പത്മനാഭം

മലയാള കഥയിൽ തലയെടുപ്പി​ന്റെ ആൾരൂപമാണ്​ ടി. പത്മനാഭൻ. ആരെയും കൂസാതെ, വരുംവരായ്​കകളെപ്പറ്റി ചിന്തിക്കാതെ ത​ന്റെ അഭിപ്രായങ്ങളും നിലപാടുകളും വെട്ടിത്തുറന്നു പറഞ്ഞ്​ എന്നും ധിക്കാരിയായി അദ്ദേഹം നിലകൊണ്ടു. വിമർശനങ്ങളിൽ പതറിയില്ല; മറിച്ച്​ അദ്ദേഹം വിമർശിച്ചവർ നിന്നു വിറച്ചു; ചൂളി.

ഒരുപിടി നല്ല കഥകൾകൊണ്ട്​ ടി. പത്മനാഭൻ സ്വയം നേടിയെടുത്തതാണ്​ മലയാള സാഹിത്യത്തി​ന്റെ ഒന്നാംനിര​. അവിടെ വാഴ്ത്തച്ഛൻമാർ അദ്ദേഹത്തിനുണ്ടായിരുന്നില്ല. സ്വയം വലിച്ചിട്ട കസേരയിലാണ്​ ടി. പത്മനാഭൻ ഇരുന്നത്​. കഥകളിലെന്നപോലെ ജീവിതത്തിലും നിഷേധിക്കാനാവാത്ത സ്​നേഹമാണ്​, സത്യസന്ധതയാണ്​ ടി. പത്മനാഭൻ. നിങ്ങൾക്ക്​ അദ്ദേഹത്തോട്​ പലതരത്തിൽ വിയോജിക്കാം. പക്ഷേ, അതിനപ്പുറം വ്യക്തിയെന്ന നിലയിൽ, എഴുത്തുകാരനെന്ന നിലയിൽ ടി. പത്മനാഭന്​ ഒപ്പമുള്ള വേറിട്ട സവിശേഷതകളെ നിഷേധിക്കാൻ നിങ്ങൾക്കാവില്ല. സ്​നേഹത്തെയും സത്യസന്ധതയെയും വിലമതിക്കാതെ നിങ്ങൾക്ക്​ വിമർശനംപോലും സാധ്യമാവില്ല.

എന്നും മാധ്യമം ആഴ്​ചപ്പതിപ്പി​ന്റെ അഭ്യുദയകാംക്ഷിയും നല്ല സുഹൃത്തുമാണ്​ ടി. പത്മനാഭൻ. ആഴ്​ചപ്പതിപ്പി​ന്റെ തുടക്കനാളിൽതന്നെ അദ്ദേഹം ഒപ്പം നിന്നു; സഹകരിച്ചു. നിശിതവിമർശനത്തിലെ ഒരു വാക്കുപോലും വെട്ടിമാറ്റാതെ അച്ചടിച്ചത്​ അദ്ദേഹത്തെയും വിസ്​മയിപ്പിച്ചിട്ടുണ്ടാകും. അത്​ അദ്ദേഹം തന്നെ എഴുതിയിട്ടുമുണ്ട്. സ്​നേഹത്തി​ന്റെ നിമിഷങ്ങൾപോലെ തന്നെ ആഴ്​ചപ്പതിപ്പുമായി അദ്ദേഹം കലഹിച്ചു, വിമർശിച്ചു, നിർദേശങ്ങൾ നൽകി മുന്നേ നടന്നു. ഞങ്ങൾ ഒരിക്കലും അച്ചടക്കമുള്ള നല്ല കുട്ടികളായിരുന്നില്ല. വിമർശനത്തിന്റെ നാവുകൾ ഞങ്ങൾക്കും മൂടിവെ​ക്കാനാവുമായിരുന്നില്ല. അതെന്തായാലും നല്ല സുഹൃത്തുക്കളായിരുന്നു ഞങ്ങൾ എക്കാലവും.

മാധ്യമം ആഴ്​ചപ്പതിപ്പി​ന്റെ 25ാം വാർഷികം കോഴിക്കോട്​ സംഘടിപ്പിച്ചപ്പോൾ അതി​ന്റെ മുഖ്യാതിഥിയായിരുന്നു പത്മനാഭൻ. തിരുവനന്തപുരത്ത്​ മാധ്യമം ബുക്​സി​ന്റെ ഉദ്​ഘാടനം നടന്നപ്പോൾ ശാരീരികാവസ്​ഥകളെ മറന്നും അവിടെയും അദ്ദേഹം എത്തി.

ഒൗദ്യോഗിക രേഖകൾ പ്രകാരം ടി. പത്മനാഭന്​ ഫെബ്രുവരിയിൽ 95 തികഞ്ഞു. എന്നാൽ, ത​ന്റെ ജന്മദിനം കഴിഞ്ഞ നവംബറിലാണെന്നും ഇപ്പോൾ 96ന്റെ മധ്യത്തിലാണെന്നും അദ്ദേഹം പറയു​ന്നു. എഴുത്തി​ന്റെ ഏഴര പതിറ്റാണ്ടും അദ്ദേഹം പിന്നിട്ടിരിക്കുന്നു. കൃത്യമായി പറഞ്ഞാൽ ഇത്​ 77ാം വർഷം.

ടി. പത്മനാഭ​ന്​ 90 തികഞ്ഞപ്പോൾ ആഴ്​ചപ്പതിപ്പ്​ പ്രത്യേക പതിപ്പ്​ ഇറക്കിയത്​ വായനക്കാർ ഒാർക്കുന്നുണ്ടാകും. അന്ന്​ അനുകരണങ്ങൾ വേറെയുമുണ്ടായി. ഇത്​ ആ പതിപ്പിന്റെ മറ്റൊരു തരം തുടർച്ചയാണ്​. അന്നത്തെപ്പോലെ ഇൗ പതിപ്പിലും അദ്ദേഹം കഥ തന്നു –‘കൊച്ചനിയത്തി’. 96ാം വയസ്സിലും നല്ല അക്ഷരങ്ങളിൽ കഥയെഴുതുന്ന മറ്റൊരാൾ മലയാളത്തിൽ ഇല്ലെന്നും അറിയുക. അതാണ്​ ടി. പത്മനാഭനെ വേറിട്ടുനിർത്തുന്നതും.

​ ആഴ്​ചപ്പതി​പ്പിന്​ ടി. പത്മനാഭനോടുള്ള ആദരവാണ്​ ഇൗ പതിപ്പ്​ –സ്​നേഹത്തി​ന്റെ മറ്റൊരു പൂച്ചെണ്ട്​. സദയം സ്വീകരിക്കുക.