മ​ക്കം അ​ടു​ത്ത മി​സ്‌​റി​ല്‍ ബീ​ക്കു​ഞ്ഞി​യും ബാ​രി​ക്കേ​ഡും മു​ഖാ​മു​ഖ​മി​രി​ക്കു​ന്നു

ല​ക്ഷ​ദ്വീ​പി​​ന്റെ ച​രി​ത്ര​ത്തി​ലേ​ക്കും വ​ർ​ത്ത​മാ​ന​ത്തി​ലേ​ക്കും ക​പ്പ​ൽ​യാ​ത്ര ന​ട​ത്തു​ക​യാ​ണ്​ മ​ല​യാ​ള​ത്തി​ലെ പ്ര​മു​ഖ​നാ​യ സ​ഞ്ചാ​ര​സാ​ഹി​ത്യ​കാ​ര​ൻ. ദ്വീ​പി​​ന്റെ സം​സ്​​കാ​ര​വും ജീ​വി​ത​വും അ​ട​യാ​ള​പ്പെ​ടു​ത്തു​ന്നു ഇൗ ​യാ​ത്ര.

ക​ൽ​പി​ട്ടി​യി​ല്‍ പോ​വു​ക, ബീ​ക്കു​ഞ്ഞി​പ്പാ​റ കാ​ണു​ക, അ​വി​ടെ കു​റ​ച്ച​ധി​കം സ​മ​യം ചെ​ല​വ​ഴി​ക്കു​ക –ല​ക്ഷ​ദ്വീ​പ്‌ യാ​ത്ര​യു​ടെ പ്ര​ധാ​ന ല​ക്ഷ്യം ഇ​താ​യി​രു​ന്നു. അ​ഗ​ത്തി​യി​ല്‍നി​ന്നും അ​ൽ​പം അ​ക​ലെ​യു​ള്ള ജ​ന​വാ​സ​മി​ല്ലാ​ത്ത ക​ൽ​പി​ട്ടി ദ്വീ​പി​ലേ​ക്ക്‌ മോ​ട്ടോ​ര്‍ ഘ​ടി​പ്പി​ച്ച തോ​ണി​യി​ലാ​യി​രു​ന്നു യാ​ത്ര. ക​ട​ല്‍ ചി​ല​പ്പോ​ള്‍ വ​ന്‍ തി​ര​മാ​ല​ക​ളു​യ​ര്‍ത്തി ഞ​ങ്ങ​ളെ ന​ന​ച്ചു, കു​ളി​പ്പി​ച്ചു. ദ്വീ​പി​ല്‍ അ​ഡ്‌​മി​നി​സ്ട്രേ​റ്റ​റു​ടെ പ​ല ‘വി​ക​സന' പ​ദ്ധ​തി​ക​ള്‍ക്കു​മെ​തി​രെ വ​ലി​യ ജ​ന​കീ​യ പ്ര​ക്ഷോ​ഭ​ങ്ങ​ള്‍ ന​ട​ന്നി​രു​ന്നു. ദ്വീ​പു​വാ​സി​ക​ളെ ഏ​തെ​ങ്കി​ലും നി​ല​യി​ല്‍ കു​ടി​യി​റ​ക്കാ​നു​ള്ള ശ്ര​മ​ങ്ങ​ളാ​ണ് തു​ട​രു​ന്ന​ത്. ഏ​റ്റ​വും പു​തി​യ വാ​ര്‍ത്ത ബി​ത്ര ദ്വീ​പി​ലെ മു​ഴു​വ​ന്‍ ജ​ന​ങ്ങ​ളെ​യും കു​ടി​യി​റ​ക്കാ​നു​ള്ള നീ​ക്ക​ങ്ങ​ള്‍ ആ​രം​ഭി​ച്ചു എ​ന്ന​താ​ണ്. രാ​ജ്യ​സു​ര​ക്ഷ​യു​ടെ പ്രാ​ധാ​ന്യം പ​റ​ഞ്ഞാ​ണ് കു​ടിയൊഴി​പ്പി​ക്ക​ലി​നു​ള്ള ശ്ര​മ​ങ്ങ​ള്‍ ന​ട​ക്കു​ന്ന​ത്. ബി​ത്ര ദ്വീ​പി​ലെ എ​ല്ലാ കു​ടും​ബ​ങ്ങ​ള്‍ക്കും കു​ടി​യി​റ​ക്ക​ത്തി​നു​ള്ള നോ​ട്ടീ​സ് ന​ല്‍കി​ക്ക​ഴി​ഞ്ഞു. കേ​ന്ദ്ര സ​ര്‍ക്കാ​ര്‍ അ​ധി​നി​വേ​ശ​ത്തി​ന്‍റെ ഇ​ക്കാ​ല​ത്ത്‌ ദ്വീ​പി​ല്‍ പോ​കു​മ്പോ​ള്‍ ബീ​ക്കു​ഞ്ഞി​പ്പാ​റ​യും അ​വ​രെ​ക്കു​റി​ച്ചു​ള്ള ആ​ഖ്യാ​ന​ങ്ങ​ളും ഒ​രു സ​ഞ്ചാ​രി​ക്ക്‌ ഒ​ഴി​വാ​ക്കാ​നാ​കി​ല്ല. അ​തു കൊ​ണ്ടാ​ണ് അ​വി​ടം പോ​ക​ണം എ​ന്ന തോ​ന്ന​ല്‍ ശ​ക്ത​മാ​യ​ത്.

ബീ​ക്കു​ഞ്ഞി​യെ​ക്കു​റി​ച്ച്‌ മൂ​ന്ന്‌ ആ​ഖ്യാ​ന​ങ്ങ​ളാ​ണ് കേ​ള്‍ക്കാ​നാ​വു​ക. ദ്വീ​പി​ല്‍ അ​ധി​നി​വേ​ശം ന​ട​ത്തി​യ ഒ​രു ശ​ക്തി​യി​ല്‍നി​ന്നും ര​ക്ഷ​പ്പെ​ടാ​ന്‍ 13 വ​യ​സ്സു​കാ​രി​യാ​യ ബീ​ക്കു​ഞ്ഞി ക​ല്‍പി​ട്ടി​യി​ലേ​ക്ക്‌ പ​ലാ​യ​നം ചെ​യ്തു. ഒ​റ്റ​ക്ക്‌ ആ​ഴ്ച​ക​ളോ​ളം അ​വി​ടെ ജീ​വി​ച്ചു. പി​ന്നീ​ട് തി​രി​ച്ചു​വ​ന്ന്‌ അ​തി​ജീ​വി​ച്ചു. ആ​രു​മി​ല്ലാ​ത്ത ദ്വീ​പി​ല്‍ ഒ​റ്റ​ക്കു താ​മ​സി​ച്ച ബീ​ക്കു​ഞ്ഞി മ​രു​മ​ക്ക​ത്താ​യ​ത്തി​ന്‍റെ സ​ന്ത​തി കൂ​ടി​യാ​യ​തു​കൊ​ണ്ടാ​കാം ഇ​ത്ര​യും ധൈ​ര്യ​വ​തി​യാ​യ​ത്. ത​ന്‍റെ മാ​നം അ​ധി​നി​വേ​ശ ശ​ക്തി​ക​ള്‍ പി​ച്ചി​ച്ചീ​ന്തു​മെ​ന്നു വ​ന്ന​പ്പോ​ള്‍ ബീ​ക്കു​ഞ്ഞി പ​ലാ​യ​നം ചെ​യ്യു​ക​യാ​യി​രു​ന്നു.

ബീ​ക്കു​ഞ്ഞി സം​ഭ​വം ന​ട​ന്ന​ത് എ​ന്നാ​ണ്? മൂ​ന്ന്‌ ആ​ഖ്യാ​ന​ങ്ങ​ളാ​ണ് ഇ​തി​നു​ള്ള മ​റു​പ​ടി​യാ​യി ദ്വീ​പി​ല്‍നി​ന്നും കി​ട്ടു​ക. ആ​ദ്യ​ത്തേ​ത് പോ​ർ​ചു​ഗീ​സ് കാ​ല​ത്താ​ണ് സം​ഭ​വം ന​ട​ന്ന​ത് എ​ന്ന​താ​ണ്. ര​ണ്ടാ​മ​ത്തേ​ത് അ​റ​ക്ക​ല്‍ രാ​ജ​വം​ശ​ത്തി​ന്‍റെ കാ​ല​ത്താ​യി​രു​ന്നു അ​തി​ജീ​വ​ന​ത്തി​നാ​യു​ള്ള ഓ​ടി​പ്പോ​ക​ല്‍ എ​ന്നാ​ണ്. മൂ​ന്നാ​മ​ത്തേ​ത് ബ്രി​ട്ടീ​ഷ് കോ​ള​നി കാ​ല​ത്താ​ണ് ബാ​ലി​ക​യു​ടെ പ​ലാ​യ​നം ഉ​ണ്ടാ​യ​ത് എ​ന്നു​മാ​ണ്. പോ​ർ​ചു​ഗീ​സ്, ബ്രി​ട്ടീ​ഷ് കാ​ല​ങ്ങ​ളെ പ​രാ​മ​ര്‍ശി​ക്കു​ന്ന ഒ​രു ക​വി​ത​യും നോ​വ​ലും ല​ക്ഷ​ദ്വീ​പി​ല്‍നി​ന്നും പു​റ​ത്തു​വ​ന്നി​ട്ടു​ണ്ട്‌. (അ​ലി​ക്കു​ട്ടി ബീ​രാ​ഞ്ചി​റ​യാ​ണ് ഇ​ക്കാ​ര്യ​ങ്ങ​ള്‍ ശ്ര​ദ്ധ​യി​ല്‍പെ​ടു​ത്തി​യ​ത്). അ​റ​ക്ക​ല്‍ രാ​ജ​വം​ശ​വു​മാ​യി ബ​ന്ധ​പ്പെ​ട്ട ആ​ഖ്യാ​നം ഇ​ന്നും ദ്വീ​പി​ലെ വാ​മൊ​ഴി​യി​ല്‍ ശ​ക്ത​മാ​യി പ്ര​വ​ര്‍ത്തി​ക്കു​ന്നു​മു​ണ്ട്‌.

എ​സ്.​എ​സ്‌.​കെ എ​ഴു​തി​യ ‘ബീ​ക്കു​ഞ്ഞി പാ​റ’ എ​ന്ന ക​വി​ത പോ​ർ​ചു​ഗീ​സ് കോ​ള​നി കാ​ല​ത്തെ പ്ര​മേ​യ​മാ​ക്കി എ​ഴു​തി​യ​താ​ണ്:

കാ​ല​ത്തി​ന്‍ തൂ​വ​ല്‍ കൊ​ഴി​യു​മ്പോ​ള്‍

നാ​രി​മാ​ര്‍ പ​ല​രു​ണ്ടാ​യി

പാ​റ​ക​ള്‍ പ​ല​തു​ണ്ടാ​യി

ക​ഥ​ക​ള്‍ ന​ട​ന്നു മ​റ​ഞ്ഞു.

