‘ബെളുത്തിട്ട് പാറാൻ’ തേക്കുന്ന ക്രീമുകൾ കാൻസറിന് കാരണമാകുമോ? -ഫേസ് ക്രീമും ഹെയർ ഡൈയും ടാറ്റൂവും ഉപയോഗിക്കുമ്പോൾ ഇക്കാര്യങ്ങൾ ശ്രദ്ധിക്കണം

മുൻകാലങ്ങളെ അപേക്ഷിച്ച്​ സമൂഹത്തിന്‍റെ സാമ്പത്തികനില ഉയർന്നതോടെ സൗന്ദര്യവർധക വസ്തുക്കൾ ഉപയോഗിക്കുന്നവരുടെ എണ്ണത്തിലും ആനുപാതിക മാറ്റങ്ങൾ വന്നിട്ടുണ്ട്​.

രാസവസ്​തുക്കളുടെ ഗുണനിലവാരം

സൗന്ദര്യവർധക വസ്തുക്കളിൽ അടങ്ങിയ രാസവസ്​തുക്കളുടെ ഗുണനിലവാരം, അളവ്​ എന്നിവയെക്കുറിച്ചൊന്നും സാധാരണക്കാർ ബോധവാന്മാരല്ല എന്നത് അപകടകരമായ​ വസ്തുതയാണ്​.

ഇവ തുടർച്ചയായി ഉപയോഗിക്കുന്നതുകൊണ്ടുള്ള ആരോഗ്യപ്രശ്നങ്ങളെക്കുറിച്ച്​ നിർമാതാക്കൾതന്നെ നൽകുന്ന മുന്നറിയിപ്പുകളെക്കുറിച്ചും ഭൂരിപക്ഷം പേർക്കും അറിവില്ല.

ആയിരക്കണക്കിന്​ രാസവസ്തുക്കൾ അടങ്ങിയ ഇത്തരം വസ്തുക്കൾ മനുഷ്യശരീരത്തിൽ സൃഷ്ടിക്കുന്ന പ്രശ്നങ്ങളെക്കുറിച്ച്​ ലോകത്തെമ്പാടുമായി നിരവധി പഠനങ്ങളും ഗവേഷണങ്ങളും നടന്നുവരുന്നുണ്ട്​. ഇവയിൽ വളരെ പ്രധാനപ്പെട്ട രണ്ടെണ്ണമാണ്​ ഹെയർ ഡൈ, പച്ചകുത്തൽ എന്നിവ കാൻസറിന്​ കാരണമാവു​േമാ എന്നത്​.

‘ഹെയർ ഡൈ’കൾ സൃഷ്ടിക്കുന്ന ആശങ്കകൾ

നിലവിൽ 50 ശതമാനത്തിലധികം ആളുകളാണ്​ ഇന്ത്യയിൽ ‘ഹെയർ ഡൈ’കൾ അല്ലെങ്കിൽ ഹെയർ കളറുകൾ ഉപയോഗിക്കുന്നത്​. ഇതിൽതന്നെ സ്​ത്രീകളാണ്​ കൂടുതൽ. മുൻവർഷങ്ങളെ അപേക്ഷിച്ച്​ കോടിക്കണക്കിന്​ ഡോളറിന്‍റെ വിപണിയാണ്​ ഇത്തരം ഉൽപന്നങ്ങൾക്ക്​ ഇന്ന്​ ഇന്ത്യയിലുള്ളത്​.

മുടിക്ക്​ നിറം നൽകാൻ ഉപയോഗിക്കുന്ന വസ്തുക്കൾ മനുഷ്യരിൽ കാൻസറിന്​ കാരണമാവുന്നു​ണ്ടോ എന്ന കാര്യത്തിൽ രണ്ടു പതിറ്റാണ്ടിലധികമായി ഗവേഷകരുടെ നേതൃത്വത്തിൽ നിരവധി പഠനങ്ങൾ നടന്നുവരുന്നുണ്ട്. ഇവയിൽ പലതിലും ഹെയർ ഡൈകൾ കാൻസറിന്​ കാരണമാവുന്നുണ്ട്​ എന്ന്​ മുന്നറിയിപ്പ്​ നൽകുമ്പോൾ മറ്റു ചില പഠനങ്ങളിൽ ഇതു തെളിയിക്കപ്പെടാതെയും പോയിട്ടുണ്ട്​.

