സർക്കാർ വകുപ്പുകളിൽ തീർപ്പുകാത്ത്​ കെട്ടിക്കിടക്കുന്നത്​ 3.13 ലക്ഷം ഫയൽ

കൊച്ചി: ഓൺലൈൻ സംവിധാനങ്ങളും മുഖ്യമന്ത്രിയുടെയും മന്ത്രിമാരുടെയും ആവർത്തിച്ചുള്ള നിർദേശങ്ങളുമുണ്ടായിട്ടും സർക്കാർ വകുപ്പുകളുടെ ചുവപ്പുനാടയിൽ കുരുങ്ങി ഫയലുകൾ. ഈ വർഷം ഫെബ്രുവരി അവസാനം വരെയുള്ള കണക്കുപ്രകാരം സെക്ര​േട്ടറിയറ്റിലെ വിവിധ വകുപ്പുകളിൽ തീർപ്പ്​ കാത്ത്​ കെട്ടിക്കിടക്കുന്നത്​ 3,13,764 ഫയലാണ്​. മുഖ്യമന്ത്രി കൈകാര്യം ചെയ്യുന്ന വകുപ്പുകളിൽ മാത്രം അര ലക്ഷത്തിലധികം ഫയലുകൾ തീർപ്പാക്കാൻ അവശേഷിക്കുന്നുണ്ട്​.

ഒന്നാം പിണറായി സർക്കാറിന്‍റെ തുടക്കകാലത്ത്​ 2016 ജൂണിൽ സെക്ര​േട്ടറിയറ്റ്​ ജീവനക്കാരുടെ യോഗത്തിൽ ഫയൽ തീർപ്പാക്കുന്നത്​ സംബന്ധിച്ച്​ രൂക്ഷമായ ഭാഷയിലാണ്​ മുഖ്യമന്ത്രി പ്രതികരിച്ചത്​. ഓരോ ഫയലിലും ഓരോ ജീവിതമുണ്ടെന്നും അത്​ തീർപ്പാക്കാൻ ഉദ്യോഗസ്ഥർ അർപ്പണ മനോഭാവത്തോടെ പെരുമാറണമെന്നുമായിരുന്നു മുഖ്യമന്ത്രിയുടെ വാക്കുകൾ.

സർക്കാർ സംവിധാനം ഉ​ദ്യോഗസ്ഥർക്ക്​ വേണ്ടിയല്ല, പൊതുജനത്തിന്​ ​വേണ്ടിയാണ്​. മുന്നിലെത്തുന്ന ഓരോ ഫയലിലും ഒരു ജീവിതമുണ്ടെന്ന്​ മനസ്സിലാക്കണം. അവയിൽ നിശ്ചിത സമയത്തിനകം തീരുമാനമെടുക്കണം. ഫയലിൽ നിങ്ങൾ എഴുതുന്ന കുറിപ്പാണ്​ ചിലരുടെ കാര്യത്തിലെങ്കിലും അവർ തുടർന്ന്​ ജീവിക്കണോ എന്നുപോലും തീരുമാനിക്കപ്പെടുന്നത്’’​.2016 ജൂൺ എട്ടിന്​ സെക്ര​േട്ടറിയറ്റ്​ ജീവനക്കാരുടെ യോഗത്തിൽ മുഖ്യമന്ത്രി പിണറായി വിജയൻ പറഞ്ഞത്​

സമാന യോഗത്തിൽ പിന്നീടും മുഖ്യമന്ത്രി ഇത്​ ആവർത്തിച്ചു. കെട്ടിക്കിടക്കുന്ന ഫയലുകൾ മൂന്നുമാസത്തിനകം തീർപ്പാക്കണമെന്ന മുഖ്യമന്ത്രിയുടെ നിർദേശപ്രകാരം 2022 ജൂൺ മുതൽ സെപ്റ്റംബർ 30 വരെ സർക്കാർ തീവ്രയജ്ഞം സംഘടിപ്പിച്ചിരുന്നു. എന്നാൽ, ഫയൽ തീർപ്പാക്കൽ നടപടികൾ ഇപ്പോഴും ഇഴയുന്നു എന്നാണ്​ കണക്കുകൾ വ്യക്തമാക്കുന്നത്​.

മുഖ്യമന്ത്രിയുടെ വകുപ്പുകളിൽ അരലക്ഷത്തിലധികം ഫയൽ

ആഭ്യന്തരം, ദുരന്ത നിവാരണം, പരിസ്ഥിതി, പൊതുഭരണം, വിവരസാ​ങ്കേതികം, ആസൂത്രണം, ശാസ്​ത്ര സാ​ങ്കേതികം എന്നിവ ഉൾപ്പെടെ മുഖ്യമന്ത്രി കൈകാര്യം ചെയ്യുന്ന വിവിധ വകുപ്പുകളിലായി 54,801 ഫയൽ കെട്ടിക്കിടപ്പുണ്ട്​.

ആഭ്യന്തര വകുപ്പിൽ മാത്രം 17,485 ഫയൽ തീർപ്പാക്കാനുണ്ട്​. തദ്ദേശ സ്വയംഭരണ വകുപ്പിൽ 42,503ഉം പൊതുവിദ്യാഭ്യാസത്തിൽ 30,539ഉം ധനകാര്യത്തിൽ 20,574ഉം റവന്യൂവിൽ 20,251ഉം ഫയലാണ്​ തീർപ്പാക്കാനുള്ളത്​. ഇവയിൽ ചിലത്​ ഏറെ പഴക്കമുള്ളവയുമാണ്​.