എ​ന്നി​ട്ടും ബീ​ക്കു​ഞ്ഞി

നീ ​മ​രി​ച്ചി​ട്ടി​ല്ല!

പാ​റ​യും ത​ക​ര്‍ന്നി​ട്ടി​ല്ല!

ഗ​ണ്‍ ബൂ​ട്ടി​ന്‍ ശ​ബ്ദം കേ​ട്ടും

കാ​മം ക​ത്തും ക​ണ്ണു​ക​ള്‍ ക​ണ്ടും

ഞെ​ട്ടാ​തെ പ​ത​റാ​തെ

തോ​ല്‍പി​ച്ചു നീ ​പ​റ​ങ്കി​മ​ക്ക​ളെ!

അ​റി​യു​മോ ഇ​ന്ന്‌ നീ​യാ​രെ​ന്ന്‌

ത​ല​മു​റ ക​ണ്ണി​ക​ളി​ല്‍

ഒ​രു മാ​തൃ​ക പെ​ണ്ണ്‌

അ​ഭി​മാ​ന​മേ​കും പെ​ണ്ണ്‌

ധൈ​ര്യം പ​ക​രും പെ​ണ്ണ്‌

ബീ​ക്കു​ഞ്ഞീ

നീ ​മ​രി​ച്ചി​ട്ടി​ല്ല

പാ​റ​യും ത​ക​ര്‍ന്നി​ട്ടി​ല്ല

നീ​യ​ന്നു കാ​ത്ത മാ​നം

നി​ന്നെ കാ​ത്ത പാ​റ

കു​യി താ​ളം മു​ട്ടു​ന്നു

കു​ലീ​ന​യാം പെ​ണ്ണാ​യും

ധീ​ര​നാം ആ​ണാ​യും

ത​ല​മു​റ​ക​ളി​ലാ​രോ

വി​ള​ക്കി​ച്ചേ​ര്‍ത്തു നി​ങ്ങ​ളെ

ജീ​വി​ക്കു​ന്നൂ നി​ങ്ങ​ളൊ​ന്നാ​യി

മ​ര്‍ത്ത്യ​മാ​ന​സ​ങ്ങ​ളി​ല്‍

ഉ​ള്‍പ്പു​ള​ക​മാ​യ് ആ​വേ​ശ​മാ​യ്.

ബീ​ക്കു​ഞ്ഞീ

നീ ​മ​രി​ച്ചി​ട്ടി​ല്ല!

പാ​റ​യും ത​ക​ര്‍ന്നി​ട്ടി​ല്ല!

ക​വി​ത​യു​ടെ അ​ടി​ക്കു​റി​പ്പ്‌ ഇ​ങ്ങ​നെ വാ​യി​ക്കാം: പോ​ര്‍ചു​ഗീ​സ് ഭ​ര​ണ​കാ​ല​ത്ത് അ​വ​രു​ടെ പീ​ഡ​ന​ത്തി​ല്‍നി​ന്നും ര​ക്ഷ​നേ​ടു​വാ​ന്‍ ക​ട​ല്‍ത്തീ​ര​ത്തെ വി​ജ​ന​മാ​യ പാ​റ​ക്കെ​ട്ടു​ക​ള്‍ക്കു​ള്ളി​ല്‍ ദി​വ​സ​ങ്ങ​ളോ​ളം ഒ​ളി​ച്ചു ക​ഴി​ഞ്ഞു ത​ന്‍റെ മാ​നം കാ​ത്തു​സൂ​ക്ഷി​ച്ച അ​ഗ​ത്തി ദ്വീ​പി​ലെ ഒ​രു സു​ന്ദ​രി. സു​ന്ദ​രി​യാ​യ ആ ​ധീ​ര​വ​നി​ത ഒ​ളി​ച്ചു​ താ​മ​സി​ച്ച പാ​റ​ക്കെ​ട്ട്‌ ഇ​പ്പോ​ഴും അ​റി​യ​പ്പെ​ടു​ന്ന​ത്‌ ബീ​ക്കു​ഞ്ഞി​പ്പാ​റ​യെ​ന്ന പേ​രി​ലാ​ണ്: ബീ​ക്കു​ഞ്ഞി ദ്വീ​പ്‌ സാ​ഹി​ത്യ​ത്തി​ല്‍ അ​ട​യാ​ള​പ്പെ​ടു​ന്ന ഒ​രു സ​ന്ദ​ര്‍ഭ​മാ​ണി​ത്.

ബീ​ക്കു​ഞ്ഞി​യെ​ക്കു​റി​ച്ചു​ള്ള മ​റ്റൊ​രാ​ഖ്യാ​നം വാ​യി​ക്കു​ന്ന​ത്‌ എം. ​മി​ഹ്റാ​ജ് എ​ഴു​തി​യ ‘ആ​മീ​ന്‍’ എ​ന്ന നോ​വ​ലി​ലാ​ണ്‌. ആ ​കൃ​തി​യു​ടെ ഉ​ള്ള​ട​ക്ക​ത്തെ​ക്കു​റി​ച്ച്‌ നോ​വ​ല്‍ ബ്ല​ര്‍ബി​ല്‍ ഇ​ങ്ങ​നെ വാ​യി​ക്കാം: വെ​ള്ള​പ്പ​ട്ടാ​ള​ത്തി​ന്‍റെ ദ​യാ​ര​ഹി​ത​മാ​യ ആ​ക്ര​മ​ണ​ത്തി​ല്‍നി​ന്നും ര​ക്ഷ​പ്പെ​ട്ട ബീ​ക്കു​ഞ്ഞി എ​ന്ന പെ​ണ്‍കു​ട്ടി​യു​ടെ ജീ​വി​ത​ക​ഥ​യി​ലൂ​ടെ ല​ക്ഷ​ദ്വീ​പി​ന്‍റെ ച​രി​ത്ര​ത്തി​ലേ​ക്കു സ​ഞ്ച​രി​ക്കു​ന്ന നോ​വ​ല്‍: ഈ ​നോ​വ​ലി​ല്‍ ബീ​ക്കു​ഞ്ഞി​യു​ടെ ക​ഥ ന​ട​ക്കു​ന്ന​ത് വെ​ള്ള​പ്പ​ട്ടാ​ള​ത്തി​ന്‍റെ (ബ്രി​ട്ടീ​ഷ്) കാ​ല​ത്താ​ണ്. ആ​ഖ്യാ​ന​ത്തി​ന്‍റെ കാ​ലം എ​സ്.​എ​സ്.​കെ​യു​ടെ ക​വി​ത​യു​ടെ കാ​ല​മ​ല്ല. ദ്വീ​പി​ന്‍റെ പ​ഴ​യ ച​രി​ത്ര​മെ​ടു​ത്ത് പ​രി​ശോ​ധി​ക്കു​മ്പോ​ള്‍ 1498-1650 കാ​ല​ത്തെ പോ​ര്‍ചു​ഗീ​സ് കോ​ള​നി കാ​ല​ത്ത്‌്‌ ന​ട​ത്തി​യ കൊ​ടി​യ ഹിം​സ​യു​ടെ നി​ര​വ​ധി സ​ന്ദ​ര്‍ഭ​ങ്ങ​ള്‍ കാ​ണാം. ബ്രി​ട്ടീ​ഷു​കാ​ര്‍ക്ക്‌ മു​മ്പേ അ​റ​ക്ക​ല്‍ രാ​ജ​വം​ശ​ത്തി​ന്‍റെ അ​ധീ​ന​ത​യി​ലാ​യി​രു​ന്നു ദ്വീ​പ്‌.

വാ​മൊ​ഴി​യി​ല്‍ ബീ​ക്കു​ഞ്ഞി​യു​ടെ ക​ഥ അ​റ​ക്ക​ല്‍ കാ​ല​ത്ത്‌ ന​ട​ന്ന​താ​യി പ​റ​യു​ന്നു. ബീ​ക്കു​ഞ്ഞി​യു​ടെ ജ​ന്മ​ദ്വീ​പെ​ന്ന്‌ വി​ശ്വ​സി​ക്ക​പ്പെ​ടു​ന്ന അ​ഗ​ത്തി​യി​ല്‍ പ​ല ദി​വ​സ​ങ്ങ​ള്‍ ചെ​ല​വി​ട്ട​പ്പോ​ള്‍ അ​റ​ക്ക​ലു​മാ​യി ബ​ന്ധ​പ്പെ​ട്ട ആ​ഖ്യാ​ന​മാ​ണ് കൂ​ടു​ത​ലാ​യി കേ​ള്‍ക്കാ​ന്‍ ക​ഴി​ഞ്ഞ​ത്‌. അ​റ​ക്ക​ല്‍ സൈ​ന്യ​ത്തി​ലെ സ്ത്രീ ​പീ​ഡ​ക​രാ​യ സൈ​നി​ക​രി​ല്‍നി​ന്നും ര​ക്ഷ​തേ​ടു​ക​യാ​ണ് വാ​മൊ​ഴി​ക്ക​ഥ​യി​ല്‍ ബീ​ക്കു​ഞ്ഞി. ടി​പ്പു​വി​ന്‍റെ മ​ല​ബാ​ര്‍ ഭ​ര​ണ​കാ​ല​ത്ത്‌ ദ്വീ​പും ടി​പ്പു​വി​ന്‍റെ സാ​മ്രാ​ജ്യ​ത്തി​ന്‍റെ ഭാ​ഗ​മാ​യി​രു​ന്നു. ദ്വീ​പി​ല്‍ അ​ധി​കാ​രം സ്ഥാ​പി​ക്കാ​നെ​ത്തി​യ എ​ല്ലാ ഭ​ര​ണ​കൂ​ട​ങ്ങ​ളെ​യും പ്ര​തി​രോ​ധി​ക്കു​ന്ന ഒ​രു പ്ര​ധാ​ന മി​ത്താ​യി ബീ​ക്കു​ഞ്ഞി മാ​റി​യി​രി​ക്കു​ന്നു. പ​ലാ​യ​ന​ത്തി​ലൂ​ടെ ഒ​ളി​ച്ചു​നി​ന്ന്‌ സ്വ​ന്തം മാ​ന​​​ത്തെ​യും അ​തു​വ​ഴി രാ​ജ്യ​ത്തി​ന്‍റെ അ​ന്ത​സ്സും ര​ക്ഷി​ക്കാ​ന്‍ ശ്ര​മി​ച്ച ആ ​ദ്വീ​പു​കാ​രി​യെ ഇ​ന്ന്‌ നാം ​എ​ങ്ങ​നെ​യാ​ണ് വാ​യി​ച്ചെ​ടു​ക്കു​ക?

