മാസം 60,000 കുമ്പിളപ്പം വിദേശത്തേക്ക്​ കയറ്റിയയക്കുന്ന കോട്ടയത്തെ സംരംഭത്തെക്കുറിച്ചറിയാം

കുമ്പിളപ്പമെന്നാൽ ഓർമയിലെത്തുക ആവിയിൽ വാടുന്ന വഴനയിലയുടെ മണമാണ്. നെയ്യും ഏലക്കയും ശർക്കരയും തേങ്ങയും ചേർന്ന രുചിമധുരം. മലയാളി വീടുകളിലെ നാടൻ നാലുമണിപ്പലഹാരം.

തെക്കൻ ജില്ലകളിൽ കുമ്പിളപ്പത്തെ തെരളിയെന്നും​ പറയാറുണ്ട്​. വഴനയില കുമ്പിൾ കുത്തി അതിൽ കൂട്ട്​ നിറച്ച്​ ആവിയിൽ പുഴുങ്ങിയെടുക്കുന്ന കുമ്പിളപ്പം ഇഷ്ടക്കാരായ മലയാളിയെ തേടി ഇ​പ്പോൾ വിദേശത്തേക്കും യാത്ര തുടങ്ങിയിരിക്കുകയാണ്​​.

മാസം 60,000 കുമ്പിളപ്പം​ വിദേശത്തേക്ക്

കോട്ടയം നിലൂർ സർവിസ്​ സഹകരണ ബാങ്കിന്‍റെ​ സംരംഭമായ നിലൂർ പ്രൊഡ്യൂസർ കമ്പനി​ സീസണിൽ മാസം 60,000 കുമ്പിളപ്പമാണ്​ വിദേശത്തേക്ക്​ കയറ്റിയയക്കുന്നത്​. ഗൾഫ്​ രാജ്യങ്ങൾ, യു.കെ, കാനഡ, യു.എസ്​ എന്നിവിടങ്ങളിലേക്ക്​ രണ്ടുവർഷമായി ഇവരുടെ കുമ്പിളപ്പം എത്തുന്നു.

വരിക്കച്ചക്കയാണ്​ കുമ്പിളപ്പത്തിന്‍റെ പ്രധാന ചേരുവ. കൂഴച്ചക്ക രുചി കുറക്കും. കേടുവരാതിരിക്കാൻ ചക്കച്ചുള കുരുകളഞ്ഞ്​ പൾപ്പാക്കിയാണ്​ എടുക്കുക. വർഷത്തിൽ ഒമ്പതുമാസവും ചക്ക കിട്ടും. ബാക്കി മൂന്നുമാസത്തേക്കുള്ളത്​ പൾപ്പാക്കി ശീതീകരിച്ച്​ സൂക്ഷിക്കും. ​

പ്രാദേശികമായിത്തന്നെയാണ്​ ചക്ക സംഭരിക്കുന്നത്​. തോട്ടങ്ങളിൽ വെറുതെ വീണുപോവുന്ന ചക്ക കർഷകർക്ക്​ ന്യായവില നൽകി വാങ്ങും. ഇതിനായി അമ്പതോളം പേരുണ്ട്​. ​

വിദേശ മലയാളിയുടെ പ്രിയ വിഭവം

ശർക്കരപ്പാനി, ജീരകപ്പൊടി, ഏലക്കപ്പൊടി, ചക്കപൾപ്പ്​, തേങ്ങ എന്നിവ ചേർത്തുണ്ടാക്കുന്ന മിശ്രിതത്തിലേക്ക്​ റവയോ അരിപ്പൊടിയോ കൂടി ചേർത്തിളക്കി കുഴച്ചെടുക്കും.

കഴുകി വൃത്തിയാക്കിയ വഴനയില കുമ്പിൾ കുത്തി അതിലേക്ക്​ കൂട്ട്​ നിറക്കും. 85 ഗ്രാം ആണ്​ ഓരോ കുമ്പിളപ്പവും. തുടർന്ന്​ അപ്പച്ചെമ്പിൽ വെച്ച്​​ പുഴുങ്ങിയെടുക്കും. ഒരു സമയം 1500 എണ്ണം വരെ ഉണ്ടാക്കാനാവുന്ന ചെമ്പാണുള്ളത്​. ദിവസം ഒമ്പതിനായിരത്തിനടുത്ത്​ കുമ്പിളപ്പം ഉണ്ടാക്കുന്നുണ്ട്​.

