സൗദി നൽകിയത്​ നല്ല സൂചന, ഭീകരതാവിരുദ്ധ പോരാട്ടത്തിൽ ഇന്ത്യക്ക്​ പിന്തുണ -ബൈജയന്ത്​ പാണ്ഡെ എം.പി​

റിയാദ്​: സൗദി അറേബ്യയെപ്പോലെ തന്നെയാണ് നമ്മളെന്നും ഈ അടുപ്പം കൂടുതൽ വിപുലവും മികച്ചതും ശക്തവുമാകുമെന്നും ഇന്ത്യൻ സർവകക്ഷി പ്രതിനിധി സംഘം ​അധ്യക്ഷൻ ബൈജയന്ത്​ പാണ്ഡെ എം.പി പറഞ്ഞു. സൗദി സർക്കാർ ഉദ്യോഗസ്​ഥർ, തദ്ദേശീയ മാധ്യമപ്രവർത്തകർ, ചിന്തകർ, ബിസിനസ്​ പ്രമുഖർ, തദ്ദേശീയ സിവിൽ സമൂഹത്തിൽനിന്നുള്ള പ്രമുഖർ തുടങ്ങിയവരുമായി ഇടപഴകാനായി ബുധനാഴ്​ച രാത്രി റിയാദിലെ​ ഇന്ത്യൻ എംബസി ഒരുക്കിയ അത്താഴ വിരുന്നിൽ സംസാരിക്കുകയായിരുന്നു അദ്ദേഹം. പഹൽഗാം ഭീകരാക്രമണത്തി​െൻറ പശ്ചാത്തലത്തിൽ ഓപറേഷൻ സിന്ദൂറി​നെയും ഭീകരതക്കെതിരായ ഇന്ത്യൻ നിലപാടിനെയും കുറിച്ച്​​ വിശദീകരിക്കാൻ റിയാദിലെത്തിയതാണ്​ സർവകക്ഷി സംഘം.

സന്ദർശനത്തിനിടെ നിരവധി സൗദി നേതാക്കളുമായി കൂടിക്കാഴ്​ച നടത്തിയതായി പാണ്ഡെ പറഞ്ഞു. എല്ലാവരും നൽകിയത്​ നല്ല സൂചനയാണ്.​ ​പാകിസ്​താൻ സ്പോൺസർ ചെയ്യുന്ന അതിർത്തി കടന്നുള്ള ഭീകരതയ്‌ക്കെതിരെ ഇന്ത്യ നടത്തുന്ന പോരാട്ടത്തിന്​ ഉറച്ച പിന്തുണ സൗദി അറേബ്യ വാഗ്​ദാനം ചെയ്​തു. ഭീകരതയ്‌ക്കെതിരായ അചഞ്ചലമായ പ്രതിബദ്ധതയിൽ ഇന്ത്യയും സൗദി അറേബ്യയും ഒറ്റക്കെട്ടായി നിലകൊള്ളുമെന്ന്​ പ്രഖ്യാപിക്കുകയും ചെയ്​തു.

പാവപ്പെട്ട മനുഷ്യരുടെ ക്ഷേമത്തിനും കുട്ടികളുടെ വിദ്യാഭ്യാസത്തിനും എല്ലാം സൗദി അറേബ്യ പാകിസ്​താന്​ ധനസഹായം നൽകുന്നുണ്ട്​. എന്നാൽ പാകിസ്​താൻ അതിനൊന്നും ഉപയോഗിക്കാതെ വകമാറ്റി ഭീകര സംഘങ്ങളെ പരിപോഷിപ്പിച്ച്​​ വളർത്താൻ വേണ്ടിയാണ്​ ആ ഫണ്ട്​ ഉപയോഗിക്കുന്നത്​. ലോകത്തെ എല്ലാ രാജ്യങ്ങളിലെയും സൈന്യങ്ങളെ അതതിടങ്ങളിലെ ഗവൺമെൻറുകളാണ്​ നിയന്ത്രിക്കുന്നത്​. എന്നാൽ പാകിസ്​താനിൽ ഗവൺമെൻറിനെ നിയന്ത്രിക്കുന്നത്​ സൈന്യമാണെന്നും അതാണ്​ ഏറ്റവും വലിയ ദുരവസ്ഥയെന്നും പാണ്ഡെ കൂട്ടിച്ചേർത്തു.

