തൃശൂർ: തൃശൂർ നഗരസഭയുടെ പ്രഥമ വനിത ചെയർപേഴ്സൻ സെലിൻ ജോസഫ് കാക്കശേരി (89) നിര്യാതയായി. വാർധക്യസഹജമായ അസുഖങ്ങളെ തുടർന്ന് എറണാകുളത്ത് മകളുടെ വീട്ടിൽ വിശ്രമത്തിലായിരുന്നു. തൃശൂർ താഞ്ചൻ കുടുംബാംഗമാണ്. മൃതദേഹം തൃശൂർ മിഷൻ ക്വാർട്ടേഴ്സിലെ വീട്ടിലെത്തിച്ച് ശനിയാഴ്ച രാവിലെ 10ന് പുത്തൻപള്ളി ബസലിക്കയിൽ സംസ്കരിക്കും. ഭർത്താവ്: പരേതനായ റിട്ട. ഹെഡ്മാസ്റ്റർ ജോസഫ് കാക്കശേരി. മക്കൾ: മറിയാമ്മ, ടെസി, ആലീസ്, പരേതനായ ചാക്കുണ്ണി. മരുമക്കൾ: ജോസഫ് ഫിലിപ്പ്, അന്തോണി കാവാലപ്പറമ്പിൽ, സുനിത, ഡെയ്സൺ ചാണ്ടി (മുംബൈ). 1985 -2000 കാലഘട്ടത്തിൽ തൃശൂർ നഗരസഭ കൗൺസിലറും 1991 -’94ൽ വൈസ് ചെയർപേഴ്സനും 1995- ’98ൽ ചെയർപേഴ്സനുമായിരുന്നു. തൃശൂർ കാത്തലിക് വിമൻസ് അസോസിയേഷൻ, സെൽമം സർവിസ് സെൻറർ, അതിരൂപത കുടുംബ കൂട്ടായ്മ, ചെന്നായ്പാറയിലെ ആകാശപ്പറവകൾ അഗതി കേന്ദ്രം, പുത്തൻപള്ളി സോഷ്യൽ സർവിസ് സൊസൈറ്റി, ഹെൽത്ത് കെയർ സൊസൈറ്റി, തൃശൂർ അതിരൂപത അൽമായ രൂപ പ്രസ്ഥാനമായ കാത്തലിക് യൂനിയൻ സ്ഥാപക നേതാവും തൃശൂർ പാസ്റ്ററൽ കൗൺസിൽ അംഗവുമാണ്. ഇന്ത്യയിലും പുറത്തും ധാരാളം യാത്രകള്‍ നടത്തുകയും ‘എെൻറ അമേരിക്കന്‍ യാത്ര’ എന്ന പുസ്തകം എഴുതുകയും ചെയ്തിട്ടുണ്ട്.
