ഇന്ത്യൻ ഡ്രൈവിംഗ് ലൈസൻസ് ഉണ്ടോ? അന്താരാഷ്ട്ര യാത്രകളിൽ ഈ 5 രാജ്യങ്ങളിൽ നിങ്ങൾക്ക് സ്വയം വാഹനം ഓടിക്കാം
text_fields
വിദേശരാജ്യങ്ങളിൽ പോയി സ്വന്തമായി വാഹനം വാടകക്കെടുത്ത് റോഡ് ട്രിപ്പുകൾ നടത്താൻ ആഗ്രഹിക്കുന്ന സഞ്ചാരികളാണോ നിങ്ങൾ.. എന്നാൽ നിങ്ങളുടെ കൈയിൽ ഇന്ത്യൻ ഡ്രൈവിംഗ് ലൈസൻസ് ഉണ്ടെങ്കിൽ, മറ്റ് രാജ്യങ്ങളിലെ പ്രത്യേക ഡ്രൈവിംഗ് ടെസ്റ്റുകൾ പാസ്സാകാതെ തന്നെ നിങ്ങൾക്ക് അവിടെ നിയമപരമായി വാഹനം ഓടിക്കാൻ കഴിയും.
എന്നാൽ ഓരോ രാജ്യത്തിന്റെയും നിയമങ്ങളും കാലാവധിയും വ്യത്യസ്തമായതിനാൽ യാത്രക്ക് മുമ്പ് ബന്ധപ്പെട്ട വിവരങ്ങൾ ഉറപ്പാക്കണമെന്ന് വിദഗ്ധർ നിർദേശിക്കുന്നുണ്ട്. അത്തരത്തിൽ ഇന്ത്യൻ ലൈസൻസ് ഉപയോഗിച്ച് നിങ്ങൾക്ക് കാറുകളോ ബൈക്കുകളോ ഓടിക്കാൻ കഴിയുന്ന അഞ്ച് രാജ്യങ്ങളെ പരിചയപ്പെടാം.
1. യുണൈറ്റഡ് കിംഗ്ഡം
യു.കെയിലെ (ഇംഗ്ലണ്ട്, സ്കോട്ട്ലൻഡ്, വെയ്ൽസ്, വടക്കൻ അയർലൻഡ്) മനോഹരമായ റോഡുകളിലൂടെ ഇന്ത്യൻ ലൈസൻസ് ഉപയോഗിച്ച് നിങ്ങൾക്ക് ഒരു വർഷം വരെ വാഹനം ഓടിക്കാം. ഇന്ത്യയിലെപ്പോലെ തന്നെ യു.കെയിലും റോഡിന്റെ ഇടതുവശം ചേർന്നാണ് വാഹനങ്ങൾ ഓടിക്കേണ്ടത് എന്നത് ഇന്ത്യൻ ഡ്രൈവർമാർക്ക് വലിയൊരു ആശ്വാസമാണ്. എന്നാൽ നിങ്ങളുടെ ലൈസൻസിൽ ഏത് തരം വാഹനമാണോ (കാർ അല്ലെങ്കിൽ ബൈക്ക്) രേഖപ്പെടുത്തിയിരിക്കുന്നത്, അത് മാത്രമേ ഓടിക്കാൻ അനുവാദമുള്ളൂ.
2. യുണൈറ്റഡ് സ്റ്റേറ്റ്സ് ഓഫ് അമേരിക്ക
അമേരിക്കയിലെ മിക്ക സംസ്ഥാനങ്ങളും ഇന്ത്യൻ ഡ്രൈവിംഗ് ലൈസൻസ് അംഗീകരിക്കുന്നുണ്ട്. യു.എസിൽ എത്തിയ തീയതി മുതൽ ഒരു വർഷം വരെയാണ് ഇതിന്റെ കാലാവധി. ഡ്രൈവിംഗ് ലൈസൻസിനൊപ്പം നിങ്ങൾ രാജ്യത്ത് പ്രവേശിച്ച തീയതി തെളിയിക്കുന്നതിനുള്ള I-94 ഫോം കൂടി കൈയിൽ കരുതണം. യു.എസിൽ റോഡിന്റെ വലതുവശം ചേർന്നാണ് വാഹനം ഓടിക്കേണ്ടത്. ചില യു.എസ് സംസ്ഥാനങ്ങളിൽ അന്താരാഷ്ട്ര പെർമിറ്റ് ആവശ്യപ്പെട്ടേക്കാം.