ദ്വീ​പി​നെ, അ​തി​ന്‍റെ മാ​ന​ത്തെ ക​വ​രാ​ന്‍ ശ്ര​മി​ക്കു​ന്ന​വ​ര്‍ ആ​രാ​യാ​ലും ഏ​തു വി​ധേ​ന​യും ചെ​റു​ക്കു​ക എ​ന്ന ആ​ശ​യ​മാ​ണ് ബീ​ക്കു​ഞ്ഞി അ​ന്നും ഇ​ന്നും പ​ങ്കു​വെ​ക്കു​ന്ന​ത്. ദ്വീ​പു​കാ​ര്‍ക്ക്‌ അ​വ​കാ​ശ​പ്പെ​ട്ട സ്വ​യം​ഭ​ര​ണം എ​ന്ന ആ​ശ​യ​മാ​യി ബീ​ക്കു​ഞ്ഞി​യു​ടെ ക​ഥ ഇ​ന്ന്‌ ഒ​രാ​ള്‍ക്ക്‌ വാ​യി​ച്ചെ​ടു​ക്കാ​നാ​വും. ത​ന്‍റെ ശ​രീ​ര​ത്തി​ന്‍റെ സ്വ​യം ഭ​ര​ണ​ത്തി​നാ​യി താ​ല്‍ക്കാ​ലി​ക​മാ​യി പ​ലാ​യ​നം ചെ​യ്‌​ത ബീ​ക്കു​ഞ്ഞി ഇ​ന്നും ഉ​യ​ര്‍ത്തു​ന്ന​ത്‌ സ്വാ​ഭി​മാ​ന​ത്തോ​ടെ​യു​ള്ള ദ്വീ​പി​ലെ സ്വ​യം ഭ​ര​ണം എ​ന്ന ആ​ശ​യ​മാ​ണ്. ഇ​ന്ത്യ​യി​ലെ​വി​ടെ​യും പൈ​തൃ​ക സ​മൂ​ഹ​ങ്ങ​ള്‍ (പ്ര​ധാ​ന​മാ​യും ആ​ദി​വാ​സി സ​മൂ​ഹ​ങ്ങ​ള്‍) സ്വ​യം​ഭ​ര​ണം എ​ന്ന ആ​ശ​യം ഉ​യ​ര്‍ത്തി​പ്പി​ടി​ക്കു​ന്ന​ത്‌ കാ​ണാം. ഫെ​ഡ​റ​ല്‍ സം​വി​ധാ​ന​ത്തെ അം​ഗീ​ക​രി​ച്ചു​കൊ​ണ്ടു​ള്ള ഈ ​സ്വ​യം ഭ​ര​ണ​ത്തെ​ക്കു​റി​ച്ച്‌ ഇ​ന്ത്യ​ന്‍ ഭ​ര​ണ​ഘ​ട​ന ത​ന്നെ സം​സാ​രി​ക്കു​ന്നു​ണ്ട​ല്ലോ. ദ്വീ​പി​ലേ​ക്ക്‌ പു​റ​ത്തു നി​ന്നു​ള്ള​വ​ര്‍ക്ക്‌ പ്ര​വേ​ശി​ക്കാ​ന്‍ പ്ര​ത്യേ​ക പെ​ര്‍മി​റ്റ്‌ നി​ര്‍ബ​ന്ധ​മാ​ണ്. നാ​ഗാ​ലാ​ൻ​ഡി​ല്‍ പോ​യ​പ്പോ​ഴും ഇ​ന്ന​ര്‍ ലൈ​ന്‍ പെ​ര്‍മി​റ്റ്‌ നി​ര്‍ബ​ന്ധി​ത​മാ​യി​രു​ന്നു. ഇ​തു​ത​ന്നെ പൈ​തൃ​ക സ​മൂ​ഹ​ങ്ങ​ള്‍ക്കു​ള്ള പ്രാ​ധാ​ന്യ​ത്തെ വി​ളി​ച്ചോ​തു​ന്ന​താ​ണ്.

ബീ​ക്കു​ഞ്ഞി ആ​ഴ്ച​ക​ള്‍ നീ​ണ്ട ഒ​റ്റ​ക്കു​ള്ള പ​ലാ​യ​ന​ത്തി​നും ഒ​ളി​ച്ചു താ​മ​സ​ത്തി​നും ശേ​ഷം താ​ന​ട​ക്ക​മു​ള്ള ദ്വീ​പു​കാ​ര്‍ക്ക്‌ സ്വ​യം​ഭ​ര​ണ​മു​ണ്ടെ​ന്ന് വി​ശ്വ​സി​ക്കു​ന്ന അ​ഗ​ത്തി​യി​ലേ​ക്ക്‌ തി​രി​ച്ചു വ​രു​ന്ന​താ​ണ് ഈ ​മി​ത്തി​ലെ ക​ഥ. ഇ​ന്ന്‌ കേ​ന്ദ്ര​ഭ​ര​ണം പ​ല വി​ധ​ത്തി​ല്‍ ദ്വീ​പി​ല്‍ അ​ധി​നി​വേ​ശം ന​ട​ത്തു​ന്നു. ബാ​ങ്കാ​രം ദ്വീ​പ്‌ പൂ​ർ​ണ​മാ​യും സ്വ​കാ​ര്യ​വ​ത്ക​രി​ക്കാ​നു​ള്ള ശ്ര​മ​മാ​ണ് ന​ട​ക്കു​ന്ന​ത്. അ​വി​ടെ റി​സോ​ര്‍ട്ടു​ക​ളു​ടെ പ​ണി പു​രോ​ഗ​മി​ക്കു​ന്നു. ഞാ​ന്‍ പ​ല രീ​തി​യി​ലും ശ്ര​മി​ച്ചെ​ങ്കി​ലും ബ​ങ്കാ​ര​ത്തേ​ക്ക്‌ പ്ര​വേ​ശ​നാ​നു​മ​തി നേ​ടാ​ന്‍ ക​ഴി​ഞ്ഞി​ല്ല. ഒ​ന്ന​ര വ​ര്‍ഷ​ത്തി​ല​ധി​ക​മാ​യി ദ്വീ​പു​കാ​ര്‍ക്കും അ​വി​ടേ​ക്ക്‌ പോ​കാ​ന്‍ അ​നു​മ​തി​യി​ല്ല.

ബീ​ക്കു​ഞ്ഞി​പ്പാ​റ​യി​ല്‍ നി​ല്‍ക്കു​മ്പോ​ള്‍ ഒ​രു മി​ത്ത്‌ എ​ങ്ങ​നെ സ​മ​കാ​ല ജീ​വി​ത​ത്തെ വ്യാ​ഖ്യാ​നി​ക്കു​ന്നു എ​ന്നോ​ര്‍ത്തു. ബീ​ക്കു​ഞ്ഞി​പ്പാ​റ​യു​ടെ ന​ടു​വി​ല്‍ ഉ​ള്ളി​ലേ​ക്കി​റ​ങ്ങാ​ന്‍ പാ​ക​ത്തി​ലു​ള്ള ഒ​രു വി​ട​വു​ണ്ട്‌. അ​തി​ലൂ​ടെ ഇ​ന്നും ഒ​രാ​ള്‍ക്ക്‌ പാ​റ​യു​ടെ ഉ​ള്ളി​ലേ​ക്ക്‌ പ്ര​വേ​ശി​ക്കാം. പാ​റ​യും അ​തി​നെ​ച്ചു​റ്റി​പ്പ​റ്റി​യു​ള്ള ക​ഥ​ക​ളും ഇ​ന്ന്‌ പു​തി​യ അ​ധി​നി​വേ​ശ​ങ്ങ​ളെ നേ​രി​ടാ​നു​ള്ള പ്രാ​യോ​ഗി​ക​ത​യി​ലേ​ക്ക്‌ ദ്വീ​പു​കാ​രെ ന​യി​ക്കു​ന്ന​താ​യി പ​ല​രു​മാ​യും സം​സാ​രി​ക്കു​മ്പോ​ള്‍ തോ​ന്നി. എ​ന്നാ​ല്‍ പ​ലാ​യ​ന​മോ ഒ​ളി​ച്ചി​രി​പ്പോ അ​ല്ല സ്വ​യം​ഭ​ര​ണം എ​ന്ന ആ​ശ​യം എ​ങ്ങ​നെ​യാ​ണ് ഉ​യ​ര്‍ത്തി​പ്പി​ടി​ക്കേ​ണ്ട​ത്‌ എ​ന്ന ആ​ശ​യ​ത്തി​ലേ​ക്കാ​ണ് ബീ​ക്കു​ഞ്ഞി ഇ​ന്ന്‌ ഇ​ന്ത്യ​ന്‍ പൈ​തൃ​ക സ​മൂ​ഹ​ങ്ങ​ളെ​ത്ത​ന്നെ ന​യി​ക്കു​ന്ന​ത്.

