ട്രാക്കിൽ ആവേശപ്പോരാട്ടം

പാലാ: മുതിർന്ന കായികതാരങ്ങളുടെ മിന്നും പ്രകടനത്തിന്​ സാക്ഷിയായി പാലാ മുനിസിപ്പൽ സ്റ്റേഡിയം. പ്രായാധിക്യത്തെയും ചുട്ടുപൊള്ളുന്ന വെയിലിനെയും അവഗണിച്ച്​ അവർ ട്രാക്കിൽ നിരന്നപ്പോൾ ഗാലറിയിലെ കാണികളിൽ അത്ഭുതവും ആവേശവുമായി. വെറ്ററൻസ് അത്ലറ്റിക് ഫെഡറേഷൻ ഓഫ് ഇൻഡ്യ (വാഫി) സംസ്ഥാന സമിതിയുടെ ആഭിമുഖ്യത്തിൽ 44 -ാമത് സംസ്ഥാന ചാമ്പ്യൻഷിപ്പ് പാലാ മുനിസിപ്പൽ സ്റ്റേഡിയത്തിൽ ജോസ് കെ.മാണി എം.പി ഉദ്ഘാടനം ചെയ്തു. വാഫി സംസ്ഥാന പ്രസിഡന്‍റ്​ അഡ്വ.വി.ഗിരീശൻ അധ്യക്ഷനായി.

വിവിധ ജില്ലകളിൽ നിന്നുമുള്ള 30 വയസ്​ മുതൽ 85 വയസ്​ വരെയുള്ള സ്ത്രീ-പുരുഷഭേദമന്യേ ആയിരത്തോളം താരങ്ങളാണ്​ ആദ്യദിനം വിവിധ കാറ്റഗറികളിലായി മത്സരിച്ചത്​. 100 മീറ്റർ, 200 മീറ്റർ, 400മീറ്റർ ഓട്ടമത്സരങ്ങളും ലോങ്​ ജമ്പ്​, ത്രിപ്പിൾ ജമ്പ്​, ഡിസ്ക്​ ​ത്രോ, ഷോട്ട്​പുട്ട്​ തുടങ്ങിയ മത്സരങ്ങളാണ്​ ആദ്യദിനം അരങ്ങേറിയത്​. അന്താരാഷ്ട്ര തലത്തിൽ തുടർച്ചയായി മത്സരിക്കുന്ന നിരവധി താരങ്ങളാണ്​ വിവിധ മത്സരങ്ങളിൽ പ​ങ്കെടുത്തത്​.

കെ.എം.മാണി സ്​മാരക ഓവറോൾ ചാമ്പ്യൻഷിപ്പ്​ ജോസ്​ കെ.മാണി എം.പി വാഫി സംസ്ഥാന പ്രസിഡന്‍റ്​ അഡ്വ.വി.ഗിരീശന്​ കൈമാറി. പാലാ മുനിസിപ്പൽ ചെയർമാൻ ഷാജു വി.തുരുത്തേൽ പതാക ഉയർത്തി. കൗൺസിലർ ബിജി ജോജോ, വാഫി അഖിലേന്ത്യ എക്സിക്യൂട്ടിവ്​ അംഗം ജി.ശ്രീകല, വാഫി സംസ്ഥാന ജോയന്‍റ്​ സെക്രട്ടറിമാരായ അഡ്വ.എം.ആർ. മനോജ് കുമാർ, അലി പുള്ളിക്കുടി, ജനറൽ കൺവീനർ കെ.ജി.എസ്.കുമാർ, മുത്തോലി സർവ്വീസ് കോപ്പറേറ്റീവ് ബാങ്ക് പ്രസിഡന്‍റ്​ ടോബിൻ കെ.അലക്സ്, വാഫി ജില്ല പ്രസിഡന്‍റ്​ അഡ്വ.എം.ബി.രഘുനാഥൻ നായർ എന്നിവർ സംസാരിച്ചു.