സൗദി പദ്ധതികളിൽ ഇന്ത്യ 300 കോടി ഡോളറിലധികം നിക്ഷേപിച്ചു -അംബാസഡർ ഡോ. സുഹൈൽ അജാസ് ഖാൻ

ജിദ്ദ: സൗദിയിൽ ഈയിടെയുണ്ടായ വൻകിട പദ്ധതികളിൽ ഇന്ത്യയുടെ നിക്ഷേപം 300 കോടി ഡോളർ കടന്നതായി ഇന്ത്യൻ അംബാസഡർ ഡോ. സുഹൈൽ അജാസ് ഖാൻ പറഞ്ഞു. ഇത് ഒരു തുടക്കം മാത്രമാണെന്നും അദ്ദേഹം പറഞ്ഞു. ജിദ്ദ ഇന്ത്യൻ കോൺസുലേറ്റ് സംഘടിപ്പിച്ച ‘ഇന്ത്യ-സൗദി അറേബ്യ ഇൻവെസ്റ്റ്‌മെന്റ് കണക്ട്’ പരിപാടി വെർച്വലായി ഉദ്‌ഘാടനം ചെയ്യുകയായിരുന്നു അംബാസഡർ. സൗദി അറേബ്യയുമായുള്ള ഇന്ത്യയുടെ പങ്കാളിത്തം കൂടുതൽ ആഴത്തിലാക്കുക എന്നത് ഇരു രാജ്യങ്ങൾക്കും ഗുണകരമാണ്. ഇന്ത്യയുടെ പരിവർത്തനത്തി​െൻറ വ്യാപ്തി ഭാവിയെ രൂപപ്പെടുത്തും. സ്വകാര്യ മേഖല ഇതിനകം തന്നെ ഈ സാധ്യതകൾ തിരിച്ചറിഞ്ഞിട്ടുണ്ടെന്നും അദ്ദേഹം കൂട്ടിച്ചേർത്തു.

ജിദ്ദ പാർക്ക് ഹയാത്തിലെ ലാസുർഡെ ഹാളിൽ നടന്ന പരിപാടിയിൽ കോൺസൽ ജനറൽ ഫഹദ് അഹമ്മദ് ഖാൻ സൂരി വിശിഷ്​ടാതിഥികളെ സ്വാഗതം ചെയ്​തു. ഇന്ത്യയും സൗദി അറേബ്യയും തമ്മിലുള്ള ഉഭയകക്ഷി സാമ്പത്തിക, വാണിജ്യ ബന്ധങ്ങൾ ശക്തിപ്പെടുത്തുന്നതിന് ഇത്തരമൊരു പരിപാടി സംഘടിപ്പിക്കുന്നതി​െൻറ പ്രാധാന്യം അദ്ദേഹം എടുത്തുപറഞ്ഞു. ഇന്ത്യയിലെ വിവിധ വ്യാപാര, നിക്ഷേപ സാധ്യതകളുടെ വിശാലമായ അവസരങ്ങളെക്കുറിച്ചുള്ള വിലപ്പെട്ട ഉൾക്കാഴ്ചകൾ പങ്കുവെക്കുക എന്നതായിരുന്നു പരിപാടിയുടെ പ്രധാന ലക്ഷ്യം.

സൗദി നിക്ഷേപ മന്ത്രാലയം (മിസ) സെൻട്രൽ ഓഫീസ് ഡയറക്ടർ അഹമ്മദ് അൽജുറൈയാൻ വിശിഷ്​ടാതിഥിയായിരുന്നു. ഇരുപക്ഷവും തമ്മിലുള്ള സഹകരണത്തിനുള്ള അപാരമായ സാധ്യതകളും സൗദിയിലെ ഇന്ത്യൻ നിക്ഷേപകർക്കുള്ള വലിയ അവസരങ്ങളും അദ്ദേഹം എടുത്തുപറഞ്ഞു.