രാവിലെ ഒമ്പതോടെ ആദ്യം അപ്പച്ചെമ്പിൽനിന്നിറങ്ങിയ കുമ്പിളപ്പം വിപണിയിലേക്ക്​ യാത്ര ആരംഭിക്കും. ശീതീകരിക്കാതെ സൂക്ഷിച്ചാലും രണ്ടു ദിവസം വരെ കേടുവരാതെയിരിക്കും. 10 സ്​​ത്രീകൾക്കാണ്​​ കുമ്പിളപ്പ നിർമാണത്തിന്‍റെ ചുമതല. രണ്ടു യൂനിറ്റുകൾ ഇതിനായുണ്ട്​. കയറ്റുമതി കമ്പനി നേരിട്ടല്ല, ഏജൻസികൾ വഴിയാണ്​​. വിദേശത്ത്​ 90 ശതമാനം ഉപഭോക്താക്കളും മലയാളികൾതന്നെ.

നാട്ടിൽ ദിവസം വിറ്റുപോകുന്നത് 3500 വരെ കുമ്പിളപ്പം

പ്രാ​ദേശികമായി ദിവസം 3500 വരെ കുമ്പിളപ്പം വിറ്റുപോവും. ബേക്കറികൾ, കാന്‍റീനുകൾ തുടങ്ങിയവയാണ്​ വലിയതോതിൽ കുമ്പിളപ്പം വാങ്ങുക.

കൂടാതെ പൗഡർ, കട്​ലറ്റ്​, പുട്ടുപൊടി, ചിപ്സ്​ തുടങ്ങി ചക്കയുടെത്തന്നെ 16 ഉൽപന്നങ്ങൾ നിലൂർ ബ്രാൻഡിൽ വിപണിയിലുണ്ട്​. കപ്പ, മുളകുപൊടി, മല്ലി​പ്പൊടി, മഞ്ഞൾപ്പൊടി, അച്ചാറുകൾ, മറ്റു പലഹാരങ്ങൾ എന്നിവ വേ​റെയും.

സൊ​​സൈറ്റികൾ വഴി ശേഖരിക്കുന്ന വഴനയില

എടനയില എന്നും അറിയപ്പെടുന്ന വഴനയിലയിൽ കുമ്പിൾ കുത്തി നിറച്ചാണ് കുമ്പിളപ്പം പുഴുങ്ങിയെടുക്കുന്നത്. വഴനയിലക്ക് ഒന്നിന്​ ഒരു രൂപ വെച്ചാണ്​ എടുക്കുന്നത്​.

പത്തനംതിട്ട, ഇടുക്കി എന്നിവിടങ്ങളിലെ വനങ്ങളോടുചേർന്ന പ്രദേശങ്ങളിൽനിന്നും പാലക്കാട്ടെ മണ്ണാർക്കാട്, അട്ടപ്പാടി തുടങ്ങിയ സ്ഥലങ്ങളിൽനിന്നും സൊ​​സൈറ്റികൾ വഴിയാണ്​ വഴനയില ശേഖരിക്കുന്നത്​. ഇലകൾ ഇടത്തരം വലുപ്പത്തിൽ വേണം. വലിയ ഇലകളാണെങ്കിൽ ചീന്തി ഒരേ വലുപ്പത്തിലാക്കും. തൂക്കത്തിൽ വ്യത്യാസം വരാതിരിക്കാനാണിത്​.

രുചിതന്നെയാണ്​ ഹൈലൈറ്റ്​

2016ലാണ്​ നിലൂർ സഹകരണ ബാങ്ക്​ കർഷകരെ സഹായിക്കാൻ നിലൂർ പ്രൊഡ്യൂസർ കമ്പനി​ തുടങ്ങിയത്​. തുടക്കത്തിൽ ചക്ക, കപ്പ തുടങ്ങിയവ കർഷകരിൽനിന്ന്​ വാങ്ങി സംസ്കരിച്ച്​ മൂല്യവർധിത ഉൽപന്നങ്ങളാക്കുകയായിരുന്നു. കുമ്പിളപ്പത്തിന്‍റെ വിപണി തിരിച്ചറിഞ്ഞതോടെയാണ്​ ആ മേഖലയിലേക്ക്​ തിരിഞ്ഞത്​.

തുടക്കത്തിൽതന്നെ മികച്ച പ്രതികരണം ലഭിച്ചതോടെ വിപണിയിൽ ആവശ്യക്കാരേറി. ​രുചിതന്നെയാണ്​ നിലൂർ കുമ്പിളപ്പത്തി​ന്‍റെ ഹൈലൈറ്റ്. തങ്ങളുടെ ഉൽപന്നങ്ങൾക്ക്​ വിപണി കിട്ടുന്നതിനാൽ കർഷകരും ഹാപ്പി. പ്രാദേശികമായി 60 പേർക്ക്​ തൊഴിലും ലഭ്യമാക്കുന്നു സ്ഥാപനം. ചെയർമാൻ മാത്യു സിറിയക്, സി.ഇ.ഒ ഷാജി