വാട്സ്ആപ്പിലൂടെ കെ.എസ്.ആര്.ടി.സി ടിക്കറ്റ് ബുക്ക് ചെയ്യാൻ പഠിച്ചോ? ഇനിയും അറിയാത്തവര്ക്കായി ഇതാ എളുപ്പവഴി
text_fields
തിരുവനന്തപുരം: കെ.എസ്.ആര്.ടി.സി ടിക്കറ്റുകള് വാട്സ്ആപ്പിലൂടെ എളുപ്പത്തില് ബുക്ക് ചെയ്യാമെന്ന സൗകര്യം ഇപ്പോള് നിരവധി പേര് പ്രയോജനപ്പെടുത്തുന്നുണ്ടെങ്കിലും, സാങ്കേതികവിദ്യയുമായി അത്രയധികം ഇണങ്ങിനില്ക്കാത്ത സാധാരണക്കാര്ക്ക് ഇത് എങ്ങനെ ഉപയോഗിക്കാമെന്ന കാര്യത്തില് ഇനിയും വ്യക്തതയില്ല. പ്രത്യേക ആപ്പുകളോ സങ്കീര്ണ്ണമായ രജിസ്ട്രേഷനുകളോ ഇല്ലാതെ വാട്സ്ആപ്പ് ചാറ്റ് വഴി എങ്ങനെ ടിക്കറ്റ് സ്വന്തമാക്കാമെന്ന് ലളിതമായി മനസ്സിലാക്കാം.
ഈ സേവനം ഉപയോഗപ്പെടുത്തുന്നതിനായി ആദ്യം കെ.എസ്.ആര്.ടി.സിയുടെ ഔദ്യോഗിക വാട്സ്ആപ്പ് നമ്പറായ 9447071021 നിങ്ങളുടെ മൊബൈല് ഫോണില് സേവ് ചെയ്യണം. തുടര്ന്ന് വാട്സ്ആപ്പ് തുറന്ന് ഈ നമ്പറിലേക്ക് 'Hi' എന്നോ 'Hello' എന്നോ സന്ദേശം അയക്കുക. മലയാളം, ഇംഗ്ലീഷ്, തമിഴ് ഉള്പ്പെടെയുള്ള 11 ഭാഷകളില് ഇവിടെ സേവനം ലഭ്യമാണ്. നമ്മള് അയക്കുന്ന സന്ദേശത്തിന്റെ ഭാഷ ഏതാണെന്ന് എ.ഐ ബോട്ട് സ്വയം തിരിച്ചറിഞ്ഞ് അതേ ഭാഷയില് മറുപടി നല്കും എന്നതാണ് ഇതിന്റെ മറ്റൊരു പ്രത്യേകത.
ചാറ്റ് ആരംഭിച്ചുകഴിഞ്ഞാല് യാത്ര ചെയ്യേണ്ട റൂട്ട്, തീയതി തുടങ്ങിയ വിവരങ്ങള് ചോദിച്ചറിയുന്ന മുറയ്ക്ക് ചാറ്റിലൂടെ തന്നെ മറുപടി നല്കാം. തുടര്ന്ന് ലഭ്യമായ സര്വീസുകളില് നിന്ന് ഇഷ്ടമുള്ളത് തിരഞ്ഞെടുത്ത് ബസിലെ സീറ്റുകളും ഉറപ്പാക്കാം. ഇതിനുശേഷമുള്ള സുരക്ഷിതമായ ഓണ്ലൈന് പേയ്മെന്റ് ലിങ്ക് വഴി തുക അടച്ചാല് നിമിഷങ്ങള്ക്കകം ഇ-ടിക്കറ്റും പി.എന്.ആര് നമ്പറും വാട്സ്ആപ്പ് ചാറ്റില് തന്നെ വന്നുചേരും.
ടിക്കറ്റ് ബുക്ക് ചെയ്യുന്നതിന് പുറമെ, എടുത്ത ടിക്കറ്റ് ക്യാന്സല് ചെയ്യാനും, യാത്രാ നിരക്കുകളും സീറ്റ് ലഭ്യതയും പരിശോധിക്കാനും ഈ സംവിധാനം ഉപയോഗിക്കാം. കൗണ്ടറുകളിലെ നീണ്ട വരികളും തിരക്കും ഒഴിവാക്കി യാത്രക്കാര്ക്ക് സമയം ലാഭിക്കാന് സഹായിക്കുന്ന ഈ വാട്സ്ആപ്പ് സേവനം കൃത്യമായി മനസ്സിലാക്കി ഉപയോഗിച്ചാല് ഏവര്ക്കും യാത്രകള് വളരെ ലളിതമാക്കാം.
