‘സ്റ്റെപ് അപ്' പദ്ധതിക്ക് ജില്ലയിൽ തുടക്കം
text_fields
ജില്ല ഭരണ സംവിധാനവും ജില്ല വ്യവസായ കേന്ദ്രവും നടപ്പാക്കുന്ന കോളജ് വിദ്യാർഥികളുടെ സംരംഭകത്വ വികസന പരിപാടി കലക്ടർ ശ്രീധന്യ സുരേഷ് ഉദ്ഘാടനം ചെയ്യുന്നു
കാസർകോട്: ജില്ല ഭരണകൂടത്തിന്റെ നേതൃത്വത്തില്‍ ജില്ല വ്യവസായ കേന്ദ്രം നടപ്പാക്കുന്ന 'സ്റ്റെപ് അപ്' പദ്ധതിയുടെ ജില്ലതല ഉദ്ഘാടനം കാസര്‍കോട് ഗവ. കോളജില്‍ കലക്ടര്‍ ശ്രീധന്യ സുരേഷ് നിര്‍വഹിച്ചു. കോളജ് വിദ്യാര്‍ഥികളില്‍ സംരംഭകത്വ അഭിരുചി വളര്‍ത്തുകയും നൂതന ആശയങ്ങളെ വിജയകരമായ സംരംഭങ്ങളാക്കി മാറ്റുകയും ലക്ഷ്യമിട്ടാണ് പദ്ധതി നടപ്പാക്കുന്നതെന്ന് കലക്ടര്‍ പറഞ്ഞു. കോളജ് പ്രിന്‍സിപ്പല്‍ ഡോ.വി.എസ്. അനില്‍കുമാര്‍ അധ്യക്ഷതവഹിച്ചു. കോളജ് ഐ.ക്യു.എ.സി കോഓഡിനേറ്റര്‍ ഡോ.പി. പുഷ്പലത സംസാരിച്ചു. സംരംഭകത്വ ബോധവത്കരണ ക്ലാസിന് ഹോസ്ദുര്‍ഗ് ഉപജില്ല വ്യവസായ ഓഫിസര്‍ ആര്‍.കെ. സ്മിത നേതൃത്വം നല്‍കി. രത്‌നാകരന്‍ നമ്പ്യാര്‍, രാജി നമ്പ്യാര്‍ എന്നിവര്‍ സംരംഭകാനുഭവങ്ങള്‍ പങ്കുവെച്ചു. ജില്ല വ്യവസായ കേന്ദ്രം ജനറല്‍ മാനേജര്‍ കെ. സജിത്കുമാര്‍ സ്വാഗതവും കോമേഴ്‌സ് വിഭാഗം മേധാവി കെ. ശുഭ നന്ദിയും പറഞ്ഞു.
ജില്ലയിലെ ആദ്യത്തെ കാമ്പസ് വ്യവസായ പാര്‍ക്കിന് അനുമതി ലഭിച്ച ചീമേനി ഐ.എച്ച്.ആര്‍.ഡി കോളജിനെ ചടങ്ങില്‍ അനുമോദിച്ചു. വിദ്യാര്‍ഥികള്‍ക്ക് വിവിധ സംരംഭകത്വ സാധ്യതകളും സര്‍ക്കാര്‍ നല്‍കുന്ന പിന്തുണയും പരിചയപ്പെടുത്തുക, സംസ്ഥാന സര്‍ക്കാറിന്റെ സംരംഭക സഹായ പദ്ധതികള്‍, ലൈസന്‍സ് നടപടിക്രമങ്ങള്‍, വിവിധ വകുപ്പുകള്‍ മുഖേന ലഭ്യമാകുന്ന ആനുകൂല്യങ്ങള്‍ എന്നിവ സംബന്ധിച്ച് അവബോധമുണ്ടാക്കുക എന്നിവയാണ് പദ്ധതിയിലൂടെ ലക്ഷ്യമിടുന്നത്.
