പെലയക്കുരിശ് -കവിത

അപ്പൻ ചത്തു

ആറടിമണ്ണു തേടി

മകൾ ജെസി പള്ളിമേടയിലേക്കോടി

ആരാ മരിച്ചേ..?

എ​ന്റെയപ്പൻ

പേര്..?

വറീത്.

ഏതാ കുടുംബം..?

എ.കെ.ജി കോളനിയിലെ നാലാമത്തെ വീട്

ഹാ... വറീത്

വറീത് പെലേൻ മാർക്കംകൂടിയതല്ലേ.

ഇത് ഇവിടെയല്ലല്ലോ പെലക്കൊച്ചേ...

ഹ... ഹ...

ഇടിവെട്ട്

മഴ

പിന്നെയും മഴ...

വറീതി​ന്റെ ശവം

ഇടപ്പള്ളി വ്യാഴാഴ്ച ചന്തയിലേക്കെടുത്തു

കത്തിക്കും മുമ്പേ

കഴുത്തിൽനിന്നുമാ

പെലക്കുരിശ് എടുത്തു മാറ്റി

ജെസി പറഞ്ഞു

വിശന്ന വയറുകൾക്ക് നിങ്ങൾ കൊടുത്ത

കമ്പപ്പൊടിക്ക്

മതത്തി​ന്റെ മണമുണ്ടെന്ന് അറിഞ്ഞില്ലാ

മരക്കുരിശേ...