ആലപ്പുഴ മെഡിക്കല് കോളജില് ഡോക്ടര്മാര്ക്ക് കൂട്ടസ്ഥലംമാറ്റം;സൂപ്രണ്ടിനെ ഉപരോധിച്ച് ഡി.വൈ.എഫ്.ഐ
text_fieldsആലപ്പുഴ മെഡിക്കല് കോളജ് ആശുപത്രി സൂപ്രണ്ടിനെ ഡി.വൈ.എഫ്.ഐ പ്രവര്ത്തകര് ഉപരോധിക്കുന്നു
അമ്പലപ്പുഴ: ആലപ്പുഴ മെഡിക്കല് കോളജ് ആശുപത്രിയിലെ ഡോക്ടര്മാരുടെ കൂട്ടസ്ഥലമാറ്റത്തില് പ്രതിഷേധിച്ച് ഡി.വൈ.എഫ്.ഐ ആശുപത്രി സൂപ്രണ്ടിനെ ഉപരോധിച്ചു. രോഗികളുടെ എണ്ണം ദിനംപ്രതി വർധിക്കുമ്പോഴും ആവശ്യത്തിന് ഡോക്ടർമാരില്ലാതെ വലയുന്ന സാഹചര്യത്തില് പകരം സംവിധാനം ഒരുക്കാതെ വിവിധവിഭാഗങ്ങളിലെ എട്ട് ഡോക്ടര്മാരെ സ്ഥലംമാറ്റിക്കൊണ്ടുള്ള ഉത്തരവ് ആരോഗ്യവകുപ്പ് ഇറക്കിയിരുന്നു. ഇത് ‘മാധ്യമം’ഞായറാഴ്ച വാര്ത്തയാക്കിയിരുന്നു. തിരുവനന്തപുരത്തെ രണ്ടാമത്തെ മെഡിക്കൽ കോളജായി യു.ഡി.എഫ് സര്ക്കാര് പ്രഖ്യാപിച്ച കെ. കരുണാകരൻ മെമ്മോറിയൽ ഗവ. മെഡിക്കൽ കോളജിലേക്കാണ് പലരെയും മാറ്റിയത്. ആരോഗ്യമന്ത്രി രണ്ട് തവണ സന്ദർശിച്ചപ്പോഴും ആലപ്പുഴ മെഡിക്കൽ കോളജ് ആശുപത്രിയിൽ കൂടുതൽ ഡോക്ടർമാരെ നിയമിക്കുമെന്ന് പറഞ്ഞതിന് വിപരീതമായി സ്വന്തം പിതാവിന്റെ പേരിലുള്ള ആശുപത്രിക്ക് മെഡിക്കൽ കൗൺസിലിന്റെ അംഗീകാരം നേടിയെടുക്കാൻ ഡോക്ടർമാരെ മാറ്റുകയാണന്ന് ഡി.വൈ.എഫ്.ഐ ജില്ല സെക്രട്ടറി ജയിംസ് ശാമുവൽ പറഞ്ഞു.
ഇതിനെല്ലാം കൂട്ടുനിൽക്കുന്ന മണ്ഡലം എം.എൽ.എ ഇവിടെ എത്തുന്ന നിർധനരായ രോഗികളെ പരിഹസിക്കുകയാണന്നും അദ്ദേഹം ആരോപിച്ചു. പകരം ഡോക്ടർമാർ എത്താതെ ഇവിടെനിന്ന് ആരെയും പറഞ്ഞയക്കില്ലന്ന രേഖാമൂലമുള്ള ഉറപ്പ് നൽകണമെന്ന ആവശ്യം സമരക്കാർ ഉന്നയിച്ചു.എന്നാല് രേഖാമൂലം ഉറപ്പുനല്കേണ്ടത് ആരോഗ്യവകുപ്പിനായതിനാല് സൂപ്രണ്ട് വിസമ്മതിച്ചു. തുടർന്ന് പ്രവർത്തകർ മുദ്രാവാക്യംവിളിയുമായി ഉപരോധം ശക്തമാക്കി.
ഇതിനിടെ അമ്പലപ്പുഴ, പുന്നപ്ര സി.ഐമാരായ വിഷ്ണുകുമാർ, പി.കെ. മോഹിത് എന്നിവരുടെ നേതൃത്വത്തിൽ കൂടുതൽ പൊലീസ് എത്തി സമക്കാരെ അറസ്റ്റുചെയ്തു. പകൽ 11ന് ആരംഭിച്ച ഉപരോധം ഒന്നു വരെ നീണ്ടു. ജില്ല വൈസ് പ്രസിഡൻറുമാരായ കെ.ആർ.രാംജിത്ത്, അനസ് എ.നസിം, ട്രഷറർ ജെ. ജിസ്മി, സംസ്ഥാന കമ്മിറ്റി അംഗങ്ങളായ സി.ശ്യാംകുമാർ, അജ്മൽ ഹസൻ, ജില്ല സെക്രട്ടറിയേറ്റംഗങ്ങളായ കെ.ജി. അരുൺ കുമാർ, അനീഷ് കുര്യൻ, എം. സുമേഷ്, ജില്ല കമ്മിറ്റിയംഗം ജീതു പ്രവീൺ, ബ്ലോക്ക് സെക്രട്ടറി അമൽ വിജയൻ, ട്രഷറർ എസ്. അജ്വോദ് എന്നിവർ ഉൾപ്പെട്ട സംഘമാണ് ഉപരോധസമരം നടത്തിയത്.



