No Plastic -ജൂൺ അഞ്ച് ലോക പരിസ്ഥിതി ദിനം
text_fields
മനുഷ്യശരീരത്തിൽ പ്ലാസ്റ്റിക്കിന്റെ അംശമുണ്ടെന്ന് പറഞ്ഞാൽ വിശ്വസിക്കുമോ? വിശ്വസിച്ചേ മതിയാകൂ. നമ്മുടെ ശരീരത്തിൽ, രക്തം, വിവിധ അവയവങ്ങൾ, കോശങ്ങൾ എന്നിവയിൽ ചെറിയ പ്ലാസ്റ്റിക് അംശം (മൈക്രോപ്ലാസ്റ്റിക്സ്, നാനോ പ്ലാസ്റ്റിക്സ്) കടന്നുകൂടിയിട്ടുണ്ടെന്നാണ് കണ്ടെത്തൽ. വലുപ്പത്തിൽ 5 മില്ലിമീറ്ററിൽ താഴെയാണ് ഈ മൈക്രോപ്ലാസ്റ്റിക്സ്. ആഹാരത്തിലൂടെയും വെള്ളത്തിലൂടെയും ശ്വാസോച്ഛാസത്തിലൂടെയും ചർമവുമായുള്ള സമ്പർക്കത്തിലൂടെയെല്ലാമാണ് ഈ പ്ലാസ്റ്റിക് ശരീരത്തിൽ കടന്നുകൂടിയിരിക്കുന്നത്. ഹൃദയസംബന്ധമായ അസുഖങ്ങൾ ഉൾപ്പെടെ ആരോഗ്യപ്രശ്നങ്ങളും ഇതുമൂലം ഉണ്ടാകാമെന്ന് ശാസ്ത്രജ്ഞർ പറയുന്നു. നമ്മുടെ ഭൂമിയിൽ കുന്നുകൂടിയിരിക്കുന്ന മനുഷ്യനിർമിതമായ പ്ലാസ്റ്റിക് മാലിന്യം നമ്മെതന്നെ നശിപ്പിച്ചുതുടങ്ങിയിരിക്കുന്നു. ഒരിക്കലും നശിക്കാത്തവയാണ് ഈ പ്ലാസ്റ്റിക്. സമുദ്രങ്ങളിലും മറ്റു ജലസ്രോതസ്സുകളിലും വനങ്ങളിലുമെല്ലാം സകല ജീവജാലങ്ങൾക്കും ഭീഷണിയായി പ്ലാസ്റ്റിക് കുന്നുകൂടിക്കഴിഞ്ഞു. ഈ പ്ലാസ്റ്റിക് മാലിന്യത്തെ തടയാനും ഒന്നിച്ച് നേരിടാനും ആഹ്വാനം ചെയ്തുകൊണ്ടുള്ളതാണ് 2025ലെ ലോക പരിസ്ഥിതി ദിനം. ‘പ്ലാസ്റ്റിക് മലിനീകരണത്തിനെതിരെ പോരാടുക’ എന്നതാണ് ഈ വർഷത്തെ പ്രമേയം.
പ്ലാസ്റ്റിക് എന്ന വില്ലൻ
ലോകത്ത് 400 മില്യൺ ടൺ പ്ലാസ്റ്റിക് മാലിന്യം കഴിഞ്ഞവർഷം മാത്രം കുന്നുകൂടി. ദിനേന ഉപയോഗിക്കുന്ന പ്ലാസ്റ്റിക് ഉൽപന്നങ്ങൾ മുതൽ ഒറ്റത്തവണ ഉപയോഗിച്ച് ഉപേക്ഷിച്ചതുവരെ ഇതിൽ ഉൾപ്പെടും. ആവാസ വ്യവസ്ഥയെ നശിപ്പിക്കുന്നതിനും കാലാവസ്ഥ വ്യതിയാനത്തിനും വരെ പ്ലാസ്റ്റിക് കാരണമാകും. ലോകം ഇന്നു നേരിടുന്ന ഏറ്റവും വലിയ വെല്ലുവിളിയാണ് പ്ലാസ്റ്റിക് മാലിന്യം. ഇതു പരിഹരിക്കാൻ കഴിയുന്ന ഒരു പ്രശ്നമാണെന്നതാണ് മറ്റൊരു വസ്തുത. ഒറ്റത്തവണ മാത്രം ഉപയോഗിക്കുന്ന പ്ലാസ്റ്റിക്കിന്റെ ഉപയോഗം കുറക്കുക, പുനരുപയോഗിക്കാൻ കഴിയുന്നവ വീണ്ടും ഉപയോഗിക്കുക എന്നതാണ് മാർഗം.
പ്ലാസ്റ്റിക്കിന്റെ വലുപ്പമെത്ര?
