സൗദിയിൽ ചെമ്പ്-ധാതു ഖനനത്തിന് അരാംകോയും മആദനും കൈകോർക്കുന്നു

ദമ്മാം: സൗദി അറേബ്യയിലെ ധാതു പര്യവേക്ഷണത്തിലും ഹാർഡ്-റോക്ക് ഖനന മേഖലയിലും മാറ്റങ്ങൾ ലക്ഷ്യമിട്ട് സൗദി അരാംകോയും മആദനും സംയുക്ത കരാറിൽ ഒപ്പുവെച്ചു. ഊർജ്ജ പരിവർത്തനത്തിന് അത്യന്താപേക്ഷിതമായ ചെമ്പ് ഉൾപ്പെടെയുള്ള തന്ത്രപ്രധാന ധാതുക്കൾ കണ്ടെത്തുന്നതിനാണ് ഈ സഹകരണം.

2025 ജനുവരിയിൽ പ്രഖ്യാപിച്ച പദ്ധതിയിൽ മആദന് 51 ശതമാനവും അരാംകോക്ക് 49 ശതമാനവും ഉടമസ്ഥാവകാശമുണ്ട്. സൗദി അറേബ്യയുടെ ഭൂപ്രദേശത്തി​െൻറ 10 ശതമാനത്തോളം (182,000 ചതുരശ്ര കിലോമീറ്റർ) വരുന്ന ‘ട്രാൻസിഷൻ സോൺ’ (സോൺ 4) മേഖലയിലാണ് പര്യവേക്ഷണം നടക്കുന്നത്. അറേബ്യൻ ഷീൽഡിന് സമാന്തരമായി 100 കിലോമീറ്റർ വീതിയിൽ വ്യാപിച്ചുകിടക്കുന്നതാണ് ഈ പ്രദേശം.

കഴിഞ്ഞ 90 വർഷത്തിനിടെ ശേഖരിച്ച ഭൗമശാസ്ത്ര വിവരങ്ങളിലൂടെ ധാതുക്കൾ കണ്ടെത്തുന്ന പ്രക്രിയ വേഗത്തിലാക്കുമെന്ന് അരാംകോ ‘ട്രാൻസിഷൻ മിനറൽസ്’ വൈസ് പ്രസിഡൻറ്​ സാലിഹ് എം. അൽ സാലിഹ് പറഞ്ഞു. മആദ​െൻറ വൈദഗ്ധ്യവും അരാംകോയുടെ സാങ്കേതിക കരുത്തും ഒന്നിക്കുന്നത് ഖനന മേഖലയിൽ വലിയ കുതിച്ചുചാട്ടമുണ്ടാക്കുമെന്നും അദ്ദേഹം കൂട്ടിച്ചേർത്തു.

അറേബ്യൻ ഷീൽഡ് മേഖലയിൽ ലോകത്തിലെ തന്നെ വലിയ പര്യവേക്ഷണ പദ്ധതികളിലൊന്നാണ് നടപ്പാക്കുന്നതെന്നും, അരാംകോയുടെ അറിവും മആദ​െൻറ വൈദഗ്ധ്യവും വഴി പ്രവർത്തനങ്ങൾ കൂടുതൽ കാര്യക്ഷമമാക്കുമെന്നും മആദൻ എക്സ്‌പ്ലോറേഷൻ വൈസ് പ്രസിഡൻറ്​ ഡാരൽ ക്ലാർക്ക് വ്യക്തമാക്കി.

ഇലക്ട്രിക് വാഹനങ്ങൾ, പവർ നെറ്റ്‌വർക്കുകൾ എന്നിവക്ക് ആവശ്യമായ ചെമ്പാണ് പ്രഥമ ലക്ഷ്യം. നിലവിൽ 250 ബില്യൺ ഡോളർ മൂല്യമുള്ള ചെമ്പ് വിപണി, 2035-ഓടെ 400 ബില്യൺ ഡോളറിലധികം വളരുമെന്നാണ് പഠനങ്ങൾ. ചെമ്പിന് പുറമെ സിങ്ക്, ലെഡ്, അപൂർവ ഭൗമ മൂലകങ്ങൾ എന്നിവയും പദ്ധതി ലക്ഷ്യമിടുന്നു.

കൃത്രിമബുദ്ധിയും ഹൈ-പെർഫോമൻസ് കമ്പ്യൂട്ടിങ്ങും പ്രയോജനപ്പെടുത്തി ധാതുനിക്ഷേപമുള്ള മേഖലകൾ കൃത്യതയോടെ കണ്ടെത്തും. നിയമപരമായ നടപടികൾ പൂർത്തിയാകുന്ന മുറയ്ക്ക് സംയുക്ത സംരംഭം പ്രാബല്യത്തിൽ വരും.