ക​ല്‍പി​ട്ടി​യി​ല്‍ നി​ല്‍ക്കു​മ്പോ​ള്‍ കേ​ട്ട മ​റ്റൊ​രു സം​ഭ​വം ദ്വീ​പി​ലെ ജ​ന​ങ്ങ​ളു​ടെ ഹൃ​ദ​യം ക​വ​ര്‍ന്ന ഒ​രു ഡോ​ക്ട​റു​ടെ മ​ര​ണ​ത്തെ​ക്കു​റി​ച്ചാ​ണ്. സാ​യാ​ഹ്ന​ങ്ങ​ളി​ല്‍ ഒ​റ്റ​ക്ക്‌ ക​ല്‍പി​ട്ടി​യി​ല്‍ വ​ന്നി​രി​ക്കാ​റു​ണ്ടാ​യി​രു​ന്ന ഈ ​ഡോ​ക്ട​ര്‍ വേ​ലി​യേ​റ്റ​ത്തി​ല്‍ കു​ടു​ങ്ങി മ​രി​ക്കു​ക​യാ​യി​രു​ന്നു​വ​ത്രെ. ത​ക​ര്‍ന്ന ഒ​രു ക​പ്പ​ലി​ന്‍റെ ചി​ല അ​വ​ശി​ഷ്ട​ങ്ങ​ളും അ​വി​ടെ ക​ണ്ടു. ഉ​പേ​ക്ഷി​ക്ക​പ്പെ​ട്ട വ​സ്‌​ത്ര​ങ്ങ​ള്‍ ഞാ​ത്തി​യി​ട്ട ഒ​രു വൃ​ക്ഷ​ക്കൊ​മ്പും ക​ണ്ടു. വ​സ്ത്ര​ങ്ങ​ള്‍ ക​ട​ല്‍ക്കാ​റ്റേ​റ്റ്‌ കീ​റി​പ്പ​റി​ഞ്ഞി​ട്ടു​ണ്ട്‌. കീ​റി​പ്പ​റ​ിഞ്ഞ വ​സ്ത്ര​ങ്ങ​ള്‍ ഉ​പേ​ക്ഷി​ക്ക​ലി​ന്‍റെ ക​ഥ​യാ​ണ് പ​റ​യു​ന്ന​ത്. ക​ശു​മാ​വ്‌ പ​ല​യി​ട​ങ്ങ​ളി​ലും വ​ള​ര്‍ന്നു നി​ല്‍ക്കു​ന്നു. വ​ലി​യ പു​ല്ലും വ​ള​ര്‍ന്നു നി​ൽ​പു​ണ്ട്‌. അ​തി​നി​ട​യി​ലൂ​ടെ മ​നു​ഷ്യ​ര്‍ ന​ട​ന്നു ന​ട​ന്നു​ണ്ടാ​ക്കി​യ കാ​ല​ടി​പ്പാ​ത. ക​ട​ലി​ല്‍ ല​ഗൂ​ണി​ല്‍ ഇ​തേ​പോ​ലെ ക​ണ്ട വ​ഴി​ക​ള്‍ മ​ത്സ്യ​ങ്ങ​ള്‍ നീ​ന്തു​ന്ന പാ​ത​ക​ളാ​യി​രു​ന്നു എ​ന്നൊ​രു തോ​ന്ന​ലു​ണ്ടാ​യി. മീ​ന​ടി​പ്പാ​ത​ക​ള്‍ എ​ന്നു വി​ളി​ക്കേ​ണ്ട വ​ഴി​ക​ള്‍. ക​ട​ല്‍പ്പാ​യ​ലു​ക​ളെ വ​ക​ഞ്ഞു മാ​റ്റി മീ​നു​ക​ള്‍ പോ​കു​ന്ന വ​ഴി​ക​ള്‍ക്ക്‌ മ​നു​ഷ്യ​ന്‍റെ കാ​ല​ടി​പ്പാ​ത​ക​ളു​മാ​യി ചി​ല സാ​മ്യ​ങ്ങ​ള്‍ തോ​ന്നി. അ​ങ്ങ​നെ​യാ​ണ് മീ​ന​ടി​പ്പാ​ത എ​ന്ന ഒ​രു വാ​ക്ക്‌ ക​യ​റി വ​ന്ന​ത്. ക​ല്‍പി​ട്ടി​യു​ടെ ഒ​ര​റ്റ​ത്ത്‌ ഇ​ന്ത്യ​ന്‍ റി​പ്പ​ബ്ലി​ക് മി​ഷ​ന്‍റെ സാ​ന്നി​ധ്യം രേ​ഖ​പ്പെ​ടു​ത്തി​യ സ്‌​തൂ​പ​മു​ണ്ട്‌. ല​ക്ഷ​ദ്വീ​പി​ല്‍ കാ​ക്ക​ക​ളി​ല്ല എ​ന്നാ​ണ് പൊ​തു​വെ പ​റ​യാ​റ്. എ​ന്നാ​ല്‍, ക​ൽ​പി​ട്ടി​യി​ല്‍ കാ​ക്ക​ക​ളു​ണ്ട്‌. അ​വ​യെ പു​റ​ത്തു​നി​ന്ന്‌ ഇ​വി​ടെ വ​ന്ന്‌ കൊ​ണ്ടു​വി​ട്ട​താ​ണ് എ​ന്ന്‌ പ​റ​യു​ന്നു. ക​ല്‍പി​ട്ടി​യും ബീ​ക്കു​ഞ്ഞി​പ്പാ​റ​യും വി​ട്ട്‌ അ​ഗ​ത്തി​യി​ലേ​ക്ക്‌ മ​ട​ങ്ങി. അ​പ്പോ​ഴേ​ക്കും രാ​ത്രി ക​ട​ലി​നെ​യും ഞ​ങ്ങ​ളെ​യും പൊ​തി​ഞ്ഞി​രു​ന്നു.

അ​ല്ലി അ​യ്യ​ല്‌ സീ​മ,

ക​പ്പ​ല്‌ ഭാ​ര​ത​സീ​മ

അ​ഗ​ത്തി​യി​ല്‍ ചെ​ന്നി​റ​ങ്ങി​യ ആ​ദ്യ ദി​വ​സം അ​ല​ക്ഷ്യ​മാ​യി ന​ട​ക്കു​മ്പോ​ള്‍ ആ​ദ്യം ക​ണ്ണി​ല്‍പെ​ട്ട​ത് ല​ക്ഷ​ദ്വീ​പ്‌ പൊ​ലീ​സി​ന്‍റെ ബാ​രി​ക്കേ​ഡാ​ണ്‌. വീ​തി​കു​റ​ഞ്ഞ കോ​ണ്‍ക്രീ​റ്റ്‌ റോ​ഡി​നോ​ടു ചേ​ര്‍ന്ന്‌ തെ​ങ്ങി​ന്‍ത​ണ​ലി​ല്‍ വി​ശ്ര​മി​ക്കു​ക​യാ​ണ് ബാ​രി​ക്കേ​ഡ്. 1988ലാ​ണ്‌ ഇ​തി​നു​മു​മ്പ്‌ ദ്വീ​പി​ല്‍ വ​ന്ന​ത്. ക​ട​മ​ത്ത്‌ ദ്വീ​പി​ലേ​ക്കാ​യി​രു​ന്നു അ​ന്ന​ത്തെ യാ​ത്ര. വി​ഖ്യാ​ത ഫോ​ട്ടോ​ഗ്രാ​ഫ​ര്‍ റ​സാ​ക്ക്‌ കോ​ട്ട​ക്ക​ല​ട​ക്ക​മു​ള്ള 13 പേ​ര​ട​ങ്ങി​യ സം​ഘ​ത്തി​ലാ​യി​രു​ന്നു അ​ന്ന​ത്തെ വ​ര​വ്. കോ​ള​ജി​ല്‍ പ​ഠി​ക്കു​ന്ന കാ​ല​മാ​ണ്. അ​ന്നെ​ന്താ​യാ​ലും ഒ​രി​ട​ത്തും പൊ​ലീ​സ് ബാ​രി​ക്കേ​ഡു​ക​ള്‍ ക​ണ്ടി​രു​ന്നി​ല്ല. സു​ര​ക്ഷ​യു​ടെ പേ​രി​ലു​ള്ള ചി​ല മു​ന്‍ക​രു​ത​ലു​ക​ള്‍, അ​തി​ന്‍റെ ഭാ​ഗ​മാ​യി ഈ ​ബാ​രി​ക്കേ​ഡും എ​ന്നൊ​രു തോ​ന്ന​ലു​ണ്ടാ​ക്കു​ക മാ​ത്ര​മാ​ണ് ഇ​പ്പോ​ള്‍ ഈ ​ബാ​രി​ക്കേ​ഡ്‌. പ​ക്ഷേ ന​ട​ന്നു​ക​ഴി​ഞ്ഞ പ്ര​ക്ഷോ​ഭ​ങ്ങ​ളെ​യും ഒ​രുപ​ക്ഷേ ഇ​നി വ​രാ​നു​ള്ള​വ​യെ​യും ഓ​ർ​മി​പ്പി​ച്ചു​കൊ​ണ്ടു ത​ന്നെ​യാ​ണ് ബാ​രി​ക്കേ​ഡ് താ​ല്‍ക്കാ​ലി​ക വി​ശ്ര​മം തു​ട​രു​ന്ന​ത്. ബീ​ക്കു​ഞ്ഞി​പ്പാ​റ പൊ​ലീ​സ് ബാ​രി​ക്കേ​ഡി​ന് മു​ഖാ​മു​ഖം നി​ല്‍ക്കു​ന്ന​താ​യി ക​ല്‍പി​ട്ടി​യി​ല്‍നി​ന്നും രാ​ത്രി​ക്ക​ട​ലി​ല്‍ മ​ട​ങ്ങു​മ്പോ​ള്‍ തോ​ന്നി.

ക​ല്‍പി​ട്ടി​യി​ലേ​ക്ക്‌ പോ​കു​ന്ന തോ​ണി​യി​ലി​രു​ന്ന്‌ ആ​യാ​പ്പ ഒ​രു പാ​ട്ടു പാ​ടി:

‘‘മ​ക്കം അ​ടു​ത്ത മി​സ്‌​റാ​ണ​ാക്ക​ത്തീ

ആ​ദ്യം ക​ല​ങ്ങും ജ​സീ​റാ​ണാ​ക്ക​ത്തി...’’

അ​ങ്ങ​നെ തു​ട​ങ്ങു​ന്ന പാ​ട്ടാ​യി​രു​ന്നു അ​ത്‌. മ​ക്ക​യോ​ട് ഏ​റ്റ​വും അ​ടു​ത്തു കി​ട​ക്കു​ന്ന ദ്വീ​പ്‌ ഏ​തെ​ന്ന് ചോ​ദി​ച്ചാ​ല്‍ ഉ​ത്ത​രം ആ​ക്ക​ത്തി എ​ന്നാ​ണ് (അ​ഗ​ത്തി ഇ​ന്ന​ത്തെ ഉ​ച്ചാ​ര​ണം, ആ​ക്ക​ത്തി ദ്വീ​പ്‌ കോ​ഓപ​റേ​റ്റി​വ് സൊ​സൈ​റ്റി എ​ന്ന ബോ​ര്‍ഡ്‌ ഒ​രുദി​വ​സ​ത്തെ പ്ര​ഭാ​ത ന​ട​ത്ത​ത്തി​നി​ടെ ക​ണ്ടി​രു​ന്നു). അ​താ​യ​ത് മു​സ്‌​ലിം വി​ശ്വാ​സി​ക​ളാ​യ ദ്വീ​പു​കാ​ര്‍ അ​ഗ​ത്തി​ക്ക് ഇ​ങ്ങ​നെ ഒ​രു പ്ര​ാധാ​ന്യം കാ​ണു​ന്നു. ക​വ​ര​ത്തി​യേ​ക്കാ​ളും മ​റ്റേ​ത് ദ്വീ​പി​നേ​ക്കാ​ളും മ​ക്ക​യു​മാ​യി ഏ​റ്റ​വും അ​ടു​ത്തു കി​ട​ക്കു​ന്ന ദ്വീ​പ് അ​ഗ​ത്തി എ​ന്ന​വ​ര്‍ ക​രു​തു​ന്നു. മ​ക്ക​യോ​ട് ഏ​റ്റ​വും അ​ടു​ത്ത് എ​ന്നു പ​റ​യു​മ്പോ​ള്‍ വ​ള​രെ​ച്ചെ​റി​യ ദൂ​രം എ​ന്ന് ക​രു​ത​രു​ത്. മ​ക്ക​യും ദ്വീ​പും ത​മ്മി​ല്‍ വ​ലി​യ ദൂ​ര​മു​ണ്ട്. എ​ങ്കി​ലും ആ ​ദൂ​ര​ത്തി​ല്‍ ഏ​റ്റ​വും അ​ടു​ത്തു കി​ട​ക്കു​ന്ന​ത് എ​ന്ന അ​ര്‍ഥ​ത്തി​ലാ​ണ് അ​ഗ​ത്തി​യെ​ക്കു​റി​ച്ച് ഇ​ങ്ങ​നെ​യൊ​രു പ​രാ​മ​ര്‍ശം. അ​ടു​ത്ത വ​രി പ​റ​യു​ന്ന​ത് മ​ക്ക​യോ​ട് ഏ​റ്റ​വും അ​ടു​ത്ത ഈ ​ദ്വീ​പ് ത​ന്നെ​യാ​ണ് ആ​ദ്യം മു​ങ്ങി ഇ​ല്ലാ​താ​വു​ക എ​ന്നു​മാ​ണ്. വി​ശ്വാ​സ​ത്തി​ന്‍റെ ആ​ദ്യ വ​രി​യും കാ​ലാ​വ​സ്ഥാ വ്യ​തി​യാ​ന​ങ്ങ​ളു​ടെ പ​ശ്ചാ​ത്ത​ല​ത്തി​ല്‍ ര​ണ്ടാം വ​രി​യും യാ​ഥാ​ര്‍ഥ്യ​ങ്ങ​ളു​ടെ ര​ണ്ട​നു​ഭ​വ​ങ്ങ​ള്‍ പ​ക​ര്‍ന്നു ത​ന്നു. ആ​ദ്യം ക​ല​ങ്ങു​ന്ന ജ​സീ​ര്‍ അ​ഗ​ത്തി​യാ​ണെ​ന്ന വി​ശ്വാ​സം ദ്വീ​പ്‌ ജ​ന​ത പ​ങ്കു​വെ​ക്കു​ന്നു.