രണ്ടുദിവസം നീണ്ടുനിന്ന സംഘത്തി​െൻറ റിയാദ്​ ദൗത്യം വ്യാഴാഴ്​ച ഉച്ചക്ക്​ ശേഷം മൂന്ന്​ മുതൽ 4.30 വരെ ഇന്ത്യൻ എംബസിയിൽ ക്ഷണിക്കപ്പെട്ട പ്രവാസി സാമൂഹിക പ്രതിനിധികളുമായി​ നടത്തിയ മുഖാമുഖത്തോടെ പര്യവസാനിച്ചു. ഇനി സംഘത്തി​െൻറ അടുത്ത ലക്ഷ്യം അൽജീരിയയാണ്​. വെള്ളിയാഴ്​ച പുലർച്ചെ അവിടേക്ക്​ പുറപ്പെടും. കുവൈത്തിലെ ദൗത്യം പൂർത്തിയാക്കി ചൊവ്വാഴ്​ച രാത്രി റിയാദിലെത്തിയ സംഘം ബുധൻ, വ്യാഴം ദിവസങ്ങളിൽ​ സൗദി ശൂറ കൗൺസിൽ ഡെപ്യുട്ടി സ്​പീക്കർ ഡോ. മിഷാൽ അൽ സുലമി, സൗദി-ഇന്ത്യ ഫ്രണ്ട്​ഷിപ്പ്​ കൗൺസിൽ ചെയർമാൻ മേജർ ജനറൽ അബ്​ദുൽ റഹ്​മാൻ അൽ ഹർബി, വിദേശകാര്യ സഹമന്ത്രി അദിൽ അൽ ജുബൈർ, അമീർ സഊദ്​ അൽ ഫൈസൽ ഇൻസ്​റ്റിറ്റ്യൂട്ട്​ ഒാഫ്​ ഡിപ്ലോമാറ്റിക്​ സ്​റ്റഡീസ്​ ഡയറക്​ടർ ജനറൽ ഡോ. മുഷബാബ്​ അൽ ഖഹ്​താനി, ഗൾഫ്​ റിസർച്ച്​ സെൻറർ ചെയർമാൻ ഡോ. അബ്​ദുൽ അസീസ്​ സാഗർ, നാഇഫ്​ അറബ്​ യൂനിവേഴ്​സിറ്റി ഫോർ സെക്യൂരിറ്റി സയൻസസ്​ പ്രസിഡൻറ്​ ഡോ. അബ്​ദുൽ മജീദ്​ ബിൻ അബ്​ദുല്ല അൽ ബുനിയാൻ എന്നിവരെ അതത്​ സ്ഥാപനങ്ങ​ളിലെത്തി നേരിട്ട്​ കണ്ടുള്ള കൂടിക്കാഴ്​ചകളും ചർച്ചകളുമാണ്​ നടന്നത്​. എല്ലാ രൂപത്തിലുമുള്ള ഭീകരതയെ ചെറുക്കുന്നതിനും ഇന്ത്യ-സൗദി തന്ത്രപരമായ സഹകരണം കൂടുതൽ ആഴത്തിലാക്കുന്നതിനുമുള്ള ഇന്ത്യയുടെ ഉറച്ച ദൃഢനിശ്ചയം ഈ കൂടിക്കാഴ്​ചകളിലെല്ലാം ഉറപ്പിച്ചു പറയുകയും ചെയ്​തു. അനുഭവപൂർണമായ പ്രതികരണമാണ്​ സൗദി ഭാഗത്തുനിന്നുണ്ടായതും.

