തിരുവല്ല പുളിക്കീഴ് ബിവറേജസ് ഔട്ട്​ലെറ്റിൽ വൻ തീപിടിത്തം; കെട്ടിടവും ഗോഡൗണും പൂർണമായി കത്തിനശിച്ചു

തിരുവല്ല: പുളിക്കീഴ് ബിവറേജസ് ഔട്ട്​ലെറ്റിൽ വൻ അഗ്നിബാധ. ചൊവ്വാഴ്ച രാത്രി എട്ടോടെയായിരുന്നു സംഭവം. തീ പടരുന്നതുകണ്ട് ജീവനക്കാർ പുറത്തേക്ക് ഓടി രക്ഷപ്പെട്ടു.

ഔട്ട്​ലെറ്റിന്‍റെ കെട്ടിടവും ഗോഡൗണും പൂർണമായും കത്തിനശിച്ചു. ഗോഡൗണിന്‍റെ പിൻവശത്ത് വെൽഡിങ് പണികൾ നടക്കുന്നുണ്ടായിരുന്നു. ഇതിൽ നിന്ന്​ തീ പടർന്നതാകാമെന്നാണ് പ്രാഥമിക നിഗമനം.

അലൂമിനിയം ഷീറ്റ് ഉപയോഗിച്ച് നിർമിച്ച കെട്ടിടം പൂർണമായും കത്തിയമർന്നു. ലക്ഷക്കണക്കിന് രൂപയുടെ നാശനഷ്ടം കണക്കാക്കുന്നു. തിരുവല്ല, ചെങ്ങന്നൂർ, മാവേലിക്കര എന്നിവിടങ്ങളിൽ നിന്നെത്തിയ മൂന്ന് യൂനിറ്റ് അഗ്നിരക്ഷാസേന തീ നിയന്ത്രണ വിധേയമാക്കി.