പവർ ബാങ്ക് വാങ്ങുമ്പോൾ ശ്രദ്ധിക്കേണ്ടത്

സ്മാർട്ട്‌ ഫോൺ ഉപയോഗിക്കുന്നവരുടെ എണ്ണം വർധിച്ചതോടെ പവർ ബാങ്കിന്‍റെ ഉപയോഗവും വർധിച്ചു. വൈദ്യുതി ഇല്ലാത്ത സന്ദർഭങ്ങളിലും ദൂര യാത്രക്ക് തയ്യാറെടുക്കുമ്പോഴും പവർ ബാങ്ക് ഒഴിച്ചുകൂടാനവാത്ത ഒന്നാണ്. ഇന്ന് വിപണിയിൽ വിവിധ കമ്പനികളുടെ പവർ ബാങ്കുകൾ ലഭ്യമാണ്. അതുപോലെ ഗുണമേന്മ കുറഞ്ഞ വ്യാജ ഉൽപന്നങ്ങളും സുലഭമാണ്. കൃത്യമായ അവബോധം ഇല്ലെങ്കിൽ വഞ്ചിക്കപ്പെടാൻ സാധ്യതയുണ്ട്.

പവര്‍ ബാങ്ക് വാങ്ങുമ്പോള്‍ ശ്രദ്ധിക്കേണ്ട പ്രധാന കാര്യങ്ങൾ,

കപ്പാസിറ്റി എത്ര വേണം:

ഒരു പവർ ബാങ്ക് എത്രത്തോളം ചാർജ് ചെയ്യാൻ സഹായിക്കുമെന്ന് അറിയാൻ, നിങ്ങൾ അതിന്‍റെ കപ്പാസിറ്റി (Capacity) നോക്കണം. ഇത് സാധാരണയായി mAh (മില്യാംപ്സ്-അവർ, Milliampere-hour) എന്ന യൂനിറ്റിലാണ് രേഖപ്പെടുത്താറുള്ളത്.

എന്താണ് mAh?

നിങ്ങളുടെ പവർ ബാങ്കിന് എത്ര ഊർജ്ജം സംഭരിക്കാൻ കഴിയും എന്നതിന്‍റം അളവാണ് mAh. ഈ സംഖ്യ എത്രത്തോളം വലുതാകുന്നുവോ, അത്രത്തോളം കൂടുതൽ ചാർജ് ആ പവർ ബാങ്കിൽ ഉണ്ടാകും, നിങ്ങളുടെ ഫോൺ കൂടുതൽ തവണ ചാർജ് ചെയ്യാനും സാധിക്കും.

* ചെറിയ mAh (ഉദാ: 5,000 mAh): ഇത് സാധാരണയായി ഒരു ഫോണിനെ ഒരു തവണയൊക്കെ പൂർണ്ണമായി ചാർജ് ചെയ്യാൻ മതിയാകും. ഇത് പോക്കറ്റിൽ കൊണ്ടുനടക്കാൻ എളുപ്പമാണ്.

* ഇടത്തരം mAh (ഉദാ: 10,000 mAh): മിക്ക ഫോണുകളെയും 1.5 മുതൽ 2 തവണ വരെ ചാർജ് ചെയ്യാൻ ഇത് സഹായിക്കും. ഒരു ദിവസത്തെ യാത്രകൾക്ക് ഇത് വളരെ ഉപകാരപ്രദമാണ്.

* വലിയ mAh (ഉദാ: 20,000 mAh-ഉം അതിനുമുകളിലും): ഇത് ഒന്നിലധികം തവണ ഫോൺ ചാർജ് ചെയ്യാനും, ടാബ്‌ലെറ്റുകൾ, ചില ലാപ്ടോപ്പുകൾ എന്നിവ ചാർജ് ചെയ്യാനും ഉപയോഗിക്കാം. കൂടുതൽ ദിവസത്തെ യാത്രകൾക്ക് ഇത് നല്ലതാണ്, പക്ഷേ വലുപ്പവും ഭാരവും കൂടുതലായിരിക്കും.

പോർട്ടുകളുടെ പ്രത്യേകത:

ഒരു പവർ ബാങ്ക് തിരഞ്ഞെടുക്കുമ്പോൾ, അതിലെ ചാർജ് ചെയ്യുന്ന പോർട്ടുകൾ (Ports) വളരെ പ്രധാനമാണ്. ഒരേ സമയം ഒന്നിലധികം ഡിവൈസുകൾ ചാർജ് ചെയ്യാൻ പറ്റുന്നത് തെരഞ്ഞെടുക്കുക. ചില പവർ ബാങ്കുകളിൽ ഒരു ചാർജിങ് പോർട്ട് മാത്രമേ ഉണ്ടായിരിക്കൂ. കൂടാതെ, പോർട്ടുകൾ വ്യത്യസ്ത ചാർജർ ടൈപ്പുകളുമായിരിക്കും. അതുകൊണ്ട് തന്നെ പവർ ബാങ്കിന്‍റെ പോർട്ടുകളുടെ എണ്ണവും തരവും നിങ്ങളുടെ ആവശ്യാനുസരണം തിരഞ്ഞെടുക്കുക.

പ്രധാനപ്പെട്ട പോർട്ടുകൾ:

1. USB-A പോർട്ട്: ഇതാണ് നമ്മൾ സാധാരണയായി കാണുന്ന ദീർഘചതുരാകൃതിയിലുള്ള പോർട്ട്. പഴയ ചാർജിങ് കേബിളുകൾക്കും മിക്കവാറും എല്ലാ ഫോണുകൾക്കും ഇത് ഉപയോഗിക്കാം. ചില USB-A പോർട്ടുകൾക്ക് "ക്വിക്ക് ചാർജ്" (Quick Charge - QC) പോലുള്ള വേഗത്തിലുള്ള ചാർജിങ് കഴിവുണ്ടാകും.