സൗദി ശൂറ കൗൺസിൽ, വിദേശകാര്യ മന്ത്രാലയം, അമീർ സഊദ്​ അൽ ഫൈസൽ ഇൻസ്​റ്റിറ്റ്യൂട്ട്​ ഒാഫ്​ ഡിപ്ലോമാറ്റിക്​ സ്​റ്റഡീസ്​, ഗൾഫ്​ റിസർച്ച്​ സെൻറർ, നാഇഫ്​ അറബ്​ യൂനിവേഴ്​സിറ്റി ഫോർ സെക്യൂരിറ്റി സയൻസസ് എന്നിവിടങ്ങളിൽ സംഘത്തിന്​ ഊഷ്​മളമായ സ്വീകരണമാണ്​ ലഭിച്ചത്​. ഫോറൻസിക് ലാബ്, സെക്യൂരിറ്റി ഡിജിറ്റൽ ലൈബ്രറി എന്നിവയുൾപ്പെടെ സൗദിയുടെ സുപ്രധാന കേന്ദ്രങ്ങൾ സന്ദർശിക്കാനുള്ള അവസരവും സംഘത്തിന്​ ലഭിച്ചു. ഭീകരതയെ ചെറുക്കുന്ന കാര്യത്തിൽ ഇരു രാജ്യങ്ങളും പങ്കുവെക്കുന്ന പ്രതിബദ്ധതയെ പ്രതിഫലിപ്പിക്കുന്ന തരത്തിൽ സൈനിക വിദ്യാഭ്യാസത്തിൽ ഇന്ത്യ-സൗദി സഹകരണം കൂടുതൽ ആഴത്തിലാക്കാനുള്ള വഴികളും ചർച്ച ചെയ്യപ്പെട്ടു.

പാണ്ഡെയെ കൂടാതെ ഇന്ത്യൻ പാർലമെൻറിലെ കമ്യൂണിക്കേഷൻസ്​ ആൻഡ്​ ഇൻഫർമേഷൻ ടെക്​നോളജി കമ്മിറ്റി ചെയർമാൻ ഡോ. നിഷികാന്ത് ദുബെ എം.പി (ബി.ജെ.പി), ദേശീയ വനിതാ കമീഷൻ മുൻ ചെയർപേഴ്​സൺമാരും രാജ്യസഭ അംഗങ്ങളുമായ ഫാങ്‌നോൺ കൊന്യാക് എം.പി (ബി.ജെ.പി), രേഖ ശർമ എം.പി (ബി.ജെ.പി), അസദുദ്ദീൻ ഉവൈസി എം.പി (എ.ഐ.എം.ഐ.എം), ചാൻഢിഗഡ്​ യൂനിവേഴ്​സിറ്റി സ്ഥാപക വൈസ്​ ചാൻസ്​ലറും രാജ്യസഭ അംഗവുമായ സത്നാം സിങ്​ സന്ധു എം.പി, മുൻ വിദേശകാര്യ സെക്രട്ടറിയും അമേരിക്ക, ബംഗ്ലാദേശ്​, തായിലൻഡ്​ എന്നിവി​ടങ്ങളിലെ മുൻ ഇന്ത്യൻ അംബാസഡറുമായ ഹർഷ വർദ്ധൻ ശൃംഗള എന്നിവരാണ്​ സംഘത്തിലുള്ളത്​​. തുടക്കത്തിൽ മുൻ കോൺഗ്രസ്​ നേതാവും മുൻ കേന്ദ്ര മന്ത്രിയുമായ ഗുലാം നബി ആസാദ്​ സംഘത്തിൽ ഉൾപ്പെട്ടിരുന്നെങ്കിലും കുവൈത്ത്​ സന്ദർശന വേളയിൽ അസുഖ ബാധിതാനാവുകയും ആശുപത്രിയിൽ പ്രവേശിപ്പിക്കപ്പെടുകയും ചെയ്​തു. അതിനാൽ സൗദിയിലേക്കുള്ള യാത്രയിൽ അദ്ദേഹം ഉൾപ്പെട്ടില്ല.