എ.ഐയിലൂടെ പരസ്യ വിപണി പിടിക്കാൻ മെറ്റ
text_fields
പരമ്പരാഗത മാർക്കറ്റിങ് വ്യവസായ മേഖലയെ ഭീതിയിലാഴ്ത്തി, ഫേസ്ബുക്ക്-ഇൻസ്റ്റഗ്രാം മാതൃകമ്പനി മെറ്റ എ.ഐ അധിഷ്ഠിത ടൂളുകളിലൂടെ പരസ്യവിപണി പിടിക്കാനൊരുങ്ങുന്നു. ടാർജറ്റഡ് കാമ്പയിനുകളടക്കം നിർവഹിക്കാൻ ശേഷിയുള്ള പുതിയ എ.ഐ ടൂളുകൾ അടുത്ത വർഷം അവസാനത്തോടെ പുറത്തിറക്കാനാണ് മെറ്റയുടെ പദ്ധതി. ബ്രാൻഡുകളുടെ പ്രചാരണവും ബജറ്റും കൈകാര്യം ചെയ്യുന്ന പരസ്യ കമ്പനികൾക്ക് നെഞ്ചിടിപ്പേറ്റുന്ന പദ്ധതികളാണ് മാർക് സുക്കർബർഗിന്റെ ആലോചനയിലെന്ന് ഗാർഡിയൻ പത്രം റിപ്പോർട്ട് ചെയ്യുന്നു.
മെറ്റയുടെ അഡ്വർടൈസിങ് പ്ലാറ്റ്ഫോം ഉപയോഗിച്ച്, ഉൽപന്നത്തിന്റെ/സേവനത്തിന്റെ ചിത്രങ്ങളടങ്ങിയ പരസ്യങ്ങൾ നിർമിക്കാൻ ബ്രാൻഡുകൾക്ക് എളുപ്പമാകും. നിലവിലുള്ള പരസ്യങ്ങൾ ഫേസ്ബുക്കിലും ഇൻസ്റ്റയിലും പ്രത്യക്ഷപ്പെടുംമുമ്പേ മാറ്റം വരുത്താൻ സാധിക്കുന്ന ചില എ.ഐ ടൂളുകൾ നിലവിൽ മെറ്റ അവതരിപ്പിച്ചിട്ടുണ്ട്. പുതിയ ടൂളുകൾ വരുന്നതോടെ പരസ്യനിർമാണം, മീഡിയ പ്ലാനിങ്-ബയിങ് തുടങ്ങിയവയിൽ പരസ്യ ഏജൻസികൾക്ക് വെല്ലുവിളി ഉയരുമെന്ന് ഈ മേഖലയിലുള്ളവർ മുന്നറിയിപ്പ് നൽകുന്നു. എന്നാൽ, ചെറിയ ബജറ്റുള്ള ബ്രാൻഡുകൾക്ക് ഇത് ഉപകാരമാകുമെന്നാണ് മെറ്റയുടെ അവകാശവാദം.
