ബി.ജെ.പി ആട്ടിൻതോലണിഞ്ഞ ചെന്നായയാണെന്ന് ബിഷപ്പുമാർക്ക് മനസിലാകുമെന്ന് ബിനോയ് വിശ്വം

തിരുവനന്തപുരം: വഖഫ് ബില്ലിനെ പിന്തുണക്കാൻ ബിഷപ്പുമാർ ആ​വേശം കാണിച്ചെന്ന് സി.പി.ഐ സംസ്ഥാന സെ​​ക്രട്ടറി ബിനോയ് വിശ്വം. ബി.ജെ.പി ആട്ടിൻതോലണിഞ്ഞ ചെന്നായയാണെന്ന് ബിഷപ്പുമാർക്ക് ഉടൻ മനസിലാകുമെന്നും ബിനോയ് വിശ്വം പറഞ്ഞു.

രാജ്യത്തെ വൈദികർക്കെതിരായി നടന്ന അതിക്രമം കൃത്യമായ സൂചനയാണ്. ക്രൈസ്തവർ ആ.എസ്.എസി​ന്റെ പ്രഖ്യാപിത ശത്രുവാണെന്ന് നാം തിരിച്ചറിയണം. ആർ.എസ്.എസിന്റെ മുഖമായ ഓർഗനൈസർ തുടർച്ചയായി ​ക്രൈസ്തവരെ ലക്ഷ്യമിട്ടുകൊണ്ട് ലേഖനം എഴുതുന്നത് കാണുന്നില്ലെ. ഒരു ഭൂമിയും ആർക്കും വിട്ടുകൊടുക്കാൻ ആർ.എസ്.എസ് തയ്യാറായല്ല. ബി.​ജെ.പിയുടെ കള്ളച്ചിരിയിൽ ചിലർ വീണുപോയിട്ടുണ്ടെന്നും ബിനോയ് വിശ്വം പറഞ്ഞു.

മലപ്പുറ​ം ജില്ലയെ കുറിച്ച് വെള്ളാപ്പള്ളി നടത്തിയ വിവാദ പ്രസ്താവനക്കെതിരെയും ബിനോയ് വിശ്വം നിലപാട് വ്യക്തമാക്കി. ബി.ജെ.പിക്ക് ഉപയോഗിക്കാൻ പറ്റുന്ന ​പ്രസ്താവന വെള്ളാപ്പള്ളി നടത്താൻ പാടില്ലായിരുന്നു. പ്രസ്താവന ശ്രീനാരായണ ധർമ്മങ്ങളുടെ പരിധിക്ക് അകത്തു നിൽക്കുന്നതല്ല. ശ്രീനാരായണ ഗുരു വർഗീയ ഭ്രാന്തിന്റെ കൂടെ ഒരിക്കലും നിൽക്കില്ല. ബി.ജെ.പി രാഷ്ട്രീയത്തെ വെള്ളപൂശാൻ ഇതുകൊണ്ടൊന്നും കഴിയില്ല. ഇനിയും നവോന്ഥാന സമിതി പ്രസിന്റായി തുടര​ുന്നത് ഔചി​ത്യപൂർണമാണോയെന്ന് വെള്ളാപ്പള്ളി സ്വയം ആലോചിക്കണമെന്നും ബിനോയ് വിശ്വം കൂട്ടിച്ചേർത്തു.

വെളളാപ്പള്ളിയുടെ വിവാദ പ്രസ്താവന ചുവടെ...

മലപ്പുറം ജില്ല പ്രത്യേക രാജ്യവും സംസ്ഥാനവുമാണെന്ന് വെള്ളാപ്പള്ളി; ‘ഇവിടെ സ്വതന്ത്രമായ അഭിപ്രായം പറഞ്ഞ് ജീവിക്കാൻ കഴിയില്ല’

മലപ്പുറം: മലപ്പുറം ജില്ലയെ കുറിച്ച് വിവാദ പ്രസ്താവനയുമായി എസ്.എൻ.ഡി.പി നേതാവ് വെള്ളാപ്പള്ളി നടേശൻ. മറ്റ് ആളുകൾക്കിടയിൽ എല്ലാ തിക്കും തിരക്കും അനുഭവിച്ചും ഭയന്നും ജീവിക്കുന്ന ആളുകളാണിവിടെയുള്ളത്. സ്വതന്ത്രമായ വായുപോലും ഇവി​​ടെ നിങ്ങൾക്ക് ലഭിക്കുന്നില്ല. മലപ്പുറത്ത് സ്വതന്ത്രമായ അഭിപ്രായം പറഞ്ഞ് ജീവിക്കാൻ നിങ്ങൾക്ക് കഴിയില്ലെന്ന് വെള്ളാപ്പള്ളി ആരോപിച്ചു​. സ്വാതന്ത്ര്യം നേടിയതിന്റെ ഒരംശം പോലും മലപ്പുറത്ത് പിന്നാക്കം നിൽക്കുന്ന ജനവിഭാഗങ്ങൾക്ക് ലഭിച്ചിട്ടുണ്ടോയെന്നാണ് വെള്ളാപ്പള്ളിയു​ടെ ചോദ്യം. മഞ്ചേരി ഉള്ളത് കൊണ്ടും അദ്ദേഹത്തിന് ചില സ്ഥാപനങ്ങൾ ഉള്ളതു​കൊണ്ടും നിങ്ങൾ കുറച്ച് പേർക്ക് വിദ്യാഭ്യാസം ലഭിച്ചു.

ചുങ്കത്തറയിൽ നടന്ന എസ്.എൻ.ഡി.പി യോഗത്തിൽ സംസാരിക്കുകയായിരുന്നു അദ്ദേഹം. വെറും വോട്ടുകു​ത്തി യന്ത്രങ്ങളായി ഇവിടെ ഈഴവ സമുദായം മാറി. സംസ്ഥാനത്താകെ ഈ സാഹചര്യം നിലനിൽക്കുന്നുണ്ട്. എന്നാൽ, ഒന്നിച്ച് നിൽക്കാത്തതാണ് ഈ ദുരന്തത്തിന് കാരണം. ഇവിടെ ചിലർ എല്ലാം സ്വന്തമാക്കുകയാണ്. ഈഴവർക്ക് തൊഴിലുറപ്പ് പദ്ധതിയിൽ മാത്രമാണ് ഇടമുള്ളത്. സാമൂഹിക, രാഷ്ട്രീയ നീതി മലപ്പുറ​ത്തെ ഈഴവർക്കില്ല. കണ്ണേ കരളെയെന്ന് ​പറഞ്ഞ് തെരഞ്ഞെടുപ്പ് വേളയിൽ ചിലരെത്തി വോട്ട് തട്ടിയെടുക്കുകയാണ്. ആർ. ശങ്കർ മുഖ്യമന്ത്രിയായ കാലത്ത് ലഭിച്ചതൊഴിച്ചാൽ പിന്നീട് ഒന്നും കിട്ടിയില്ല. മലപ്പുറത്ത് മുസ്‍ലീം ലീഗ് ഉൾപ്പെടെ വിളിച്ച് ചേർത്ത സമിതിയിൽ ഈഴവർ ഉണ്ടെങ്കിൽ പോലും ഒന്നും ലഭിച്ചില്ലെന്നും വെള്ളാപ്പള്ളി പറഞ്ഞു.