ഞ​ങ്ങ​ളു​ടെ തോ​ണി​യി​ല്‍ കേ​ര​ള​ത്തി​ലെ കോ​ള​ജി​ല്‍ ബി​രു​ദ പ​ഠ​നം പൂ​ര്‍ത്തി​യാ​ക്കി​യ ശു​ഹൈ​ബ് അ​ക്ത​റു​മു​ണ്ടാ​യി​രു​ന്നു. ദ്വീ​പി​ലെ പു​തി​യ ത​ല​മു​റ​യു​ടെ പാ​ട്ടും കേ​ള്‍ക്ക​ണ​മ​ല്ലോ, ര​ണ്ടു വ​രി പാ​ട്, ഞാ​ന്‍ ശു​ഹൈ​ബി​നെ പ്ര​ചോ​ദി​പ്പി​ച്ചു. അ​യാ​ള്‍ പാ​ടി.

‘‘ബം​ഗാ​രം ദ്വീ​പി​ല് ചു​റ്റി​ക്ക​റ​ങ്ങാ​ന്‍

നീ ​വ​രു​ന്നോ​ടി, ക​പ്പ​ലി​ല്‍

ടൂ​റ​ടി​പ്പാ​ന്‍ നീ ​വ​രു​ന്നോ​ടി

അ​ല്ലി, അ​യ്യ​ല്‌ സീ​മ

ക​പ്പ​ല്‌ ഭാ​ര​ത സീ​മ

അ​ല്ലീ സു​റ​മ​യി​ട്ടോ​ളൂ

അ​ല്ലീ ഫൗ​ഡ​റി​ട്ടോ​ളേ,

ബം​ഗാ​രം ദ്വീ​പി​ല്‌

ടൂ​റ​ടി​ക്കാ​ന്‍ നീ ​വ​രു​ന്നോ​ടി...'’

ഒ​രുപ​ക്ഷേ ദ്വീ​പി​ലെ പു​തു​ത​ല​മു​റ​യു​ടെ പ്ര​ണ​യ സ​ങ്ക​ൽ​പ​ത്തി​ല്‍നി​ന്നും ഉ​രു​വം​കൊ​ണ്ട പാ​ട്ടാ​കാ​മി​ത്‌. ആ​യാ​പ്പ​യു​ടെ​യും ശു​ഹൈ​ബി​ന്റെ​യും പാ​ട്ടു​ക​ള്‍ക്ക്‌ ത​ല​മു​റ​ക​ളു​ടെ ഭാ​വ​ന​ക​ളു​ടെ അ​ന്ത​ര​മു​ണ്ട്‌. പു​ള്ളി​യു​ള്ള ഒ​രു മ​ത്സ്യ​ത്തെ പി​ടി​ക്കാ​ന്‍ പോ​കു​ന്ന​തി​നെ​ക്കു​റി​ച്ചു​ള്ള ഒ​രു പാ​ട്ടും ശു​ഹൈ​ബ്‌ അ​വ​ത​രി​പ്പി​ച്ചു. നു​സെ​ബാ​ല എ​ന്നു തു​ട​ങ്ങു​ന്ന ആ ​പാ​ട്ടി​ലെ വ​രി​ക​ള്‍ ഇ​പ്പോ​ള്‍ ശ​രി​ക്കും ഓ​ര്‍ക്കാ​ന്‍ ക​ഴി​യു​ന്നി​ല്ല.

മ​റ്റൊ​രു ദി​വ​സം ന​ട​ത്ത​ത്തി​നി​ടെ ക​ട​ല്‍ക്ക​ര​യി​ല്‍ ‘മ​ത്സ്യ സ​മ്പ​ത്ത് ഭാ​വി​യി​ലേ​ക്ക്’ എ​ന്നെ​ഴു​തി​യ ടീ​ഷ​ര്‍ട്ട് ധ​രി​ച്ചു നി​ല്‍ക്കു​ന്ന ഹു​സൈ​ന്‍ അ​ലി​യെ ക​ണ്ടു. ടീ ​ഷ​ര്‍ട്ടി​ന്‍റെ പു​റ​കി​ല്‍ ‘ഞാ​ന്‍ ഒ​രു ഉ​ത്ത​ര​വാ​ദി​ത്ത​മു​ള്ള ഫി​ഷ​ര്‍മാ​ന്‍’ എ​ന്നും എ​ഴു​തി​യി​ട്ടു​ണ്ട്. അ​ന്ന് ക​യ​റി​യ ചെ​റി​യൊ​രു ബോ​ട്ടി​ല്‍ ‘ഐ ​ല​വ് ഫി​ഷി​ങ്' എ​ന്നെ​ഴു​തി വെ​ച്ച​തും ക​ണ്ടു. മ​ത്സ്യബ​ന്ധ​നം പ്രോ​ത്സാ​ഹി​പ്പി​ക്കു​ന്ന​തി​ന്‍റെ ഭാ​ഗ​മാ​യു​ള്ള കാ​മ്പ​യി​ന്‍റെ ഭാ​ഗ​മാ​യി​രു​ന്നു ഈ ​ടീ ഷ​ര്‍ട്ട്. അ​തി​രാ​വി​ലെ അ​ഗ​ത്തി​യി​ല്‍ ന​ട​ക്കാ​ന്‍ പോ​കു​മ്പോ​ള്‍ പ​ല​യി​ട​ങ്ങ​ളി​ലും അ​പ്പോ​ള്‍ പി​ടി​ച്ചു​കൊ​ണ്ടു വ​ന്ന ട്യൂ​ണ വി​ല്‍ക്കാ​ന്‍ വെ​ച്ചി​രി​ക്കു​ന്ന​ത് കാ​ണാം. ട്യൂ​ണ​യു​ടെ വാ​ങ്ങ​ലി​ലും വി​ല്‍ക്ക​ലി​ലു​മാ​ണ് ദ്വീ​പി​ന്‍റെ പ്ര​ഭാ​ത ഭേ​രി​ക​ള്‍ തു​ട​ങ്ങു​ന്ന​ത്. സാ​യാ​ഹ്ന​ങ്ങ​ളി​ല്‍ ക​ട​ലി​ല്‍ പോ​കു​ന്ന ബോ​ട്ടു​ക​ള്‍ ട്യൂ​ണ​ക്കൂ​ട്ട​ങ്ങ​ളെ വ​ല​യി​ലാ​ക്കി മ​ട​ങ്ങു​ന്നു. ഇ​ട​ക്ക്‌ ചി​ല ബോ​ട്ടു​ക​ളി​ല്‍ ചൂ​ണ്ട​യെ​റി​ഞ്ഞു നോ​ക്കി​യെ​ങ്കി​ലും ഒ​രു മീ​നും കു​ടു​ങ്ങി​യി​ല്ല. ദ്വീ​പു​കാ​ര്‍ ചൂ​ണ്ട എ​റി​യു​മ്പോ​ഴേ​ക്കും അ​തി​ല്‍ മീ​ന്‍ ക​യ​റു​ക​യും ചെ​യ്യു​ന്നു. ഇ​തെ​ന്ത്‌ മ​റി​മാ​യം എ​ന്ന്‌ ക​രു​തി ക​ട​ലി​ലേ​ക്ക്‌ നോ​ക്കി​യി​രു​ന്നു.

രാ​വി​ലെ​യു​ള്ള ന​ട​ത്ത​ങ്ങ​ളി​ല്‍ പ​ല പ​ള്ളി​പ്പ​റ​മ്പു​ക​ളി​ലാ​യി നി​ര​വ​ധി ഖ​ബ​റു​ക​ള്‍ ക​ണ്ടു. മീ​സാ​ന്‍ ക​ല്ലു​ക​ളു​ള്ള ഖ​ബ​റു​ക​ള്‍. 1988ലെ ​വ​ര​വി​ല്‍ റ​സാ​ക്ക് കോ​ട്ട​ക്ക​ലി​നൊ​പ്പം രാ​ത്രി ക​ട​മ​ത്ത് ദ്വീ​പി​ല്‍ ന​ട​ക്കു​മ്പോ​ള്‍ ഖ​ബ​റു​ക​ള്‍ക്ക​രി​കെ കി​ട​ന്നു​റ​ങ്ങി​യ ഒ​രാ​ളെ ക​ണ്ടി​രു​ന്നു. അ​യാ​ളി​പ്പോ​ഴും ക​ട​മ​ത്തു​ണ്ടാ​യി​രി​ക്കു​മോ? റ​സാ​ക്ക് അ​യാ​ളെ കു​റ​ച്ചു നേ​രം നോ​ക്കി നി​ന്നു. ഫോ​ട്ടോ എ​ടു​ക്കേ​ണ്ട, ന​മു​ക്കീ രം​ഗം കു​റ​ച്ചു നേ​രം വെ​റു​തെ നോ​ക്കി നി​ല്‍ക്കാ​മെ​ന്നും പ​റ​ഞ്ഞു. ത​ന്‍റെ ദ്വീ​പ് യാ​ത്ര​യി​ലെ ഏ​റ്റ​വും ന​ല്ല ഓ​ർ​മ ഖ​ബ​റു​ക​ള്‍ക്ക​രി​കെ അ​തി​ശാ​ന്ത​നാ​യി ഉ​റ​ങ്ങി​യി​രു​ന്ന മ​നു​ഷ്യ​നെ ക​ണ്ട​താ​ണെ​ന്ന് റ​സാ​ക്ക് പ​റ​യാ​റു​ണ്ടാ​യി​രു​ന്നു.

