ഇന്‍ഷുറന്‍സ് മേഖലയിൽ നിർണായക ബജറ്റ്

ന്യൂഡല്‍ഹി: ഇന്‍ഷുറന്‍സ് മേഖലയില്‍ 100 ശതമാനം വിദേശനിക്ഷേപമെന്ന പ്രഖ്യാപനവുമായി കേന്ദ്രബജറ്റ്. നിലവിലെ 74 ശതമാനത്തില്‍നിന്നാണ് 100 ശതമാനമാക്കി ഉയര്‍ത്തുന്നത്. ഇതോടെ രാജ്യത്തെ ഇൻഷുറൻസ്​ മേഖലയിൽ അന്താരാഷ്​ട്ര ഇൻഷുറസ്​ കമ്പനികൾക്ക്​ സ്വതന്ത്രമായി സേവനങ്ങൾ ലഭ്യമാക്കാനാവും. വിദേശ നിക്ഷേപ നിയന്ത്രണങ്ങള്‍ നീങ്ങിയതോടെ കൂടുതല്‍ അന്താരാഷ്ട്ര ഇന്‍ഷുറന്‍സ് കമ്പനികള്‍ ഇന്ത്യയിലെത്തും. ഇത് വിപണിയില്‍ പുതിയ മത്സരങ്ങള്‍ സൃഷ്ടിക്കുകയും ഉപഭോക്താക്കള്‍ക്ക് മികച്ച ആനുകൂല്യങ്ങള്‍ ഉറപ്പുവരുത്തുകയും ചെയ്യുമെന്നാണ്​ അവകാശവാദം. 2047ഓടെ രാജ്യത്ത്​ എല്ലാവർക്കും ഇൻഷുറൻസ്​ പരിരക്ഷ എന്ന സർക്കാർ നയത്തി​ന്റെ ഭാഗമായാണ്​ നിക്ഷേപപരിധി ഉയർത്തുന്നതെന്നാണ്​ വിശദീകരണം. എന്നാൽ, സർക്കാർ നിലപാട്​ എൽ.​ഐ.സിയടക്കം രാജ്യത്തെ പൊതുമേഖല ഇൻഷുറൻസ്​ സ്ഥാപനങ്ങൾക്ക്​ കടുത്ത വെല്ലുവിളിയായേക്കുമെന്നും ചൂണ്ടിക്കാട്ടപ്പെടുന്നു.

● കൂടുതല്‍ ഇന്‍ഷുറന്‍സ് പദ്ധതികള്‍, പുതിയ കമ്പനികളുടെ വരവോടെ കൂടുതല്‍ ആകര്‍ഷകമായ ഇന്‍ഷുറന്‍സ് പോളിസികള്‍ എന്നിവ ലഭ്യമാകുമെന്നുമാണ്​ ബജറ്റിലെ പ്രതീക്ഷ.

● മത്സരം കൂടുന്നതോടെ പ്രീമിയം നിരക്കുകൾ കുറക്കേണ്ട സാഹചര്യത്തിലേക്ക് കമ്പനികൾ എത്തുമെന്നും കരുതപ്പെടുന്നു. കൂടുതൽ തൊഴിലവസരങ്ങളും ഇതിലൂടെ പ്രതീക്ഷിക്കുന്നു.

● ആരോഗ്യ ഇൻഷുറൻസ്​ മേഖലയിലും മാറ്റങ്ങൾ പ്രതീക്ഷിക്കുന്നു​.

ഇന്ത്യയിലെ ഇൻഷുറൻസ് മേഖല

● ലൈഫ് ഇൻഷുറൻസ് കമ്പനികൾ: 26

● ആരോഗ്യ ഇൻഷുറൻസ് കമ്പനികൾ: 7

● ജനറൽ ഇൻഷുറൻസ് കമ്പനികൾ: 32

● റീ ഇൻഷുറൻസ് കമ്പനികൾ: 12

വിദേശ നിക്ഷേപ പരിധി ഇതുവരെ

2014: 26 ശതമാനം

2015: 49 ശതമാനം

2021: 74 ശതമാനം

2025: 100 ശതമാനം

ഇൻഷുറൻസ് വ്യാപനം

2023-24 ആഗോളതലത്തിൽ ഇൻഷുറൻസ്​ വ്യാപനം ഏഴ്​ ശതമാനത്തിലെത്തിയപ്പോൾ ഇന്ത്യയിൽ അത്​ 3.7 ശതമാനമായി കുറഞ്ഞിരുന്നു. 2022-2023 സാമ്പത്തിക വർഷം രാജ്യത്ത്​ നാല്​ ശതമാനമായിരുന്നു ഇൻഷുറൻസ്​ വ്യാപനം.

​