2. USB-C പോർട്ട്: ഇതൊരു പുതിയതരം പോർട്ടാണ്, ചെറിയതും വൃത്താകൃതിയിലുള്ളതുമാണ്.
മിക്ക വേഗതയേറിയ ചാർജിങ് ടെക്നോളജികളും (പ്രത്യേകിച്ച് "പവർ ഡെലിവറി" -(Power Delivery അഥവാ PD) USB-C പോർട്ടുകളിലൂടെയാണ് പ്രവർത്തിക്കുന്നത്. പുതിയ ഫോണുകൾക്കും ലാപ്ടോപ്പുകൾക്കും ടാബ്‌ലെറ്റുകൾക്കും ഇത് അത്യാവശ്യമാണ്. ഈ പോർട്ട് വഴി പവർ ബാങ്കിനെ വേഗത്തിൽ ചാർജ് ചെയ്യാനും സാധിക്കും.

3. മൈക്രോ USB പോർട്ട്: ചില പഴയ പവർ ബാങ്കുകളിൽ ഈ പോർട്ട് ഉണ്ടാകും. പവർ ബാങ്കിനെ ചാർജ് ചെയ്യാൻ മാത്രമാണ് ഇത് സാധാരണയായി ഉപയോഗിക്കാറുള്ളത്.

എത്ര പോർട്ടുകൾ വേണം?

നിങ്ങൾക്ക് ഒന്നിൽ കൂടുതൽ ഫോണുകളോ മറ്റ് ഉപകരണങ്ങളോ (ടാബ്‌ലെറ്റ്, ഹെഡ്‌ഫോൺ) ഒരേ സമയം ചാർജ് ചെയ്യണമെങ്കിൽ, രണ്ടോ മൂന്നോ ഔട്ട്പുട്ട് പോർട്ടുകളുള്ള പവർ ബാങ്കുകൾ തെരഞ്ഞെടുക്കുക. ശരിയായ പോർട്ടുകളുള്ള പവർ ബാങ്ക് തെരഞ്ഞെടുക്കുന്നത് നിങ്ങളുടെ എല്ലാ ഉപകരണങ്ങളും എളുപ്പത്തിലും വേഗത്തിലും ചാർജ് ചെയ്യാൻ സഹായിക്കും.

ചാർജിങ് വേഗം:

ഒരു പവർ ബാങ്കിന് നിങ്ങളുടെ സ്മാർട്ട്‌ഫോൺ പൂജ്യത്തിൽ നിന്ന് 100% വരെ കുറഞ്ഞത് രണ്ടോ മൂന്നോ തവണ പൂർണ്ണമായി ചാർജ് ചെയ്യാൻ കഴിയണം. ഫോണിന്‍റെ ശേഷിയുടെ രണ്ടിരട്ടിയോ മൂന്നിരട്ടിയോ ശേഷിയുള്ള പവർ ബാങ്കുകളാണ് കൂടുതൽ നല്ലത്.

സുരക്ഷ:

നിങ്ങളുടെ ഫോണിന് തെരഞ്ഞെടുക്കുന്ന പവർ ബാങ്ക് സുരക്ഷിതമായ വൈദ്യുതി നൽകുമെന്ന് ഉറപ്പുവരുത്തണം. പവർ ബാങ്കിന് അമിത ചാർജിങ് നിർത്താനും അതിന്‍റെ ഇന്റഗ്രേറ്റഡ് സർക്യൂട്ടിനെ സംരക്ഷിക്കാനും ഷോർട്ട് സർക്യൂട്ട് ഒഴിവാക്കാനും കഴിയുവുള്ളതാണോ എന്ന് ഉറപ്പുവരുത്തണം.

വലുപ്പവും ഭാരവും:

നമ്മുടെ ഉപയോഗത്തിനനുസരിച്ച് പവർ ബാങ്കിന്‍റെ വലുപ്പവും ഭാരവും തിരഞ്ഞെടുക്കുക. യാത്ര പോകുന്നവർക്ക് ഇത് ഒരു പ്രധാന ഘടകമാണ്, അതുകൊണ്ട് തന്നെ യാത്ര ചെയ്യുന്നവർ ഭാരം കുറഞ്ഞതും ഒതുക്കമുള്ളതുമായ പവർ ബാങ്ക് തിരഞ്ഞെടുക്കുക. കൂടുതൽ ശേഷിയുള്ള പവർ ബാങ്കുകൾക്ക് സാധാരണയായി വലുപ്പവും ഭാരവും കൂടുതലായിരിക്കും. mAh ശേഷി കൂടുന്നതിനനുസരിച്ച് വലിപ്പവും ഭാരവും വർധിക്കും. ഉദാഹരണത്തിന്, 20,000mAh പവർ ബാങ്ക് നിങ്ങളുടെ പോക്കറ്റിന് വളരെ വലുതായിരിക്കാം. എന്നാൽ, 6000–10,000mAh ഉള്ള ഒരു പവർ ബാങ്ക് നിങ്ങുടെ പോക്കറ്റിൽ ഒതുങ്ങുന്നതുമായിരിക്കും.

ബ്രാൻഡ്:

അറിയപ്പെടുന്ന ബ്രാൻഡുകൾ തെരഞ്ഞെടുക്കാൻ ശ്രദ്ധിക്കുക. ഗുണമേന്മയും സുരക്ഷയും ഉറപ്പാക്കാൻ അത് സഹായിക്കും.