ലക്ഷദ്വീപിലെ മഹൽ, അറബി ഭാഷകൾ ഒഴിവാക്കൽ: പാഠ്യപദ്ധതി മാറ്റുംമുമ്പ്​ പഠനം നടത്തണമെന്ന്​ ഹൈകോടതി; ഹരജി വിധി പറയാൻ മാറ്റി

കൊച്ചി: ലക്ഷദ്വീപിൽ അറബിയും പ്രാദേശിക ഭാഷയായ മഹലും സ്കൂൾ സിലബസിൽ നിന്ന് ഒഴിവാക്കിയതിനെതിരായ ഹരജി വിധി പറയാൻ മാറ്റി. ത്രിഭാഷ സംവിധാനം ഏർപ്പെടുത്തുന്നതിന്‍റെ ഭാഗമായി ലക്ഷദ്വീപ് അഡ്മിനിസ്ട്രേഷനു വേണ്ടി വിദ്യാഭ്യാസ ഡയറക്ടർ പത്മകാർ റാം ത്രിപാഠി മേയ് 14ന് ഇറക്കിയ ഉത്തരവ് ചോദ്യംചെയ്ത്​ ലക്ഷദ്വീപ്​ സ്വദേശി പി.ഐ. അജാസ് അക്ബർ നൽകിയ പൊതുതാൽപര്യ ഹരജിയാണ്​ ചീഫ് ജസ്റ്റിസ് നിതിൻ ജാംദാർ, ജസ്റ്റിസ് ബസന്ത് ബാലാജി എന്നിവരുടെ ബെഞ്ച്​ പരിഗണിക്കുന്നത്​.

പാഠ്യപദ്ധതിയിൽ മാറ്റംവരുത്തും മുമ്പ്​ വിഷയത്തിൽ പഠനം നടത്തണമെന്ന്​ കോടതി ലക്ഷദ്വീപ്​ ഭരണകൂടത്തിന്​ നിർദേശം നൽകി. അറബിയും മഹലും സിലബസിൽ നിന്ന് പുറന്തള്ളി ഇംഗ്ലീഷ്, മലയാളം, ഹിന്ദി ഭാഷകൾ നടപ്പാക്കാനുള്ള തീരുമാനം 2020ലെ ദേശീയ വിദ്യാഭ്യാസ നയത്തിന്‍റെയും 2023ലെ ദേശീയ കരിക്കുലം ഫ്രെയിംവർക്കിന്‍റെയും അടിസ്ഥാനത്തിലാണെന്നാണ്​ ഉത്തരവിൽ പറഞ്ഞിരുന്നത്​. 70 വർഷത്തോളമായി നിലനിൽക്കുന്ന സംവിധാനമാണ് ഇല്ലാതാക്കുന്നതെന്നും ഇതിൽ ​ പഠനങ്ങളോ ചർച്ചകളോ നടന്നിട്ടില്ലെന്നും ഹരജിയിൽ പറഞ്ഞു.

സിലബസ്​ മാറ്റിയ ഉത്തരവ്​ ജൂലൈ ഒന്നിനുമുമ്പ്​ നടപ്പാക്കില്ലെന്ന്​ കേന്ദ്രം അറിയിച്ചതിനെത്തുടർന്ന്​ അടിയന്തര ഉത്തരവ്​ ആവശ്യമില്ലെന്ന്​ കഴിഞ്ഞ ദിവസം​ വിലയിരുത്തിയ കോടതി തിങ്കളാഴ്ച പരിഗണിക്കാൻ ഹരജി മാറ്റുകയായിരുന്നു.

ജൂലൈ ഒന്നിന്​ സി.ബി.എസ്​.ഇ സ്കൂളുകളിലാണ്​ അധ്യയനം തുടങ്ങുന്നതെന്നും ജൂൺ ഒമ്പതിന്​ കേരള സിലബസ്​ പ്രകാരമുള്ള സ്കൂളുകളിൽ പഠനം തുടങ്ങിയെന്നും ഹരജിക്കാരന്‍റെ അഭിഭാഷകൻ ചൂണ്ടിക്കാട്ടി. കാലങ്ങളായി നിലനിൽക്കുന്ന പാഠ്യപദ്ധതിയിൽനിന്ന്​ ഒരുവിഷയം മാറ്റുമ്പോൾ ബന്ധപ്പെട്ടവരുമായി ചർച്ചയും പഠനവും അനിവാര്യമാണെന്ന്​ കോടതി വാക്കാൽ വ്യക്തമാക്കി.