അമ്മയെ കളിയാക്കിയെന്ന് ആരോപിച്ച് അയൽവാസിയുടെ അമ്മയെ ചുറ്റിക കൊണ്ട് തലക്കടിച്ച് കൊല​പ്പെടുത്തി; അരൂക്കുറ്റിയില്‍ കുടുംബങ്ങൾ തമ്മിലുള്ള വൈരാഗ്യം ഒടുവിൽ ജീവനെടുത്തു

വടുതല (ആലപ്പുഴ): അയൽവാസികൾ തമ്മിൽ വർഷങ്ങളായുള്ള വാക്​പോരും വൈരാഗ്യവും ഒടുവിൽ വീട്ടമ്മയുടെ ജീവനെടുത്തു. സംഭവത്തിൽ അയൽവാസികളായ സഹോദരങ്ങളെ പൊലീസ് അറസ്റ്റ് ചെയ്തു. അരൂക്കുറ്റി പഞ്ചായത്ത് ഒന്നാംവാർഡ് പുളിന്താഴത്ത് ശരവണന്റെ ഭാര്യ വനജയാണ്​ (52) മരിച്ചത്.

ചൊവ്വാഴ്ച രാത്രി 10നായിരുന്നു നാടിനെ നടുക്കിയ കൊലപാതകം. സംഭവത്തിൽ അയൽവാസികളായ പുളിന്താഴെ നികർത്ത്​ വിജീഷ്​​ (44), സഹോദരൻ ജയേഷ്​ (42) എന്നിവരെയാണ്​ അറസ്​റ്റ്​ ചെയ്​തത്​. ഇവർ വീടുകയറി ആക്രമിക്കുകയായിരുന്നുവെന്നാണ് പൂച്ചാക്കൽ പൊലീസ്​ പറയുന്നത്. വഴക്കിനിടെ വനജയെ ചുറ്റികകൊണ്ട് തലക്ക്​ അടിക്കുകയായിരുന്നു.

പ്രതികളുടെ അമ്മയെ വനജയുടെ മകൻ ശരത് കളിയാക്കിയെന്നാരോപിച്ചായിരുന്നു തർക്കത്തിന്റെ തുടക്കം. ഇത് ചോദ്യംചെയ്യാൻ വനജയുടെ വീട്ടിലെത്തിയ ജയേഷും വിജീഷും വനജയുടെ മകനും ഭർത്താവ് ശരവണനുമായി സംഘർഷത്തിലായി. ഇത്​ തടയാൻ എത്തിയപ്പോഴാണ് വനജയുടെ​ തലക്ക്​​ അടിയേറ്റത്​. തലയുടെ പിൻഭാഗത്ത് അടിയേറ്റ വനജയെ സമീപവാസികൾ ചേർന്ന്​ കൊച്ചിയിലെ സ്വകാര്യ ആശുപത്രിയിൽ എത്തിച്ചെങ്കിലും ബുധനാഴ്ച പുലർച്ചയോടെ മരിച്ചു. ആക്രമണത്തിൽ ശരവണനും ശരത്തിനും പരിക്കേറ്റിട്ടുണ്ട്​.

സംഭവത്തിന്​ പിന്നാലെ ഒളിവിൽപോയ ജയേഷ്​ രാവിലെയും വിജീഷ്​ വൈകീട്ടും പൂച്ചാക്കൽ പൊലീസിൽ കീഴടങ്ങുകയായിരുന്നു. കൊലക്കുറ്റം അടക്കമുള്ള വകുപ്പുകൾ ചുമത്തി ജയേഷിനെ ഒന്നാംപ്രതിയും വിജീഷിനെ രണ്ടാംപ്രതിയുമാക്കിയാണ്​​ കേസെടുത്തത്​. മൂന്ന് വീടുകളുടെ വ്യത്യാസത്തിൽ മാത്രം താമസിക്കുന്ന ഇരുകുടുംബങ്ങളും തമ്മിൽ നിരന്തരം പ്രശ്നമുണ്ട്​. കഴിഞ്ഞ ഒക്ടോബറിൽ വിജീഷിന്‍റെ പിതാവ്​ സോമനെതിരെ ശരവണന്‍റെ കുടുംബം പരാതി നൽകിയിരുന്നു. ഇതിന്‍റെ വൈരാഗ്യത്തിലാണ്​ ഇപ്പോഴത്തെ ആക്രമണമെന്ന്​ പൊലീസ്​ പറഞ്ഞു. വനജയുടെ മക്കൾ: ശരത്​ലാൽ, ശാരിമോൾ. ആലപ്പുഴ മെഡിക്കൽ കോളജിലെ പോസ്റ്റ്​മോർട്ടത്തിനുശേഷം മൃതദേഹം ബന്ധുക്കൾക്ക്​ വിട്ടുനൽകി.