സ്കൂട്ടർ യാത്രക്കിടെ വഴക്ക്; വൈപ്പിനിൽ ഭാര്യയെ നടുറോഡിൽ കുത്തിക്കൊന്നു, ഭർത്താവ് കീഴടങ്ങി

വൈപ്പിൻ: സ്കൂട്ടർ യാത്രക്കിടെയുണ്ടായ കലഹത്തെതുടർന്ന്​ ഭാര്യയെ നടുറോഡിൽ കുത്തിക്കൊലപ്പെടുത്തിയ ശേഷം ഭർത്താവ് പൊലീസ് സ്റ്റേഷനിൽ കീഴടങ്ങി. പള്ളിപ്പുറം തൈപ്പറമ്പിൽ പ്രീതയാണ്​ (43) മരിച്ചത്. സംഭവത്തിനുശേഷം ഇവരുടെ ഭർത്താവ് സുരേഷ് തോമസാണ്​ (53) മുനമ്പം പൊലീസ്​ സ്​റ്റേഷനിലെത്തി കീഴടങ്ങിയത്​.

തിങ്കളാഴ്ച രാത്രി എട്ടോടെ പള്ളിപ്പുറം സെന്‍റ്​ മേരീസ് സ്കൂളിന് പടിഞ്ഞാറ്​ ഭാഗത്താണ്​ സംഭവം. ഇരുവരും സ്കൂട്ടറിൽ സഞ്ചരിച്ചുകൊണ്ടിരിക്കെ വഴക്ക് കൂടി. ഇതിനിടയിൽ ഭർത്താവ് സ്കൂട്ടർ നിർത്തി വാഹനത്തിൽ സൂക്ഷിച്ചിരുന്ന കത്തിയെടുത്ത് കുത്തുകയായിരുന്നെന്ന് പൊലീസ് പറഞ്ഞു.

കുത്തേറ്റ്​ അടുത്ത വീട്ടിലേക്ക് ഓടിക്കയറിയ പ്രീതയെ പ്രദേശവാസികൾ കുഴുപ്പിള്ളിയിലെ സ്വകാര്യ ആശുപത്രിയിലെത്തിച്ചെങ്കിലും രക്ഷിക്കാനായില്ല. കഴുത്തിന്‍റെ പിന്നിലാണ് പ്രീതക്ക്​ കുത്തേറ്റത്​. എറണാകുളം പനമ്പിള്ളിനഗർ സ്വദേശിയാണ് പ്രീത.