അ​ഗ​ത്തി​യി​ലെ ഒ​രു ഖ​ബ​ര്‍സ്ഥാ​നി​ല്‍ ന​ല്ല ചു​ക​ന്ന നി​റ​മു​ള്ള പൂ​വു​ക​ളു​ള്ള ഒ​രു ചെ​ടി​യും ക​ണ്ടു. പൂ​ക്ക​ള്‍ നോ​ക്കി​നി​ല്‍ക്കു​മ്പോ​ള്‍ പൊ​ടു​ന്ന​നെ തൊ​ട്ട​ടു​ത്ത്‌ തേ​ങ്ങ താ​ഴെ വീ​ണ ശ​ബ്ദം കേ​ട്ടു, ആ ​ഞെ​ട്ട​ലി​ല്‍ പൂ​ക്ക​ളെ നോ​ക്കി​യു​ള്ള നി​ല്‍പ് അ​വ​സാ​നി​ച്ചു. അ​വി​ടെ​നി​ന്നും വീ​ണ്ടും മു​ന്നോ​ട്ടു ന​ട​ന്ന​പ്പോ​ഴാ​ണ് ഹ​സ്ര​ത്ത്‌ സ​യ്യി​ദ് ബാ​വ ഫ​ഖ്റു​ദ്ദീ​ന്‍ മ​ഖാം ശ​രീ​ഫ്‌ –ശൈ​ഖി​ന പ​ള്ളി ക​ണ്ട​ത്. മ​ഖാ​മി​ല്‍ നി​ര​വ​ധിപേ​ര്‍ രാ​വി​ലെ മു​ത​ലേ പ്രാ​ര്‍ഥി​ക്കാ​ന്‍ എ​ത്തി​യി​ട്ടു​ണ്ട്‌. പ്ര​ത്യേ​കി​ച്ചും സ്ത്രീ​ക​ള്‍. മ​ട​ങ്ങു​മ്പോ​ള്‍ ആ​ണ്‍-​പെ​ണ്‍ കു​ട്ടി​ക​ള്‍ മ​ദ്റസ​ക​ളി​ലേ​ക്കും സ്കൂ​ളു​ക​ളി​ലേ​ക്കും സൈ​ക്കി​ളു​ക​ളി​ല്‍ പോ​കു​ന്ന​ത്‌ ക​ണ്ടു. സൈ​ക്കി​ള്‍ ബെ​ല്ലു​ക​ളി​ല്‍ അ​വ​ര്‍ കൂ​ട്ടു​കാ​രു​മാ​യി ആ​ശ​യ​ങ്ങ​ളും കു​സൃ​തി​ക​ളും വി​നി​മ​യംചെ​യ്യു​ന്നു. അ​വ​രു​ടെ ജ​സ്രി ഭാ​ഷ​യി​ലു​ള്ള സം​സാ​രം പൂ​ർ​ണ​മാ​യും മ​ന​സ്സി​ലാ​ക്കാ​നാ​വി​ല്ല. അ​തി​ന് മ​ല​യാ​ള​വു​മാ​യി ന​ല്ല അ​ന്ത​ര​മു​ണ്ട്‌. പ​ക്ഷേ, പു​റ​ത്തു​നി​ന്നു വ​ന്ന​വ​രോ​ട്‌ അ​വ​ര്‍ മ​ല​യാ​ള​ത്തി​ല്‍ത​ന്നെ​യാ​ണ് സം​സാ​രി​ക്കു​ക. മ​ല​യാ​ള​വും മ​ഹ​ലും ജ​സ്രി​യും അ​റ​ബി​യും അ​റ​ബി മ​ല​യാ​ള​വും ക​ല​രു​ന്ന ഭാ​ഷാ​തു​രു​ത്തുകൂ​ടി​യാ​ണ് ല​ക്ഷ​ദ്വീ​പ്‌.

എ​വി​ടെ നോ​ക്കി​യാ​ലും ക​ട​ലു​ള്ള ദ്വീ​പി​ല്‍ ശു​ദ്ധ​ജ​ലം കി​ട്ടു​മോ? ഒ​രു പ്ര​ഭാ​ത ന​ട​ത്ത​ത്തി​ല്‍ ഫാ​ത്തി​മ എ​ന്നു പേ​രു​ള്ള വീ​ട്ട​മ്മ​യോ​ട്‌ ചോ​ദി​ച്ചു. ഞ​ങ്ങ​ളു​ടെ കി​ണ​റി​ലെ വെ​ള്ളം കു​ടി​ച്ചു നോ​ക്കി​യാ​ല്‍ ഈ ​ചോ​ദ്യ​ത്തി​നു​ള്ള ഉ​ത്ത​രം കി​ട്ടു​മ​ല്ലോ, അ​വ​ര്‍ ചി​രി​ച്ചു​കൊ​ണ്ടു പ​റ​ഞ്ഞു. കി​ണ​റ്റി​ലെ വെ​ള്ളം ശു​ദ്ധം, ഉ​പ്പി​ന്‍റെ രു​ചി​യേ ഇ​ല്ല. ദ്വീ​പി​ല്‍ ക​ട​ല്‍വെ​ള്ളം വേ​റെ, കി​ണ​ര്‍ വെ​ള്ളം വേ​റെ. ര​ണ്ടും അ​ങ്ങോ​ട്ടു​മി​ങ്ങോ​ട്ടും ക​ല​രി​ല്ല. സ്ര​ഷ്ടാ​വി​ന്‍റെ അ​ത്ഭു​ത​ങ്ങ​ളി​ലൊ​ന്ന്‌ –അ​ങ്ങ​നെ പ​റ​ഞ്ഞ് അ​വ​ര്‍ ആ​ടി​നെ ക​റ​ക്കാ​നും അ​ന്ന​ത്തെ തി​ര​ക്കു​ക​ളി​ലേ​ക്കും പോ​യി.

ദ്വീ​പ്‌ ബു​ദ്ധ​നും ന​ബി വം​ശാ​വ​ലി​യു​മു​ള്ള മ്യൂ​സി​യ​ത്തി​ല്‍

അ​ഗ​ത്തി​യി​ലെ ഗോ​ള്‍ഡ​ന്‍ ജൂ​ബി​ലി മ്യൂ​സി​യ​ത്തി​ല്‍ ഉ​ത്ഖ​ന​ന​ത്തി​ല്‍ ആ​ന്ത്രോ​ത്ത്‌ ദ്വീ​പി​ല്‍നി​ന്നു കി​ട്ടി​യ ബു​ദ്ധ​ന്‍റെ പ്ര​തി​മ​യു​ണ്ട്‌. പ്ര​തി​മ പ​ല ക​ഷ​ണ​ങ്ങ​ളാ​യി​ട്ടു​ണ്ട്‌. കാ​ല​പ്പ​ഴ​ക്കംകൊ​ണ്ടോ ഉ​ത്ഖ​ന​ന വേ​ള​യി​ലോ സം​ഭ​വി​ച്ച​താ​കാം. മ്യൂ​സി​യ​ത്തി​ല്‍ പ്ര​തി​മ​ക്ക​രി​കെ ഇ​ങ്ങ​നെ എ​ഴു​തി​വെ​ച്ചി​രി​ക്കു​ന്നു: ആ​ന്ത്രോ​ത്ത്‌ ദ്വീ​പി​ല്‍നി​ന്നും കു​ഴി​ച്ചെ​ടു​ത്ത ശ്രീ​ബു​ദ്ധ​ പ്ര​തി​മ​യു​ടെ അ​വ​ശി​ഷ്‌​ടം. കു​മ്മാ​യ​ക്ക​ല്ലു​കൊ​ണ്ടു​ണ്ടാ​ക്കി കു​മ്മാ​യംകൊ​ണ്ടു മി​നു​സ​പ്പെ​ടു​ത്തി​യി​രി​ക്കു​ന്നു: ബു​ദ്ധി​സ്‌​റ്റ്‌ ഹെ​റി​റ്റേ​ജ് ല​ക്ഷ​ദ്വീ​പ്‌ എ​ന്ന ശീ​ര്‍ഷ​ക​ത്തി​ലു​ള്ള ബോ​ര്‍ഡി​ല്‍ ഇ​ങ്ങ​നെ കൂ​ടി പ​റ​യു​ന്നു: 1960 വ​രെ ല​ക്ഷ​ദ്വീ​പി​ല്‍ ബു​ദ്ധി​സ​ത്തി​ന്‍റെ സ്വാ​ധീ​ന​ങ്ങ​ള്‍ ഉ​ണ്ടാ​യി​രു​ന്നു​വെ​ന്ന്‌ ദ്വീ​പി​ലു​ള്ള​വ​ര്‍ക്കോ പു​റം ലോ​ക​ത്തി​നോ അ​റി​യു​മാ​യി​രു​ന്നി​ല്ല. എ​ന്നാ​ല്‍ 1960 മു​ത​ല്‍ ന​ട​ന്ന ആ​ര്‍ക്കി​യോ​ള​ജി​ക്ക​ല്‍ സ​ര്‍വേ അ​ട​ക്ക​മു​ള്ള ഏ​ജ​ന്‍സി​ക​ളു​ടെ ഉ​ത്ഖ​ന​ന​ങ്ങ​ളി​ലും അ​ന്വേ​ഷ​ണ​ങ്ങ​ളി​ലും ആ​ന്ത്രോ​ത്ത്‌, ക​ല്‍പ്പേ​നി, ക​വ​ര​ത്തി, മി​നി​ക്കോ​യി എ​ന്നി​വി​ട​ങ്ങ​ളി​ല്‍ ബു​ദ്ധ​മ​ത വി​ശ്വാ​സ​വു​മാ​യി ബ​ന്ധ​പ്പെ​ട്ട പ്ര​തി​മ​ക​ളും മ​റ്റും ക​ണ്ടെ​ത്തു​ക​യു​ണ്ടാ​യി എ​ന്ന് മ്യൂ​സി​യം വി​ശ​ദീ​ക​രി​ക്കു​ന്നു.