അതേസമയം, ആഗോളതലത്തിൽ വൈദ്യശാസ്​ത്ര രംഗത്തുള്ളവർ ആശ്രയിക്കുകയും ലോകാരോഗ്യ സംഘടനയുടെ സഹായത്തോടെ പ്രവർത്തിക്കുകയും ചെയ്യുന്ന ‘ഇന്‍റർനാഷനൽ ഏജൻസി ഫോർ റിസർച് ഓൺ കാൻസർ’ (IARC) ഇതിനെക്കുറിച്ച്​ വ്യക്തമായ മുന്നറിയിപ്പുകൾ നൽകിയിട്ടുണ്ട്​. ​

ഈ ഏജൻസി നടത്തിയ പഠനത്തിൽ, കാൻസറിന്​ കാരണമാവുന്ന വസ്തുക്കളുടെ (Carcinogens) പട്ടികയിൽ ഇത്തരം ഉൽപന്നങ്ങളെ ഉൾപ്പെടുത്തിയിട്ടില്ലെങ്കിലും കാൻസർ സാധ്യതയുള്ളവയുടെ പട്ടികയിൽ ഇവയുണ്ട്​.

‘ചിലപ്പോൾ കാൻസറിന്​ കാരണമായേക്കാം’ എന്ന്​ മുന്നറിയിപ്പ്​ നൽകുന്ന വസ്​തുക്കളുടെ പട്ടികയായ ‘2A’യിൽ ഹെയർ ഡൈകൾ ഉൾപ്പെടുത്തിയിട്ടുണ്ട് എന്ന കാര്യം അവഗണിക്കാനാവില്ല​. ഈ ഉൽപന്നങ്ങൾ നിരന്തരം ഉപയോഗിക്കുന്ന ഹെയർ കട്ടിങ്​ സലൂണുകൾ, ബ്യൂട്ടി പാർലറുകൾ എന്നിവിടങ്ങളിൽ ജോലിയെടുക്കുന്നവർക്ക്​ കാൻസർ വരാനുള്ള സാധ്യത വളരെ കൂടുതലാണെന്ന്​ ഐ.എ.ആർ.സി കണ്ടെത്തുകയും ചെയ്തിട്ടുണ്ട്​.

ഹെയർ ഡൈകൾ ഉപയോഗിച്ചാൽ കാൻസർ വരും എന്ന്​ വ്യക്​തമായി തെളിയിക്കാൻ കഴിയുന്ന ഗവേഷണ ഫലങ്ങൾ ലഭ്യമല്ലാത്തതിനാൽതന്നെ ലോകാരോഗ്യ സംഘടന ഇതുസംബന്ധിച്ച മുന്നറിയിപ്പുകൾ ഇതുവരെ പുറത്തുവിട്ടിട്ടില്ല. എന്നാൽ, ഇവ സുരക്ഷിതമാണെന്ന്​ സാക്ഷ്യപ്പെടുത്താനും സംഘടന മുന്നോട്ടുവന്നിട്ടില്ല.

അതേസമയം, മൂത്രസഞ്ചി, വൃക്ക, സ്​തനം, തൊലി എന്നിവിടങ്ങളിൽ കാൻസർ ബാധിച്ചവരെ കേ​ന്ദ്രീകരിച്ച്​ നടത്തിയ പല പഠനങ്ങളും കാൻസർ സാധ്യതതന്നെയാണ്​ മുന്നോട്ടുവെക്കുന്നത്​. അതുകൊണ്ടുതന്നെ വളരെ സൂക്ഷിച്ച്​ ഉപയോഗിക്കേണ്ട ഉൽപന്നമായി ഇതിനെ കണക്കാക്കാം​.

ടാറ്റൂ എന്ന വില്ലൻ

യുവതീയുവാക്കളിൽ പടന്നുപിടിക്കുന്ന ഫാഷൻ ഭ്രമങ്ങളിൽ ഒന്നായി മാറിക്കൊണ്ടിരിക്കുകയാണ്​ ‘പച്ചകുത്തൽ’ അഥവാ ടാറ്റൂ (Tattoo).

