കക്കട്ടിൽ ഒരാൾക്ക് വെട്ടേറ്റു; അക്രമി എത്തിയത് മഴക്കോട്ടു കൊണ്ട്​ മുഖം മറച്ച്​

കക്കട്ടിൽ (കോഴിക്കോട്): കക്കട്ടിൽ ടൗണിൽ വയോധികന്​ വെട്ടേറ്റു. മധുകുന്ന്​ പുന്നൂപ്പറമ്പത്ത്​ ഗംഗാധരനാണ്​ (65) തിങ്കളാഴ്ച വൈകീട്ട്​ കൈവേലി റോഡിന്​ സമീപം നിൽക്കുമ്പോൾ കൊടുവാൾ കൊണ്ട്​ വെട്ടേറ്റത്​. തോളിനും കാലിനും വെട്ടേറ്റ ഇയാളെ കോഴിക്കോട്​ മെഡിക്കൽ കോളജ്​ ആശുപത്രിയിൽ പ്രവേശിപ്പിച്ചു.

മഴക്കോട്ടു കൊണ്ട്​ മുഖം മറച്ച്​ കൊടുവാൾ പൊതിഞ്ഞു കെട്ടി വന്നയാൾ പൊടുന്നനെ വെട്ടുകയായിരുന്നെന്ന്​ പൊലീസിനോട്​ പറഞ്ഞു. കുറ്റ്യാടി പൊലീസ്​ ഗംഗാധാരന്റെ മൊഴിയെടുത്തു. വധശ്രമത്തിന്​ കേസെടുത്ത്​ അന്വേഷണം ആരംഭിച്ചു.

ഗംഗാധരന്റെ ബന്ധുവിന്റെ വീട്ടിൽ സി.പി.എം ബ്രാഞ്ച്​ കമ്മിറ്റി യോഗം നടത്തിയതുമായി ബന്ധപ്പെട്ട്​ നേരത്തെ നടന്ന തർക്കങ്ങളും അടിപിടിയുമാണ്​ അക്രമത്തിലേക്ക്​ നയിച്ചതെന്നാണ്​ പൊലീസിന്റെ നിഗമനം. യോഗം നടത്തുന്നത്​ ഗംഗാധരനും ബി.ജെ.പി പ്രവർത്തകനായ മകൻ ലകേഷും​ എതിർത്തിരുന്നു.

തുടർന്ന്​ വാക്കേറ്റവും അടിപിടിയും ഉണ്ടായതായും മകനെതിരെ സി.പി.എമ്മുകാരുടെ പരാതി പ്രകാരം കേസെടുത്തിരുന്നതായും പൊലീസ്​ പറഞ്ഞു. ഗംഗാധരൻ മുമ്പ്​ സി.പി.എമ്മുകാരനായിരുന്നെന്നും ഇപ്പോൾ പാർട്ടിയിലില്ലെന്നും നാട്ടുകാർ പറയുന്നു.