ക്ഷേത്രമുറ്റത്ത് സൗഹാർദ ഇഫ്താർ ഒരുക്കി പിരപ്പമൺകാട് പാടശേഖര സമിതി
text_fields
ശ്രീഭൂതനാഥൻകാവ് ക്ഷേത്ര മുറ്റത്ത് പിരപ്പമൺകാട് പാടശേഖര സമിതി സംഘടിപ്പിച്ച വയലിഫ്താർ
ആറ്റിങ്ങൽ: പിരപ്പമൺകാട് പാടശേഖരസമിതിയും പാടശേഖര സമിതിക്കൊപ്പംനിന്ന് വയലാഘോഷങ്ങൾ ഒരുക്കി കൃഷിയെ നാടിന്റെ ഉത്സവമാക്കുന്ന സൗഹൃദ സംഘവും വയൽക്കരയിൽ ക്ഷേത്രമുറ്റത്ത് ഇഫ്താർ വിരുന്നൊരുക്കി മതസൗഹാർദ മാതൃക സൃഷ്ടിച്ചു. വയൽക്കരയിലെ ശ്രീഭൂതനാഥൻകാവ് ക്ഷേത്ര മൈതാനിയിൽ ‘വയലിഫ്താർ’ സംഘടിപ്പിച്ചത്.
ശ്രീഭൂതനാഥന്റെ നൂറ്റാണ്ടുകൾ പഴക്കമുള്ള ക്ഷേത്രത്തിന്റെ പറമ്പിൽ ആകർഷകമായി തയാറാക്കിയ സദസ്സിൽ നാനാജാതി മതസ്ഥർ പങ്കെടുത്ത ഇഫ്താർ സംഗമം മതസൗഹാർദത്തിന്റെ മഹനീയ മാതൃകയായി. പാടശേഖര സമിതിയുടെ പ്രവർത്തനങ്ങൾക്ക് ക്ഷേത്രാനുബന്ധ സൗകര്യങ്ങൾ വിട്ടുകൊടുത്ത് നാടിന്റെ കാർഷിക മുന്നേറ്റത്തിന് ഊർജവും മാതൃകയുമായ ശ്രീഭൂതനാഥൻ കാവ് ക്ഷേത്ര ട്രസ്റ്റ് ഇഫ്താർ സംഗമവേദിയൊരുക്കിയതിലൂടെ പുതിയൊരു മാതൃക കൂടി സൃഷ്ടിച്ചിരിക്കുകയാണ്. ക്ഷേത്ര വിശ്വാസങ്ങളെ മാനിച്ചുകൊണ്ട് പഴങ്ങളും വെജിറ്റേറിയൻ വിഭവങ്ങളും കഞ്ഞിയും ചേർത്തൊരുക്കിയ ഇഫ്താർ വിഭവങ്ങളും ഏറെ ശ്രദ്ധേയമായി. ക്ഷേത്ര മൈതാനിയിൽ നടന്ന ഇഫ്താർ സംഗമ ഉദ്ഘാടന ചടങ്ങിന് ശേഷം ക്ഷേത്രത്തിലെ ദീപാരാധനയും സമീപത്തെ ക്ഷേത്ര മുറ്റത്ത് നോമ്പ് തുറയും ക്ഷേത്ര ഓഡിറ്റോറിയത്തിൽ മഗ്‌രിബ് നമസ്കാരവും ഒരേസമയം നടന്നു.
ഉത്സവ പ്രതീതിയിൽ വൈദ്യുതി ദീപാലങ്കരവും തോരണങ്ങളും കെട്ടി അലങ്കരിച്ചാണ് വേദിയും സദസ്സും സജ്ജീകരിച്ചിരുന്നത്. വയലിഫ്താർ വി. ശശി എം.എൽ.എ ഉദ്ഘാടനം ചെയ്തു. മുദാക്കൽ ഗ്രാമപഞ്ചായത്ത് പ്രസിഡന്റ് പള്ളിയറ ശശിയുടെ അധ്യക്ഷതയിൽ ചേർന്ന യോഗത്തിൽ ബ്ലോക്ക് പഞ്ചായത്ത് പ്രസിഡന്റ് പി.സി. ജയശ്രീ സമുദായ നേതാക്കളെ പൊന്നാട അണിയിച്ച് ആദരിച്ചു.
ഇടയ്ക്കോട് പള്ളി ഇമാം നിസാമുദ്ദീൻ ബാഖവി, ക്രൈസ്റ്റ് നഗർ സ്കൂൾ പ്രിൻസിപ്പൽ റവ.ഫാദർ ജോമോൻ അഗസ്റ്റിൻ എന്നിവർ മതസൗഹാർദ സന്ദേശങ്ങൾ നൽകി. യോഗത്തിന് പാടശേഖരസമിതി ട്രഷറർ രാജേന്ദ്രൻ നായർ സ്വാഗതവും റിസപ്ഷൻ കമ്മിറ്റി കൺവീനർ അനിൽകുമാർ നന്ദിയും പറഞ്ഞു.
മുദാക്കൽ പഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയർപേഴ്സൺ ദീപാറാണി, വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ വിഷ്ണു രവീന്ദ്രൻ, ബ്ലോക്ക് പഞ്ചായത്ത് മെംബർ നന്ദു രാജ് ആർ.പി, പഞ്ചായത്ത് മെംബർ ബിജു ടി, ശ്രീഭൂതനാഥൻകാവ് ക്ഷേത്ര ട്രസ്റ്റ് അംഗം ശ്രീധരൻ നായർ, പഞ്ചായത്ത് സെക്രട്ടറി ചന്ദ്രബാബു എസ്.എസ്, കൃഷി ഓഫിസർ ലീന എൻ, വില്ലേജ് ഓഫിസർ ഷാജഹാൻ ഇ, സി.ഡി.എസ് ചെയർപേഴ്സൺ പ്രേമലത, ഉപദേശകസമിതി അംഗങ്ങളായ രാജീവ് ബി, വിജു കോരാണി, ജയകുമാർ, സാബു എൻ, പാടശേഖരസമിതി സെക്രട്ടറി അൻഫർ എ, സൗഹൃദ സംഘം കൺവീനർ ബിജു മാറ്റാടിയിൽ എന്നിവർ സംസാരിച്ചു.
