സെൻസസ് കണക്കെടുക്കാൻ നെട്ടോട്ടം; നർമത്തിൽ ചാലിച്ച അനുഭവങ്ങളുമായി ഉദ്യോഗസ്ഥർ
text_fields
പന്തളം: ജനസംഖ്യ കണക്കെടുപ്പിന്റെ ഭാഗമായി സെൻസസ് ജോലികൾക്കിറങ്ങിയ ഉദ്യോഗസ്ഥർ നേരിടുന്ന വെല്ലുവിളികളും സഹനങ്ങളും ചില്ലറയല്ല. എന്നാൽ, ഈ സഹനങ്ങൾ ആസ്വദിക്കുന്നവരുമുണ്ട്. സെൻസസ് അനുഭവങ്ങൾ നർമത്തിൽ ചാലിച്ച് സുഹൃത്ത് വലയങ്ങളിലും ഉദ്യോഗസ്ഥർക്കിടയിലും വാട്സ്ആപ് ഗ്രൂപ്പിലും പലരും പങ്കിടാറുണ്ട്.
ഹിന്ദി ‘നഹി മാലൂ!’
ഇതര സംസ്ഥാനക്കാരായ തൊഴിലാളികൾ താമസിക്കുന്ന സ്ഥലത്ത് പോകാൻ ഹിന്ദി അറിയാത്ത ഉദ്യോഗസ്ഥക്ക് പേടി. അപ്പോഴാണ് മനസ്സിൽ ഹിന്ദി ലഡു പൊട്ടിയത്, പിന്നെ ഒട്ടും വൈകിയില്ല, ഹിന്ദി ടീച്ചറെ വിളിച്ചുകൊണ്ടുപോയി സെൻസസ് തുടർന്നു.
നമ്മളെന്താ ഡാവിഞ്ചികളോ...
സെൻസസ് ഉദ്യോഗസ്ഥർ മാപ്പ് വരക്കുന്ന കാര്യം പറഞ്ഞപ്പോൾ ഒരാളുടെ പ്രതികരണം ഇങ്ങനെ: ‘താഴെ നിന്ന് മുകളിലുള്ള കാഴ്ചകൾ വരച്ചെടുക്കാൻ നമ്മൾ ഡാവിഞ്ചികളൊന്നുമല്ല, അത്യാധുനിക സംവിധാനങ്ങൾ ഉപയോഗിക്കണം’.
ചക്രവ്യൂഹത്തിലെ അഭിമന്യു
ഒരു പ്രദേശത്ത് പലയിടത്തായി കുറെ വീടുകൾ കയറിയ ശേഷം തിരികെയുള്ള വഴി മനസ്സിലാകുന്നില്ല. ഉദ്യോഗസ്ഥയുടെ കമന്റ് ഇങ്ങനെ: ‘ശരിക്കും കിളിപോയി, ചക്രവ്യൂഹത്തിൽ അകപ്പെട്ട അഭിമന്യുവിന്റെ അവസ്ഥ. മാപ്പിനോട് വഴി ചോദിച്ചു. മാപ്പ് തന്നില്ല. എങ്ങനെയോ വീട്ടിലെത്തി’. തുടങ്ങി രസകരമായ അനുഭവങ്ങളാണ് ഉദ്യോഗസ്ഥർ നിരവധി ഗ്രൂപ്പുകളിൽ പങ്കുവെക്കുന്നത്.
ആമസോൺ വനാന്തരങ്ങളുടെ മാപ്പ്
പല കാര്യങ്ങളിൽ സെൻസസ് സമയബന്ധിതമായി തീർന്നില്ലെങ്കിലോ എന്ന അവസ്ഥ ഒരാൾ പങ്കിട്ടപ്പോഴുള്ള പ്രതികരണം ഇങ്ങനെ: ‘തൂക്കിക്കൊല്ലില്ലായിരിക്കും. ചിലരെ പാക്കിസ്താനിലേക്ക് കയറ്റിവിടുമെന്നും മറ്റു ചിലരെ ആഫ്രിക്കയിലേക്ക് വിടുമെന്നും മറ്റ് ചിലരെ ആമസോൺ വനാന്തരങ്ങളുടെ മാപ്പ് തയാറാക്കാനും വിടുമായിരിക്കും’.
പല വീടുകളിലും കയറിച്ചെല്ലുന്നത് പേടിച്ച്
വീട്ടിലേക്കു കയറുന്നതിനു മുമ്പ് മുതൽ നായയുണ്ടോ എന്ന് പലവട്ടം നോക്കും. ഒരിടത്ത് ചെന്ന് വീടിന് പുറത്ത് നായെ കാണാതായപ്പോൾ ആശ്വസിച്ചു. കോളിങ് ബെൽ അമർത്തിയപ്പോൾ ദേ വീടിന് അകത്തുനിന്നു വരുന്നു നായ്ക്കൾ. പിറകെ വീട്ടുകാരും എത്തിയതോടെയാണ് ശ്വാസം നേരെ വീണത്.
ഒരിക്കലും ‘മാപ്പ്’ കൊടുക്കില്ല
‘എന്റമ്മോ എന്റെ മാപ്പാണ് മാപ്പ്, ഒരിക്കലും മാപ്പ് കൊടുക്കില്ല, ആ മാപ്പ് ക്രിയേറ്റർക്ക്’. സെൻസസിന്റെ ഭാഗമായി ഉദ്യോഗസ്ഥർക്ക് കൊടുത്തിരിക്കുന്ന മാപ്പിനെ പറ്റിയുള്ള ഒരാളുടെ അനുഭവമാണിത്. പല വാർഡുകൾ കൂട്ടിക്കലർത്തി പല സ്ഥലങ്ങളിലായി വളഞ്ഞും തിരിഞ്ഞുമാണ് മാപ്പിന്റെ പോക്ക്. ഇത് പലർക്കും ആശയക്കുഴപ്പവും ആശങ്കയുമാണ്.
