തീപിടിത്തത്തിൽ മാരകമായി പൊള്ളലേറ്റ് ചികിത്സയിലായിരുന്ന കൊല്ലം സ്വദേശി ജിസാനിൽ മരിച്ചു

ജിസാൻ: പൊള്ളലേറ്റു ചികിത്സയിലായിരുന്ന കൊല്ലം സ്വദേശി ജിസാനിൽ മരിച്ചു. കൊട്ടാരക്കര പുത്തൂർ മൈലോംകുളം സ്വദേശി മൊട്ടക്കുന്നിൽ ബിജിൻലാൽ (29) ആണ് മരിച്ചത്. വെള്ളിയാഴ്ച ജിസാൻ സബിയയിൽ സാസ്‌കോ ഗ്യാസ് സ്‌റ്റേഷനിൽ വെച്ചുണ്ടായ തീപിടിത്തത്തിൽ ഇദ്ദേഹത്തിന് മാരകമായി പൊള്ളലേറ്റിരുന്നു.

അബു അരീഷ് കിങ് ഫഹദ് ആശുപത്രി അത്യാഹിത വിഭാഗത്തിൽ ചികിത്സയിലായിരിക്കെ ഇന്ന് (ഞായർ) പുലർച്ചെയാണ് ഇദ്ദേഹത്തിന്റെ മരണം. രണ്ടു വർഷമായി ജിസാനിൽ ജോലി ചെയ്യുന്ന ഇയാൾ അവിവാഹിതനാണ്. പിതാവ്: ബൈജു, മാതാവ്: ഉഷാകുമാരി, ഏക സഹോദരി: ബിന്ദുജ മോൾ. കമ്പനി സ്പോൺസർ റിയാദിൽ നിന്നെത്തിയതിന് ശേഷം കുടുംബത്തിന്റെ ആവശ്യപ്രകാരം മറ്റു നടപടികൾ പൂർത്തിയാക്കുമെന്ന് ബന്ധപ്പെട്ടവർ അറിയിച്ചു.

ജല ജിസാൻ കരുണ്യ വിഭാഗത്തിന്റെ നേതൃത്വത്തിൽ ജല വാസലീഹ് യൂനിറ്റ് സെക്രട്ടറി സഞ്ജീവൻ, ട്രഷറർ വിപിൻ എന്നിവർ ആശുപത്രിയിൽ സന്ദർശനം നടത്തി.