കു​മ്മാ​യ​ച്ചാ​ന്തി​ലും വെ​ങ്ക​ല​ത്തി​ലും നി​ർ​മി​ച്ച ബു​ദ്ധ പ്രാ​ര്‍ഥ​നാ മ​ന്ദി​ര​ത്തി​ന്‍റേ​തെ​ന്ന്‌ ക​രു​തു​ന്ന തൂ​ണു​ക​ളു​ടെ ക​ഷ​ണ​ങ്ങ​ള്‍, ജാ​ത​ക ക​ഥ​ക​ളി​ലെ പു​ഷ്‌​പ-​മൃ​ഗ ചി​ത്ര​ങ്ങ​ള്‍, ബു​ദ്ധ ശി​ൽ​പാ​വ​ശി​ഷ്ട​ങ്ങ​ള്‍ എ​ന്നി​വ ഗ​വേ​ഷ​ക​ര്‍ക്ക്‌ കി​ട്ടി​യ​താ​യും വി​ശ​ദീ​ക​രി​ക്ക​പ്പെ​ടു​ന്നു. ദ്വീ​പി​ല്‍ ഇ​സ്‍ലാ​മി​നു മു​മ്പ്‌ ബു​ദ്ധമ​ത​വി​ശ്വാ​സം ഉ​ണ്ടാ​യി​രി​ക്കാം എ​ന്ന​തി​ലേ​ക്കാ​ണ് ബു​ദ്ധ​പ്ര​തി​മ​യും മ​റ്റ്‌ അ​വ​ശി​ഷ്ട​ങ്ങ​ളും സൂ​ച​ന ന​ല്‍കു​ന്ന​തെ​ന്നും വി​ശ​ദീ​ക​ര​ണ​ക്കു​റി​പ്പി​ല്‍ കാ​ണാം. ദ്വീ​പി​ലെ ബു​ദ്ധ ബ​ന്ധ​ത്തെ​ക്കു​റി​ച്ച് വ​ള​രെ ആ​ഴ​ത്തി​ലു​ള്ള പ​ഠ​ന​ങ്ങ​ളൊ​ന്നും ക​ണ്ടെ​ത്താ​നും ക​ഴി​ഞ്ഞി​ല്ല. മു​ഹ​മ്മ​ദ് ന​ബി​യു​ടെ വം​ശാ​വ​ലി പ​ട്ടി​ക (സി​ല്‍സി​ല -​ഫാ​മി​ലി ട്രീ)​യും മ്യൂ​സി​യ​ത്തി​ലു​ണ്ട്‌. അ​തി​നെ​ക്കു​റി​ച്ചു​ള്ള കു​റി​പ്പ്‌ ഇ​ങ്ങ​നെ: മു​ഹ​മ്മ​ദ് ന​ബി (സ.​അ.​വ)​യു​ടെ പാ​ര​മ്പ​ര്യ പി​ന്തു​ട​ര്‍ച്ച​ക്കാ​രു​ടെ വി​വ​ര​ങ്ങ​ള​ട​ങ്ങി​യ വി​വ​ര​ണരേ​ഖ. അ​ഗ​ത്തി ദ്വീ​പി​ലെ പൊ​ന്തി​നോ​ട എ​ന്ന വീ​ട്ടി​ല്‍നി​ന്നും കി​ട്ടി​യ​ത്: കൈ ​കൊ​ണ്ടെ​ഴു​തി​യ ഖു​ര്‍ആ​ന്‍ പ്ര​തി, നാ​വി​ക​ശാ​സ്ത്ര​ത്തെ​പ്പ​റ്റി​യു​ള്ള പ​ഴ​യ ഗ്ര​ന്ഥ​ങ്ങ​ള്‍, സ​മു​ദ്ര​ച​ല​ന പ​ട്ടി​ക എ​ന്നി​വ​യും ഇ​വി​ടെ പ്ര​ദ​ര്‍ശി​പ്പി​ക്ക​പ്പെ​ട്ടി​ട്ടു​ണ്ട്‌.

അ​റ​ബി, അ​റ​ബി മ​ല​യാ​ളം, വ​ട്ടെ​ഴു​ത്ത്‌് തു​ട​ങ്ങി​യ ലി​പി രീ​തി​ക​ളാ​ണ്‌ ദ്വീ​പി​ല്‍ ആ​ദ്യം പൊ​തു​വെ പി​ന്തു​ട​ര്‍ന്നി​രു​ന്ന​ത്. ന​ബി​യു​ടെ വം​ശാ​വ​ലി അ​റ​ബി ഭാ​ഷ​യി​ലു​ള്ള​താ​ണ്. അ​റ​ബി​യി​ല്‍നി​ന്നും അ​റ​ബി മ​ല​യാ​ള​ത്തി​ലേ​ക്കു​ള്ള ദ്വീ​പി​ലെ മാ​റ്റം വ്യ​ക്ത​മാ​ക്കു​ന്ന ‘റ​ഹ്മാ​നി’ എ​ന്ന കൃ​തി​യു​ടെ കൈ​യെ​ഴു​ത്തു പ്ര​തി​യും മ്യൂ​സി​യ​ത്തി​ലു​ണ്ട്‌. ഈ ​കൃ​തി​യെ​ക്കു​റി​ച്ച്‌ ഡോ. ​പി.​ടി. അ​ബ്ദു​ല്‍ അ​സീ​സ് എ​ഴു​തി​യ ‘ല​ക്ഷ​ദ്വീ​പി​ലെ അ​റ​ബി മ​ല​യാ​ളം’ എ​ന്ന ലേ​ഖ​ന​ത്തി​ല്‍ ഇ​ങ്ങ​നെ പ​റ​യു​ന്നു​ണ്ട്: ദ്വീ​പി​ല്‍ ക​ണ്ടു​കി​ട്ട​ിയ​വ​യി​ല്‍ വെ​ച്ച്‌ ഏ​റ്റ​വും പ​ഴ​ക്കംചെ​ന്ന അ​റ​ബി മ​ല​യാ​ള രേ​ഖ ‘റ​ഹ്‌​മാ​നി’ എ​ന്ന ഗ്ര​ന്ഥ​മാ​ണെ​ന്നു ക​രു​തു​വാ​ന്‍ ന്യാ​യ​മു​ണ്ട്‌. അ​ഗ​ത്തി ദ്വീ​പി​ലെ മ്യൂ​സി​യ​ത്തി​ലു​ള്ള ‘റ​ഹ്‌​മാ​നി’​യു​ടെ ​ൈക​യെ​ഴു​ത്തു പ്ര​തി​യി​ല്‍ അ​റ​ബി മ​ല​യാ​ള​വും വ​ട്ടെ​ഴു​ത്തും ഇ​ട​ക​ല​ര്‍ത്തി എ​ഴു​തി​യി​രി​ക്കു​ന്നു എ​ന്ന വ​സ്‌​തു​ത ശ്ര​ദ്ധേ​യ​മാ​ണ്. വ​ട്ടെ​ഴു​ത്തി​ല്‍നി​ന്നും ദ്വീ​പി​ന്‍റെ എ​ഴു​ത്തു സ​മ്പ്ര​ദാ​യം അ​റ​ബി മ​ല​യാ​ള​ത്തി​ലേ​ക്ക്‌ മാ​റി​ത്തു​ട​ങ്ങി​യ​തി​ന്‍റെ ഇ​ട​ക്ക​ണ്ണി​യാ​യി ഈ ​കൃ​തി​യെ കാ​ണേ​ണ്ട​തു​ണ്ട്‌. അ​ഥ​വാ ഈ ​കൃ​തി പ​രി​വ​ര്‍ത്ത​ന കാ​ല​ഘ​ട്ട​ത്തി​ലെ എ​ഴു​ത്തി​നെ പ്ര​തി​നി​ധാ​നംചെ​യ്യു​ന്നു​വെ​ന്ന് ക​രു​താം: റ​ഹ്മാ​നി​യ​യു​ടെ കൈ​യെ​ഴു​ത്തു പ്ര​തി ദ്വീ​പി​ലെ പ​ല കാ​ല​ങ്ങ​ളി​ലെ ഭാ​ഷ​യു​ടെ​യും ലി​പി-​എ​ഴു​ത്തു രീ​തി​ക​ളു​ടെ​യും മാ​റ്റ​ങ്ങ​ളി​ലേ​ക്കും വ​ള​ര്‍ച്ച​ക​ളി​ലേ​ക്കും കൊ​ണ്ടു​പോ​യി.

ഹി​ജ്റ വ​ര്‍ഷം 1297ലെ (1878 ​എ.​ഡി​യി​ല്‍) അ​റ​ബി​യി​ല്‍ എ​ഴു​തി​യി​ട്ടു​ള്ള മീ​സാ​ന്‍ ക​ല്ലും മ്യൂ​സി​യ​ത്തി​ലു​ണ്ട്. അ​തി​നെ​ക്കു​റി​ച്ചു​ള്ള വി​ശ​ദീ​ക​ര​ണം ഇ​ങ്ങ​നെ: ശ​വ​പ്പ​റ​മ്പി​ല്‍ ആ​ളെ തി​രി​ച്ച​റി​യാ​നും എ​ന്നാ​ണ് മ​രി​ച്ച​ത്‌ എ​ന്നും അ​റി​യു​വാ​ന്‍ വേ​ണ്ടി കു​ത്തി​വെ​ക്കു​ന്ന മീ​സാ​ന്‍ ക​ല്ല്, അ​റ​ബി അ​ക്ഷ​ര​ങ്ങ​ളി​ല്‍ കൊ​ത്തി​യെ​ടു​ത്ത​ത്‌: മ​രി​ച്ച​വ​രെ തി​രി​ച്ച​റി​യാ​നു​ള്ള സ്‌​മാ​ര​ക​ശി​ല നോ​ക്കിനി​ല്‍ക്കു​മ്പോ​ള്‍ പു​ന​ത്തി​ല്‍ കു​ഞ്ഞ​ബ്‌​ദു​ള്ള​യു​ടെ അ​തേ പേ​രി​ലു​ള്ള വി​ഖ്യാ​ത നോ​വ​ല്‍ ഓ​ർ​മ​യി​ലേ​ക്കു വ​ന്നു.

ചൈ​ന വ്യാ​ളി​യു​ടെ കൊ​ത്തു​പ​ണി​യോ​ടെ​യു​ള്ള കൂ​റ്റ​ന്‍ ഭ​ര​ണി​യാ​ണ് മ​റ്റൊ​രു കാ​ഴ്ച. അ​തി​ന്‍റെ അ​ടി​ക്കു​റി​പ്പ്‌ ഇ​ങ്ങ​നെ: ഏ​ക​ദേ​ശം 100 വ​ര്‍ഷം മു​മ്പ്‌ വീ​ടു​ക​ളി​ല്‍ സു​ര്‍ക്ക, തെ​ങ്ങി​ന്‍ ശ​ര്‍ക്ക​ര മു​ത​ലാ​യ ആ​ഹാ​ര സാ​ധ​ന​ങ്ങ​ള്‍ ശേ​ഖ​രി​ച്ചുവെ​ക്കു​ന്ന​തി​നു​വേ​ണ്ടി ഉ​പ​യോ​ഗി​ച്ചി​രു​ന്ന ചൈ​നാ ഡ്രാ​ഗ​ന്‍റെ കൊ​ത്തു​പ​ണി​യു​ള്ള ചൈ​നാ ക​ളി​മ​ണ്‍ ഭ​ര​ണി (അ​ഗ​ത്തി ദ്വീ​പി​ല്‍നി​ന്നും ശേ​ഖ​രി​ച്ച​ത്).

