ഗന്ധരാജന്‍പൂക്കളുടെ മറുമൊഴി
വെളുപ്പാന്‍ കാലത്ത് പ്രതീക്ഷകളെ പെറ്റുകൂട്ടുന്ന ചൂളംവിളിയാണ് അകന്നുപോകുന്ന തീവണ്ടിക്ക് ചോറും തോരനും മീന്‍വറുത്തതും ചമ്മന്തിയും ബാഗിനുള്ളില്‍ ഓരോരോ കവിതകളാകും ബാല്യത്തിലൊരിക്കല്‍ കണ്ട മെറൂണ്‍ നിക്കറിന്‍റെയും ചന്ദനക്കളറുടുപ്പിന്‍റെയും കളങ്കമില്ലാക്കളറാണ് കമ്പാര്‍ട്ടുമെന്‍റുകള്‍ക്ക് പത്താം ക്ലാസിന്‍റെ തലപുകയും പുസ്തകത്താളുകളാകെ പകല്‍ക്കിനാത്തുമ്പികള്‍ പാറുന്നതിന്‍റെ മൂളക്കമായിരുന്നു വെയിലേറടിക്കുന്ന തീവണ്ടിച്ചില്ലുകളില്‍ അവളുടെ നിറമിഴികളും വെളുപ്പില്‍ കറുത്ത...
Your Subscription Supports Independent Journalism
View Plans- Unlimited access to Madhyamam Weekly Articles and Archives ........
- Experience ‘Ad Free’ article pages
വെളുപ്പാന്‍ കാലത്ത്
പ്രതീക്ഷകളെ പെറ്റുകൂട്ടുന്ന
ചൂളംവിളിയാണ്
അകന്നുപോകുന്ന
തീവണ്ടിക്ക്
ചോറും തോരനും
മീന്‍വറുത്തതും
ചമ്മന്തിയും
ബാഗിനുള്ളില്‍
ഓരോരോ കവിതകളാകും
ബാല്യത്തിലൊരിക്കല്‍
കണ്ട മെറൂണ്‍ നിക്കറിന്‍റെയും
ചന്ദനക്കളറുടുപ്പിന്‍റെയും
കളങ്കമില്ലാക്കളറാണ്
കമ്പാര്‍ട്ടുമെന്‍റുകള്‍ക്ക്
പത്താം ക്ലാസിന്‍റെ
തലപുകയും
പുസ്തകത്താളുകളാകെ
പകല്‍ക്കിനാത്തുമ്പികള്‍
പാറുന്നതിന്‍റെ
മൂളക്കമായിരുന്നു
വെയിലേറടിക്കുന്ന
തീവണ്ടിച്ചില്ലുകളില്‍
അവളുടെ നിറമിഴികളും
വെളുപ്പില്‍ കറുത്ത
പൂക്കളുമായൊരു സാരി
അയാള്‍ക്കായി
കൂട്ടുകൂടും
അപ്പോഴണയുന്ന
ഇരുട്ടിലയാള്‍
അവളെ
ചേര്‍ത്തുപിടിക്കും
കവിളുകളില്‍
കുറേയുമ്മകള്‍
വരച്ചുചേര്‍ക്കും
അകന്നുപോയൊരാ
തീവണ്ടിയൊച്ചകളില്‍
അവളുടെ കഴുത്തിലിട്ട
സ്നേഹത്തിലയാള്‍
കണ്ണീരിന്റെ തേരോടിക്കും
കണ്ണിലും മനസ്സിലും
ഒരുവളെ നിനച്ചയാള്‍
രാപ്പകലുകളോട് വ്യസനം
പങ്കിട്ട് വിരഹത്തിന്‍റെ
കടലാസുതോണികളെ
കത്തുന്ന പുഴകളിലേക്ക്
പറത്തിവിടും
ജന്മാന്തരങ്ങളിലെന്നോ
കണ്ടുമുട്ടാമെന്നൊരു
വാക്കുതേടി
അലഞ്ഞോടുന്ന
തീവണ്ടിയൊച്ചകളില്‍
ഗന്ധരാജന്‍പൂക്കളുടെ
മറുമൊഴിക്കായയാള്‍
കാതോര്‍ത്തിരിക്കവെ
ഭൂമിയിലൊരിടത്തവള്‍
എഴുതിത്തീര്‍ക്കേണ്ട
വരികളിലെ ഉപ്പും എരിവും
പുളിയും മധുരവും
തൊട്ടുതെറിക്കാത്ത
അടുപ്പിന്‍ ചൂടിനകത്ത്
കാല്‍വെള്ളയിലെന്നപോലെ
അവന്‍റെ പേരെഴുതുകയായിരിക്കും
പ്രണയത്തിന്‍റെ
ഓർമകള്‍ക്ക്
സങ്കടത്തിന്‍റെ മാറാപ്പും
തണുത്തുറഞ്ഞ അത്താഴവും
കാവലാകെ,
ഒരിക്കലും
ഒന്നുചേരാത്ത
എവിടെയുമെത്താത്ത
റയില്‍പാളങ്ങളില്‍
ഗന്ധരാജന്‍ പൂക്കളുടെ
മണമൊഴുകിക്കൊണ്ടേയിരുന്നു.