3. സ്വിറ്റ്സർലൻഡ്
യൂറോപ്പിലെ ഏറ്റവും മനോഹരമായ രാജ്യങ്ങളിലൊന്നായ സ്വിറ്റ്സർലൻഡിൽ ഇന്ത്യൻ ലൈസൻസ് ഉപയോഗിച്ച് ഒരു വർഷം വരെ നിങ്ങൾക്ക് യഥേഷ്ടം വാഹനം ഓടിക്കാം. ലൈസൻസ് പൂർണ്ണമായും ഇംഗ്ലീഷിലായിരിക്കണം. ഇവിടെയും റോഡിന്റെ വലതുവശത്തുകൂടിയാണ് വാഹനങ്ങൾ ഓടിക്കേണ്ടത്.
4. ന്യൂസിലൻഡ്
ന്യൂസിലൻഡിൽ പ്രവേശിച്ച് ഒരു വർഷം വരെ ഇന്ത്യൻ ലൈസൻസ് ഉപയോഗിച്ച് നിങ്ങൾക്ക് ഡ്രൈവ് ചെയ്യാം. എന്നാൽ അവിടെ വാഹനം വാടകക്കെടുക്കാൻ ഡ്രൈവർക്ക് കുറഞ്ഞത് 21 വയസ്സ് പ്രായമുണ്ടായിരിക്കണം. ഇന്ത്യയിലേതുപോലെ ഇടതുവശം ചേർന്നാണ് ഇവിടെയും വണ്ടിയോടിക്കേണ്ടത്. ലൈസൻസ് പൂർണ്ണമായും ഇംഗ്ലീഷിലല്ലെങ്കിൽ ന്യൂസിലൻഡ് ട്രാൻസ്പോർട്ട് ഏജൻസി അംഗീകരിച്ച ഔദ്യോഗിക തർജ്ജമ കരുതേണ്ടതുണ്ട്.
5. ജർമനി
ജർമനിയിൽ ഇന്ത്യൻ ലൈസൻസിന്റെ കാലാവധി ആറു മാസം മാത്രമാണ്. ലൈസൻസ് ഇംഗ്ലീഷിലോ ജർമൻ ഭാഷയിലോ ആയിരിക്കണം. ആറു മാസത്തിന് ശേഷവും അവിടെ വാഹനം ഓടിക്കണമെങ്കിൽ അന്താരാഷ്ട്ര പെർമിറ്റോ ജർമൻ ലൈസൻസോ ആവശ്യമാണ്. ജർമനിയിലും റോഡിന്റെ വലതുവശത്തുകൂടിയാണ് ട്രാഫിക് ക്രമീകരിച്ചിരിക്കുന്നത്.
യാത്രക്കാർ ശ്രദ്ധിക്കേണ്ട സുപ്രധാന കാര്യങ്ങൾ
ഈ രാജ്യങ്ങളിൽ ഭൂരിഭാഗത്തും ലൈസൻസ് ഇംഗ്ലീഷിലായിരിക്കണമെന്നതാണ് പ്രധാന നിബന്ധന.കൂടാതെ, ഈ രാജ്യങ്ങളിലെ സർക്കാർ നിയമപ്രകാരം ഇന്ത്യൻ ലൈസൻസ് സാധുവാണെങ്കിലും, പല വിദേശ കാർ റെന്റൽ കമ്പനികളും അന്താരാഷ്ട്ര ഡ്രൈവിംഗ് പെർമിറ്റ് ഇല്ലാതെ വാഹനം വാടകക്ക് നൽകാൻ തയ്യാറാകാറില്ല. അതിനാൽ സുരക്ഷിതമായ യാത്രക്കായി ഇന്ത്യയിൽ നിന്ന് പുറപ്പെടുന്നതിന് മുൻപ് കേന്ദ്ര ഗതാഗത മന്ത്രാലയത്തിന്റെ ഔദ്യോഗിക [പരിവാഹൻ പോർട്ടൽ (https://sarathi.parivahan.gov.in/) വഴി 1000 രൂപ ഫീസ് അടച്ച് ഓൺലൈനായി ഐ.ഡി.പി സ്വന്തമാക്കാവുന്നതാണ്.
