വികസനം മാത്രം പറഞ്ഞിരുന്നാൽ കേരളത്തിൽ വിലപ്പോകില്ല, വോട്ട് കിട്ടില്ലെന്ന് ബി.ജെ.പി കോർ കമ്മിറ്റിയിൽ പ്രതിനിധികൾ

തിരുവനന്തപുരം: നിലമ്പൂർ ഉപതെരഞ്ഞെടുപ്പ്​ വിലയിരുത്താൻ ചേർന്ന ബി.ജെ.പി കോർ കമ്മിറ്റിയോഗത്തിൽ നേതൃത്വത്തിനെതിരെ പൊട്ടിത്തെറിച്ച്​ മുരളീധരപക്ഷം. പുതിയ നേതൃത്വം രാഷ്ട്രീയം സംസാരിക്കുന്നില്ലെന്നും വികസനംമാത്രം പറഞ്ഞിരുന്നാൽ കേരളത്തിൽ വിലപ്പോകില്ലെന്നും വോട്ടുകിട്ടില്ലെന്നും പ്രതിനിധികൾ തുറന്നടിച്ചു.

വികസിത കേരളമെന്ന മുദ്രാവാക്യവുമായി മുന്നോട്ടുപോകുന്ന സംസ്ഥാന അധ്യക്ഷൻ രാജീവ്​ ചന്ദ്രശേഖറിന്‍റെ ശൈലി പരോക്ഷമായി സൂചിപ്പിച്ചായിരുന്നു പരാമർ​ശങ്ങൾ. ഇതോടൊപ്പം തൃശൂരിലെ നേതൃയോഗത്തിലേക്ക് വി. മുരളീധരനെയും ​കെ. സുരേന്ദ്രനെയും ക്ഷണിക്കാതിരുന്നതിലും വിമർശനമുണ്ടായി. സംസ്ഥാന നേതൃയോഗത്തിൽ ചില മുൻ സംസ്ഥാന അധ്യക്ഷന്മാരെ മാത്രം വിളിക്കുന്നതിന്‍റെ മാനദണ്ഡമെന്താണെന്നാണ്​ ഒരു സംസ്ഥാന ഭാരവാഹി ചോദ്യമുന്നയിച്ചത്​. സംസ്ഥാന നേതൃയോഗത്തിൽ മുൻ സംസ്ഥാന അധ്യക്ഷന്മാരെ വിളിക്കുന്നതാണ് കീഴ്വഴക്കം. ചിലരെ മാത്രം ഒഴിവാക്കുന്നത് പാർട്ടി പ്രവർത്തകർക്ക് തെറ്റായ സന്ദേശം നൽകുമെന്നും വിമർശനമുണ്ടായി. തങ്ങളെ നേതൃയോഗത്തിലേക്ക്​ ക്ഷണിക്കാത്തതിൽ സുരേന്ദ്രനും മുരളീധരനും യോഗത്തിൽ അതൃപ്തി അറിയിച്ചെന്നാണ്​ വിവരം.

എന്നാൽ, ഇരുവർക്കും മറ്റ്​ വലിയ ഉത്തരവാദിത്തങ്ങളുള്ളതുകൊണ്ടാണ്​ ക്ഷണിക്കാതിരുന്നതെന്നും എല്ലാ മീറ്റിങ്ങുകളിലും എല്ലാവരും പങ്കെടുക്കേണ്ട കാര്യമില്ലെന്നുമായിരുന്നു രാജീവ്​ ചന്ദ്രശേഖറിന്‍റെ മറുപടി. യോഗത്തിൽ പ്രധാന നേതാക്കളി​ല്ലെന്ന വാർത്ത പുറത്തുപോയത് യോഗത്തിൽ പങ്കെടുത്തവരിൽ നിന്നാണെന്നായിരുന്നു മുരളീധര പക്ഷത്തിന്‍റെ ആരോപണം. എന്നാൽ, ​യോഗത്തിൽ ക്ഷണിക്കാത്ത കാര്യം പുറത്തുപറഞ്ഞത്​ ശരിയായില്ലെന്നായിരുന്നു പി.കെ. കൃഷ്​ണദാസ്​ പക്ഷത്തിന്‍റെ നിലപാട്​. ഫലത്തിൽ കൃഷ്ണദാസ് പക്ഷം പുതിയ അധ്യക്ഷനൊപ്പം നിലയുറപ്പിക്കുകയായിരുന്നു. പുതിയ ഭാരവാഹി പട്ടികയിൽ കൃഷ്ണദാസ് പക്ഷത്തിന് കൂടുതൽ പരിഗണന കിട്ടുമെന്ന അഭ്യൂഹത്തിന്​ പിന്നാലെയാണിത്​.

പല യോഗങ്ങളും ഇപ്പോൾ അറിയുന്നത് മാധ്യമങ്ങളിലൂടെയാണെന്നായിരുന്നു മറ്റൊരു വിമർശനം. പ്രസിഡന്‍റിനെക്കാൾ വലിയ സൂപ്പർ പ്രസിഡന്‍റായി ചിലർ മാറുകയാണ്​. കോർപറേറ്റ് രാഷ്ട്രീയം നേട്ടമാകില്ല. യുവമോർച്ച- മഹിളാമോർച്ച ടാലന്റ് ഹണ്ടിനെതിരെയും വിമർശനമുയർന്നു. ഇത്തരം ശൈലി പാർട്ടിയെ കോർപറേറ്റ്​വത്​കരിക്കും. പാർട്ടിയുടെ സംഘടന സംവിധാനങ്ങൾ അറിയാത്തവരാണ് കാര്യങ്ങൾ നിയന്ത്രിക്കുന്നത്​. ജില്ല പ്രസിഡന്‍റുമാരെ സംസ്ഥാന പ്രസിഡൻറ്​ പരിഗണിക്കുന്നില്ല. വിളിച്ചാൽ ഫോൺ പോലും എടുക്കുന്നില്ല. പ്രവർത്തകർക്ക്​ ആത്മവിശ്വാസം പകരാൻ സംസ്ഥാന അധ്യക്ഷന് സാധിക്കുന്നില്ല. ജില്ല ഭാരവാഹികളെ പ്രഖ്യാപിച്ചത് ഏകപക്ഷീയമായാണെന്നും വിമർശനമുണ്ടായി.