ശബരിമല നട തുറന്നു; ഇന്ന്​ നിറപുത്തരി

ശബരിമല: നിറപുത്തരി പൂജകൾക്കായി ശബരിമല നട തുറന്നു. ചൊവ്വാഴ്ച വൈകീട്ട് അഞ്ചിന് തന്ത്രി കണ്ഠരര് ബ്രഹ്മദത്തന്റെ സാന്നിധ്യത്തിൽ മേൽശാന്തി അരുൺകുമാർ നമ്പൂതിരി നടതുറന്ന് ദീപം തെളിച്ചു. ബുധനാഴ്ചയാണ്​ നിറപുത്തരി. പുലർച്ച 5.30നും 6.30നും ഇടയിലുള്ള മുഹൂർത്തത്തിൽ നിറപുത്തരി പൂജകൾ നടക്കും.

നിറപുത്തരിക്കായുള്ള നെൽകതിരുകളുമായുള്ള ഘോഷയാത്ര ചൊവ്വാഴ്ച വൈകീട്ട് എട്ടിന്​ സന്നിധാനത്തെത്തി. അച്ചൻകോവിൽ ശ്രീധർമശാസ്ത ക്ഷേത്രത്തിൽനിന്നാണ് നെൽകതിരുകൾ എത്തിച്ചത്​.

പുലർച്ച 4.30ന് നെൽക്കതിരുകൾ തിരുവിതാംകൂർ ദേവസ്വം ബോർഡ് പ്രസിഡന്‍റ്​ അഡ്വ. പി.എസ്. പ്രശാന്ത്, അംഗം അഡ്വ. എ. അജികുമാർ എന്നിവർ ചേർന്ന് ഏറ്റുവാങ്ങി.

ക്ഷേത്രത്തെ വലംവെച്ചശേഷം ഏറ്റുവാങ്ങിയ നെൽകതിരുകൾ ഘോഷയാത്ര സംഘത്തിന് കൈമാറി. വിവിധ ഇടങ്ങളിലെ സ്വീകരണ ​ശേഷമാണ്​ ഘോഷയാത്ര ശബരിമല സന്നിധാനത്ത് എത്തിയത്​. നിറപുത്തരി പൂജകൾ പൂർത്തിയാക്കി ബുധനാഴ്ച രാത്രി 10ന്​ നട അടക്കും.