നിത്യജീവിതത്തിൽ ഒഴിവാക്കാൻ കഴിയാത്ത ഒന്നായി പ്ലാസ്റ്റിക് മാറിക്കഴിഞ്ഞു. മൈക്രോ പ്ലാസ്റ്റിക്കുകൾ മുതൽ മെഡിക്കൽ ഉപകരണങ്ങൾ വരെ ഇതിൽ ഉൾപ്പെടും. 1950 മുതൽ, മനുഷ്യൻ ഇതുവരെ 9.2 ബില്ല്യൺ ടൺ വരെ പ്ലാസ്റ്റിക് ഉൽപാദിപ്പിച്ചുവെന്നാണ് കണക്ക്. യാഥാർഥ്യമെന്തെന്നാൽ ഇതിൽ 7 ബില്ല്യൺ ടൺ പ്ലാസ്റ്റിക് മാലിന്യമായി മാറിയിരിക്കുന്നു.
ഏതുതരം പ്ലാസ്റ്റിക്കാണ് ഏറ്റവും അപകടം?
മലിനീകരണത്തിന്റെ ആക്കം കൂട്ടുന്നത് ഒറ്റത്തവണ ഉപയോഗിക്കാവുന്ന പ്ലാസ്റ്റിക്കാണ്. വാട്ടർ ബോട്ടിലുകൾ, ഡിസ്പെൻസിങ് കണ്ടെയ്നറുകൾ, ടേക്എവേ ബാഗുകൾ, ഫ്രീസർ ബാഗുകൾ തുടങ്ങിയവ ഇതിൽ ഉൾപ്പെടും.
പ്ലാസ്റ്റിക് മാലിന്യം എവിടെ?
ഭൂമിയിൽ എല്ലായിടത്തും പ്ലാസ്റ്റിക് മാലിന്യം എത്തിക്കഴിഞ്ഞു. പുഴകൾ, തടാകങ്ങൾ, സമുദ്രങ്ങൾ മുതൽ ചെറുതും വലുതുമായ നഗരങ്ങളിലും കൃഷിസ്ഥലങ്ങളിലും വരെ. മരുഭൂമിയിലും തണുത്തുറഞ്ഞ ഐസ് പ്രദേശങ്ങളിലും. ലോകത്തെ ഏറ്റവും വലിയ കൊടുമുടിയായ മൗണ്ട് എവറസ്റ്റിലും ഭൂമിയുടെ ഏറ്റവും ആഴത്തിലുള്ള പ്രദേശമായ മരിയാന ട്രെഞ്ചിൽ വരെ പ്ലാസ്റ്റിക് മാലിന്യമെത്തിക്കഴിഞ്ഞു.
പ്ലാസ്റ്റിക് മാലിന്യം അപകടകാരിയാകുന്നതെങ്ങനെ?
ഒറ്റയുത്തരത്തിൽ പറഞ്ഞാൽ ആവാസവ്യവസ്ഥയെ മുഴുവനായി തകർത്തുകളയും. കടലിലെ സൂക്ഷ്മജീവികൾ മുതൽ വലിയ തിമിംഗിലങ്ങളെ വരെ ഇല്ലാതാക്കാൻ പ്ലാസ്റ്റിക്കിന് കഴിയും. മണ്ണിലെ സൂക്ഷ്മജീവികളെ നശിപ്പിക്കുന്നതിൽ പ്രധാന പങ്ക് പ്ലാസ്റ്റിക്കിനുണ്ട്. മാത്രമല്ല, മണ്ണിന്റെ ഫലഭൂയിഷ്ഠത കുറക്കുന്നതിനും മണ്ണിലെ കൃഷി നശിക്കുന്നതിനും പ്ലാസ്റ്റിക് കാരണമാകുന്നു. പ്ലാസ്റ്റിക് മാലിന്യം കാലാവസ്ഥ മാറ്റത്തിന് വരെ വഴിയൊരുക്കുന്നു.
പുനരുപയോഗം കൊണ്ടുമാത്രം പ്ലാസ്റ്റിക് മാലിന്യം കുറക്കാനാകുമോ?
ഇല്ല, ഒമ്പത് ശതമാനം പ്ലാസ്റ്റിക് മാത്രമേ പുനരുപയോഗിക്കാറുള്ളൂ. മിക്ക പ്ലാസ്റ്റിക് ഉൽപന്നങ്ങളും പുനരുപയോഗിക്കാൻ കഴിയുന്ന രീതിയിലോ പുനരുൽപാദിപ്പിക്കാൻ കഴിയുന്ന തരത്തിലോ അല്ല നിർമിച്ചിരിക്കുന്നത്. ഒന്നോ രണ്ടോ തവണ മാത്രമേ ഇതു പുനരുപയോഗിക്കാനും സാധിക്കൂ. പ്ലാസ്റ്റിക് മാലിന്യം ശരിയായ രീതിയിൽ ശേഖരിക്കാനും സംസ്കരിക്കാനും മിക്ക രാജ്യങ്ങൾക്കും കഴിയുന്നില്ല. ഇത് പ്ലാസ്റ്റിക് മാലിന്യം കുമിയുന്നതിന് കാരണമാകുന്നു.
