ചുരത്തിൽ ലോറി കുടുങ്ങി; വൻ ഗതാഗത കുരുക്ക്

വൈത്തിരി: വയനാട് ചുരത്തിൽ എട്ടാം വളവിനു സമീപം ചരക്കു ലോറി കേടുവന്നതു മൂലം ഞായറാഴ്ച ദേശീയ പാതയിൽ വൻ ഗതാഗതക്കുരുക്ക്. ഞായറാഴ്ച കാലത്ത് 11 മണിക്കാണ് ലോറി കേടുവന്നത്. റമദാൻ ആരംഭിക്കുന്നതിനു മുമ്പുള്ള വാരാന്ത്യം ആഘോഷിക്കാൻ ജില്ലയിലേക്ക് പുറപ്പെട്ടവരുടെ വാഹന ബാഹുല്യം കൂടിയായപ്പോൾ കുരുക്ക് രൂക്ഷമായി. ലോറി റോഡിനു വശത്തേക്ക് മാറ്റിയെങ്കിലും ഇന്നലെ ഉച്ച കഴിഞ്ഞതോടെ വാഹനങ്ങളുടെ നിര അടിവാരം മുതൽ വൈത്തിരി വരെ നീണ്ടു. ഞായറാഴ്ച രാത്രിയും ഇത് തന്നെയായിരുന്നു അവസ്ഥ. മണിക്കൂറുകൾ സമയമെടുത്താണ് വാഹനങ്ങൾക്ക് ചുരം കടക്കാൻ കഴിഞ്ഞത്.