ന്യൂഡൽഹിയിലെ സെൻറർ ഫോർ സോഷ്യൽ ആൻഡ് ഇക്കണോമിക് പ്രോഗ്രസിൽ ഉന്നത പദവി വഹിക്കുന്ന അംബാസഡർ ഡോ. ജെയ്‌മിനി ഭഗവതി, ‘ഇന്ത്യാ ഗ്രോത്ത് സ്​റ്റോറി’ എന്ന വിഷയത്തിൽ മുഖ്യപ്രഭാഷണം നടത്തി. ഇന്ത്യൻ എംബസി കോമേഴ്​സ്യൽ കൗൺസിലർ മനുസ്മൃതി, ബദ്രി നാരായണൻ, ലക്ഷ്മികുമാരൻ (ലക്ഷ്മികുമാരൻ ആൻഡ് ശ്രീധരൻ അറ്റോർണിസ്​), വൈഭവ് കക്കർ (സറഫ് ആൻഡ് പാർട്ണേഴ്‌സ് ലോ ഓഫീസ്​), നീരജ് അഗർവാൾ (അപെക്സ് ഇൻവെസ്​റ്റ്​) എന്നിവർ നിക്ഷേപ മേഖലയുമായി ബന്ധപ്പെട്ട വിഷയങ്ങൾ അവതരിപ്പിച്ചു.

പെട്രോമിൻ ഗ്രൂപ്പ് സി.ഇ.ഒ കല്യാണ ശിവജ്ഞാനം, അബ്​ദുല്ലത്തീഫ് ജമീൽ മോട്ടോഴ്‌സ് സി.എഫ്.ഒ ബാലകൃഷ്ണൻ, ഗൾഫ് ഇസ്​ലാമിക് ഇൻവെസ്​റ്റ്​മെൻറി​െൻറ റിയൽ എസ്​റ്റേറ്റ് മേധാവി പുനീത് കതാരിയ എന്നിവർ ഇന്ത്യയിൽ നിക്ഷേപം നടത്തിയതി​െൻറ അനുഭവങ്ങളും വിജയഗാഥകളും പങ്കുവെച്ചു.

‘ഇന്ത്യയിലെ നിക്ഷേപത്തി​െൻറ മെക്കാനിക്സ് - ഡീകോഡിങ്​ ഇന്ത്യൻ നിക്ഷേപ പരിസ്ഥിതിവ്യവസ്ഥ’ എന്ന വിഷയത്തിൽ പ്രത്യേകം പാനൽ ചർച്ചയും സമ്മേളനത്തിൽ നടന്നു. സൗദി ബുഗ്ഷാൻ കമ്പനിയുടെ ഗ്രൂപ്പ് സി.എഫ്.ഒ അവായിസ് പട്‌നി പാനൽ ചർച്ചയിൽ മോഡറേറ്ററായി. സോഹം അവ്‌ലാനി, രാഘവ് ബഹൽ, ലക്ഷ്മികുമാരൻ, എൽ. ബദ്രി നാരായണൻ എന്നിവർ പാനലിസ്​റ്റുകളായിരുന്നു. ഇന്ത്യയിൽ നിക്ഷേപങ്ങൾക്ക് അനുകൂലമായ അന്തരീക്ഷമാണെന്ന് വിലയിരുത്തിയ പാനലിസ്​റ്റുകൾ, വെല്ലുവിളികളെയും അപകടസാധ്യത ലഘൂകരണ തന്ത്രങ്ങളെയും കുറിച്ച് ചർച്ച ചെയ്തു.

ഇന്ത്യയിൽനിന്നുള്ള വിവിധ സ്​റ്റാർട്ടപ്പുകൾ പരിപാടിയിൽ അവരുടെ നിക്ഷേപസാധ്യതകൾ അവതരിപ്പിക്കുകയും സാധ്യതയുള്ള നിക്ഷേപകരെ ആകർഷിക്കുന്നതിനായി നൂതന ബിസിനസ്​ ആശയങ്ങൾ പ്രദർശിപ്പിക്കുകയും ചെയ്തു. ജിദ്ദയിലെ പ്രമുഖ സ്ഥാപനങ്ങളിൽനിന്നുള്ള സൗദി ബിസിനസുകാരും സാമ്പത്തിക ഉപദേഷ്​ടാക്കളും സൗദി അറേബ്യയിലെ ഇന്ത്യൻ സുഹൃത്തുക്കളും പരിപാടിയിൽ പങ്കെടുത്തു.