പ്ലാസ്റ്റിക് മാലിന്യത്തെ എങ്ങനെ നേരിടാം?
ഉൽപാദനം, രൂപകൽപന, ഉപഭോഗം മുതൽ വിനിയോഗം വരെ ഓരോ ഘട്ടവും പരിശോധിക്കണം. ഇത്തരത്തിൽ ലൈഫ് സൈക്കിൾ സമീപനമാണ് പ്ലാസ്റ്റിക്കിന്റെ വിഷയത്തിൽ സ്വീകരിക്കാനാകുക. ഒറ്റത്തവണ ഉപയോഗിക്കുന്ന പ്ലാസ്റ്റിക്കിന്റെ ഉപയോഗം കുറക്കുക. പ്ലാസ്റ്റിക് ഉൽപന്നങ്ങൾ പുനർരൂപകൽപന ചെയ്യുക. പ്ലാസ്റ്റിക്കിന് ബദൽ കണ്ടെത്തുക എന്നതാണ് മറ്റൊരു മാർഗം. കൂടാതെ, ഒഴിച്ചുകൂടാനാകാത്ത പ്ലാസ്റ്റിക് ഉൽപന്നങ്ങൾ ഉപയോഗശേഷം വലിച്ചെറിയാനോ കത്തിക്കാനോ പാടില്ല. ഇപ്പോൾ പ്ലാസ്റ്റിക്കുകൾ ശേഖരിക്കുന്ന സർക്കാർതല സംവിധാനങ്ങൾ എല്ലായിടത്തുമുണ്ട്. പ്ലാസ്റ്റിക് മാലിന്യം ശേഖരിക്കാൻ വരുന്നവർക്ക് കൈമാറുക.
പരിസ്ഥിതി ദിനം
പരിസ്ഥിതി സംരക്ഷണത്തിനായി കർമപരിപാടികൾ ആസൂത്രണം ചെയ്യുന്നതിനാണ് ഈ ദിനം. പരിസ്ഥിതി സംരക്ഷണത്തിന്റെ പ്രധാന്യം വിളിച്ചോതി 1974 ജൂൺ അഞ്ചുമുതൽ ഐക്യരാഷ്ട്രസഭ പരിസ്ഥിതിദിനം ആചരിച്ചുവരുന്നു. ശുദ്ധവായുവിന്റെയും ജലത്തിന്റെയും ഉറവിടമാണ് വനങ്ങളും മരങ്ങളും. വനങ്ങൾ മിക്കതും ഇന്ന് ജനവാസ കേന്ദ്രങ്ങളായി. മരങ്ങൾ വെട്ടിനശിപ്പിച്ചു. അരുവികൾ, കുളങ്ങൾ, നദികൾ തുടങ്ങിയ ജലസ്ത്രോതസ്സുകൾ നികത്തി മാലിന്യം തള്ളാനുള്ള ഇടങ്ങളായി മാറ്റി. കുന്നുകളും മലകളും ഇടിച്ചുനിരത്തി കോൺക്രീറ്റ് കെട്ടിടങ്ങൾ പണിതു. പക്ഷികളുടെയും മൃഗങ്ങളുടെയുമെല്ലാം ആവാസവ്യവസ്ഥ നശിപ്പിച്ചു. സമുദ്രം മാലിന്യം തള്ളാനുള്ള ഇടമാക്കി. മനുഷ്യന്റെ അനാവശ്യ ഇടപെടലുകൾ പ്രകൃതിയുടെ തനത് സ്വഭാവം തിരിച്ചുകൊണ്ടുവരാൻ സാധിക്കാത്ത വിധം നശിപ്പിച്ചുകൊണ്ടിരിക്കുന്നു. കാലങ്ങളെടുത്താണെങ്കിലും പ്രകൃതിയെ പുനരുജ്ജീവിപ്പിക്കുക, അതിന്റെ സ്വഭാവം തിരികെ കൊണ്ടുവരുക എന്ന ലക്ഷ്യത്തോടെയാണ് പരിസ്ഥിതി ദിനം ആചരിക്കുന്നത്. 1987 മുതൽ ഓരോ രാജ്യങ്ങളെ ആതിഥേയത്വം വഹിപ്പിച്ചുകൊണ്ടാണ് പരിസ്ഥിതി ദിനാചരണം.
