തുടങ്ങിയവർ പങ്കെടുത്തു.പ്രവാസജീവിതത്തിലെ പരിമിതികളെ മറികടന്ന്, വിദ്യാർഥികളെ മൂല്യാധിഷ്ഠിത ആശയങ്ങളിൽ ഉറപ്പിച്ചുനിർത്തി വ്യക്തിത്വവികസനം, ലൈഫ് സ്‌കിൽസ്, ഹാബിറ്റ്‌സ് മോൾഡിങ്, ക്രിയേറ്റിവിറ്റി, ഫിനാൻഷ്യൽ മാനേജ്മെന്റ്, ഡിജിറ്റൽ ലിറ്ററസി തുടങ്ങിയവ അഭിവൃദ്ധിപ്പെടുത്താൻ വേണ്ടി മലപ്പുറം ജില്ല കമ്മിറ്റി സംഘടിപ്പിക്കുന്ന പ്രോട്ടീൻ സമ്മർ ഫിയസ്റ്റയുടെ ഭാഗമായി ഇനിയുള്ള ദിവസങ്ങളിലും വ്യത്യസ്ത അനുഭവങ്ങൾ വിദ്യാർഥികൾക്ക് ഒരുക്കുമെന്ന് െട്രയിനർമാരായ റസീം ഹാറൂൻ, ഹിഷാം അരീക്കോട്, അൻഷിദ് പാലത്ത് എന്നിവർ അറിയിച്ചു.
അഹമ്മദ് മേപ്പാട്ട്, കെ.എം.സി.സി ബഹ്റൈൻ മലപ്പുറം ജില്ല വൈസ് പ്രസിഡന്റ് മുഹമ്മദ് അലി, സെക്രട്ടറി മുജീബ് റഹ്മാൻ, കോട്ടക്കൽ മണ്ഡലം ജനറൽ സെക്രട്ടറി ഷമീർ കോട്ടക്കൽ, ജാഫർ തറമ്മൽ എന്നിവർ സംസാരിച്ചു. മുഹമ്മദ് റബീഹ്, സൈനബ, അര്ഷല ഷഫ്‌രി, അർഷിബ, ദിമാ അയ്ൻ, ബഷ്റിയ, നാസിം തെന്നട തുടങ്ങിയവർ നിയന്ത്രിച്ചു. ഒരുമാസം നീളുന്ന പ്രോട്ടീൻ സമ്മർ ഫിയസ്റ്റയുടെ ഗ്രാൻഡ് ഫിനാലെ ആഗസ്റ്റ് ഒന്നിന് കെ.എം.സി.സി ഹാളിൽ വിപുലമായ പരിപാടികളോടെ നടക്കുമെന്ന് ജില്ല കമ്മിറ്റി അറിയിച്ചു.