ടാറ്റൂകളും കാൻസറും തമ്മിലെ ബന്ധത്തെക്കുറിച്ച് സമീപകാലത്ത്​ നടത്തിയ ഒന്നിലധികം പഠനങ്ങൾ കടുത്ത ആശങ്കകളാണ്​ ഉയർത്തുന്നത്​. പ്രശസ്ത ശാസ്​ത്ര പ്രസിദ്ധീകരണമായ ‘ദ ലാൻസെറ്റ്’ ജേണലിൽ പ്രസിദ്ധീകരിച്ച ശ്രദ്ധേയ പഠനത്തിൽ പച്ചകുത്തുന്നവരിൽ അത്​ ചെയ്യാത്തവരെ അപേക്ഷിച്ച്​ കാൻസർ വരാനുള്ള സാധ്യത 21 ശതമാനത്തോളം കൂടുതലാണെന്നും കണ്ടെത്തിയിട്ടുണ്ട്​​. ഇതിൽതന്നെ ‘ലിംഫോമ’ എന്ന ഗണത്തിൽപ്പെട്ട കാൻസറാണ് കൂടുതലായി​ കണ്ടുവരുന്നത്​.

ടാറ്റൂവിന്​ വേണ്ടി ഉപയോഗിക്കുന്ന മഷികളിൽ ഉപയോഗിക്കുന്ന ഘന ലോഹങ്ങൾ, അസോ ഡൈകൾ, പോളിസൈക്ലിക് ആരോമാറ്റിക് ഹൈഡ്രോകാർബണുകൾ (PAHs) തുടങ്ങിയ ഹാനികരമായ പദാർഥങ്ങളാണ്​ അപകട സാധ്യതയുയർത്തുന്നത്. ഇവയിലധികവും കാൻസറിന്​ കാരണമാവും എന്ന്​ കണ്ടെത്തിയ രാസവസ്തുക്കളാണ്​.

ചർമത്തിലൂടെ ഇത്തരം രാസവസ്തുക്കൾ ശരീരത്തിൽ പ്രവേശിച്ച്​ കാലക്രമേണ ‘കഴല’കൾ എന്ന്​ വിളിക്കുന്ന ലിംഫ് ഗ്രന്ഥികളിലും (lymph glands) മറ്റ് അവയവങ്ങളിലും അടിഞ്ഞുകൂടുകയും കാൻസർ ഉൾപ്പെടെയുള്ള ദീർഘകാല ആരോഗ്യപ്രശ്നങ്ങൾക്ക് കാരണമാവുകയും ചെയ്യും.

ടാറ്റൂകളെ കാൻസറുമായി ബന്ധിപ്പിക്കുന്ന നേരിട്ടുള്ള തെളിവുകൾ താരതമ്യേന പരിമിതമാണെങ്കിലും തൊലിപ്പുറത്ത്​ കണ്ടുവരുന്ന മെലനോമ (Melanoma), സ്ക്വാമസ് സെൽ കാർസിനോമ (Squamous cell carcinoma), ബേസൽ സെൽ കാർസിനോമ (Basal cell carcinoma) തുടങ്ങിയ കാൻസറുകൾ നിരവധി​ പേരിൽ കണ്ടെത്തിയിട്ടുണ്ട്. ഇതിന്​ പുറമെയാണ്​ ടാറ്റൂ ചെയ്യാൻ ഉപയോഗിക്കുന്ന ഉപകരണങ്ങൾ അണുമുക്തമാക്കാത്തപക്ഷം ഹെപ്പറ്റൈറ്റിസ്​- സി വരാനുള്ള സാധ്യത.

ഹെപ്പറ്റൈറ്റിസ്​- സി രോഗികളിൽ ചെറുതല്ലാത്ത ശതമാനം പേരിൽ ‘ലിം​േഫാമ’ എന്ന കാൻസർ കണ്ടുവരുന്നുണ്ട്​ എന്നതും ​ഗൗരവതരമാണ്. ഇത്തരം പഠനങ്ങളുടെ വെളിച്ചത്തിൽ ‘ടാറ്റൂ’ എന്ന ഫാഷനെ നമ്മുടെ ജീവിതത്തിൽനിന്ന്​ അകറ്റിനിർത്തുകതന്നെ വേണം.