വർക്കല സ്വദേശി സൗദിയിൽ ജോലിക്കിടെ ഹൃദയാഘാതം മൂലം​ മരിച്ചു

ജുബൈൽ: തിരുവനന്തപുരം വർക്കല സ്വദേശി വിജി വാസുദേവൻ (45) സൗദി കിഴക്കൻ പ്രവിശ്യയിലെ നാരിയയിൽ ഹൃദയാഘാതം മൂലം മരിച്ചു. വിജി ജോലി ചെയ്തിരുന്ന ലഘുഭക്ഷണശാല (ബൂഫിയ)യിലെ ജോലിക്കിടെ കുഴഞ്ഞുവീഴുകയായിരുന്നു.

ഭാര്യാസഹോദരൻ സൗദിയിലുണ്ട്. നവോദയ കലാസാംസ്​കാരിക വേദി ജുബൈൽ അറൈഫി ഏരിയ സിസ്കോ യൂനിറ്റ് അംഗമാണ്. മൃതദേഹം നാരിയ ആശുപത്രിയിൽ സൂക്ഷിച്ചിരിക്കുകയാണ്.

ഔദ്യോഗിക നടപടികൾ പൂർത്തീകരിച്ച്​ മൃതദേഹം നാട്ടിലേക്ക് കൊണ്ടുപോകുമെന്ന് സൗദി കെ.എം.സി.സി കിഴക്കൻ പ്രവിശ്യാ വൈസ് പ്രസിഡൻറ്​ അൻസാരി മന്നമ്പത്ത് അറിയിച്ചു. പിതാവ്: വാസുദേവൻ, ഭാര്യ: ശ്രീജ. മക്കൾ: അഭിനവ് കൃഷ്ണ (11), ആരാധ്യ (എട്ട്​), അർണവ് (ആറ്​).