മി​നി​ക്കോ​യി​യി​ലെ വ​ള​രെ പ്ര​ശ​സ്‌​തി​യു​ള്ള ‘മ​സൂ​ദി തോ​ണി’​യു​ടെ മി​നി​യേ​ച്ച​ര്‍ മ്യൂ​സി​യ​ത്തി​ലു​ണ്ട്‌. മി​നി​യേ​ച്ച​റി​ലു​ള്ള നി​റ​ങ്ങ​ള്‍ അ​ങ്ങേ​യ​റ്റം ആ​ക​ര്‍ഷി​ക്കു​ന്ന​തും കൊ​തി​പ്പി​ക്കു​ന്ന​തു​മാ​ണ്. യ​ഥാ​ര്‍ഥ മ​സൂ​ദി ഇ​തേ നി​റ​ത്തി​ലു​ള്ള​താ​ണോ എ​ന്ന്‌ വ്യ​ക്ത​മ​ല്ല. ചൂ​ണ്ട​ക്കൊ​ളു​ത്തി​ല്‍ മീ​ന്‍ പി​ടി​ക്കു​ന്ന രീ​തി​യാ​ണ് മ​സൂ​ദി​ത്തോ​ണി​ക്കാ​രു​ടേ​ത്‌. ട്യൂ​ണ മ​ത്സ്യ​മാ​ണ് ഇ​ങ്ങ​നെ പ്ര​ധാ​ന​മാ​യും പി​ടി​ക്കു​ന്ന​ത്. ജ​പ്പാ​നി​ലു​ള്ള​വ​ര്‍ ഈ ​മ​ത്സ്യ​ബ​ന്ധ​ന രീ​തി പ​ഠി​ക്കാ​നാ​യി മി​നി​ക്കോ​യി​യി​ല്‍ വ​ന്നി​രു​ന്നു. ക​റു​പ്പ്‌, മ​ഞ്ഞ, ചു​വ​പ്പ്‌ നി​റ​ങ്ങ​ളാ​ണ് തോ​ണി​യി​ല്‍ ഉ​പ​യോ​ഗി​ച്ചി​ട്ടു​ള്ള​ത്. സ​ത്യ​ത്തി​ല്‍ അ​തൊ​രു പെ​യി​ന്‍റ​ഡ്‌ കാ​ന്‍വാ​സ് എ​ന്ന് തോ​ന്നി​യാ​ല്‍ കു​റ്റം പ​റ​യാ​നാ​കി​ല്ല. അ​ങ്ങ​നെ​യാ​ണ് വ​ര്‍ണ​ങ്ങ​ളു​ടെ കോ​മ്പോ​സി​ഷ​ന്‍. ഈ ​നി​റ​ങ്ങ​ളെ​ടു​ത്ത പാ​ല​റ്റ്‌ എ​വി​ടെ​യെ​ന്ന​ന്വേ​ഷി​ക്കാ​ന്‍ ഒ​രാ​ളെ പ്രേ​രി​പ്പി​ക്കും മ​ട്ടി​ലാ​ണ് തോ​ണി​യി​ലെ നി​റ​ങ്ങ​ളു​ടെ മി​ശ്ര​ണം. മ​സൂ​ദി​ത്തോ​ണി​യു​ടെ നി​റ​ങ്ങ​ളു​ടെ ഉ​പ​യോ​ഗ​ത്തെ ഓ​ർ​മി​പ്പി​ക്കു​ന്ന ഒ​രു ചി​ര​വ​യും മ്യൂ​സി​യ​ത്തി​ലു​ണ്ട്‌. ചി​ര​വ​യി​ലെ പു​ഷ്‌​പ​ങ്ങ​ളു​ടെ ഇ​ത​ളു​ക​ള്‍ ഏ​റ​ക്കു​റെ മ​സൂ​ദി​ത്തോ​ണി​യു​ടെ വ​ര്‍ണ മി​ശ്ര​ണം ഉ​പ​യോ​ഗി​ച്ചാ​ണ് സാ​ക്ഷാ​ത്ക​രി​ച്ചി​രി​ക്കു​ന്ന​ത്. ചി​ര​വ വ​ള​ര്‍ന്നാ​ണോ മ​സൂ​ദി​ത്തോ​ണി​യാ​കു​ന്ന​ത് എ​ന്നൊ​രു തോ​ന്ന​ലു​ണ്ടാ​ക്കു​ന്ന​താ​ണ് ഇ​വ​യു​ടെ നി​ർ​മാ​ണ​ശൈ​ലി.

1880 സി.​ഇ​യി​ല്‍ ത​ക​ര്‍ന്ന ക​പ്പ​ലി​ന്‍റെ അ​വ​ശി​ഷ്ട​ങ്ങ​ളും മ്യൂ​സി​യ​ത്തി​ലു​ണ്ട്. അ​തി​നെ​ക്കു​റി​ച്ചു​ള്ള ചെ​റു​വി​ശ​ദീ​ക​ര​ണം ഇ​ങ്ങ​നെ: ബ​ങ്കാ​രം ദ്വീ​പി​ന്‍റെ​ടു​ത്ത്‌ ത​ക​ര്‍ന്ന ഒ​രു ക​പ്പ​ലി​ന്‍റെ ശേ​ഷി​പ്പ്‌ ക​ഷ​ണം. ബ​ങ്കാ​രം ദ്വീ​പി​ന്‍റെ തീ​ര​ത്തു​നി​ന്ന്‌ ക​ണ്ടെ​ടു​ത്ത​ത്. (ഏ​ക​ദേ​ശം 1880 എ.​ഡി). അ​ഗ​ത്തി ദ്വീ​പി​ല്‍നി​ന്ന്‌ ശേ​ഖ​രി​ച്ച​ത്: ക​പ്പ​ലു​ക​ളു​ടെ യാ​ത്ര​യു​ടെ ക​ഥ മാ​ത്ര​മ​ല്ല പ​ല ക​പ്പ​ല്‍ ത​ക​ര​ലു​ക​ളു​ടെ ക​ഥ​ക​ളും ഈ ​തീ​ര​ത്തു​നി​ന്ന്‌ കേ​ള്‍ക്കാം. 1988ലെ ​യാ​ത്ര​യി​ല്‍ ക​ട​മ​ത്ത് ഒ​രു ക​പ്പ​ലി​ന്‍റെ ലോ​ഹ അ​വ​ശി​ഷ്ട​ങ്ങ​ള്‍ ക​ണ്ടി​രു​ന്നു. അ​തി​ന് അ​ടു​ത്തേ​ക്ക്‌ പോ​ക​രു​ത്, കൈ​യോ കാ​ലോ ത​ട്ടി മു​റി​ഞ്ഞാ​ല്‍ ടെ​റ്റ്‌​ന​സ്‌ വ​രും എ​ന്ന്‌ ക​ട​മ​ത്ത്‌ ദ്വീ​പി​ലു​ള്ള​വ​ര്‍ മു​ന്ന​റി​യി​പ്പ്‌ ന​ല്‍കു​ക​യും ചെ​യ്‌​തി​രു​ന്നു. മ്യൂ​സി​യ​ത്തി​ല്‍ നി​ല്‍ക്കു​മ്പോ​ള്‍ അ​ങ്ങ​നെ​യു​ള്ള ചി​ല ഓ​ർ​മ​ക​ളും ക​ട​ന്നു​വ​ന്നു.

ക​ട​ല്‍യാ​ത്ര​യു​മാ​യി ബ​ന്ധ​പ്പെ​ട്ട നി​ര​വ​ധി ഉ​പ​ക​ര​ണ​ങ്ങ​ള്‍ മ്യൂ​സി​യ​ത്തി​ലു​ണ്ട്‌. ‘ക​മാ​ന്‍’ ആ​ണ് ഇ​തി​ലൊ​ന്ന്‌. പ​ണ്ട്‌ ഓ​ട​ങ്ങ​ളി​ലും പാ​യ​ക്ക​പ്പ​ലു​ക​ളി​ലും ക​ട​ല്‍ മാ​ര്‍ഗ​ങ്ങ​ള്‍ നി​ശ്ച​യി​ക്കാ​നും ദൂ​രം അ​ള​ക്കാ​നും ഉ​പ​യോ​ഗി​ച്ചി​രു​ന്ന കോ​ണാ​കാ​ര​മാ​യ ഒ​രു ഉ​പ​ക​ര​ണ​മാ​ണ് ക​മാ​ന്‍. സ​മ​യ​സൂ​ചി​ക​യാ​ണ് മ​റ്റൊ​ന്ന്. പാ​യ​ക്ക​പ്പ​ലി​ന്‍റെ വേ​ഗ​ത അ​ള​ക്കാ​ന്‍ ഉ​പ​യോ​ഗി​ച്ചി​രു​ന്ന ഈ ​ഉ​പ​ക​ര​ണം മ​റ്റൊ​രു യ​ന്ത്ര​ഭാ​ഗ​വു​മാ​യി ഘ​ടി​പ്പി​ച്ച​താ​ണ്. സൂ​ച​ന​ക്ക​ണ്ണാ​ടി​യാ​ണ് മ​റ്റൊ​ന്ന്. പ​ക​ല്‍സ​മ​യ​ത്ത് സൂ​ര്യ​ര​ശ്മി​യു​ടെ പ്ര​തി​ഫ​ല​നം​കൊ​ണ്ട്‌ സൂ​ച​ന​ക​ള്‍ അ​റി​യി​ക്കാ​ന്‍ ഉ​പ​യോ​ഗി​ച്ചി​രു​ന്ന നാ​വി​ക ഉ​പ​ക​ര​ണ​മാ​ണി​ത്. ക​ട​ലി​ല്‍ യാ​ത്ര​ചെ​യ്യു​മ്പോ​ള്‍ ന​ക്ഷ​ത്ര​ങ്ങ​ളെ തി​രി​ച്ച​റി​യാ​ന്‍ ഉ​പ​യോ​ഗി​ച്ചി​രു​ന്ന ഉ​പ​ക​ര​ണം, പാ​യ​ക്ക​പ്പ​ലു​ക​ളി​ലെ നാ​വി​ക വി​ള​ക്ക്, ന​ങ്കൂ​ര സൂ​ച​ന ഉ​പ​ക​ര​ണം (വൃ​ത്താ​കൃ​തി​യി​ല്‍ ഇ​രു​മ്പു കൊ​ണ്ടു​ണ്ടാ​ക്കി​യ നാ​ല് ഇ​ത​ളു​ക​ളു​ള്ള ഈ ​സം​വി​ധാ​നം ഓ​ടം, പാ​യ​ക്ക​പ്പ​ലു​ക​ള്‍ എ​ന്നി​വ ന​ങ്കൂ​ര​മി​ട്ടി​ട്ടു​ണ്ടെ​ന്ന് സൂ​ച​ന ന​ല്‍കാ​നാ​ണ് ഉ​പ​യോ​ഗി​ക്കു​ന്ന​ത്), പാ​യ​ക്ക​പ്പ​ലു​ക​ളി​ല്‍ പാ​യ ഉ​യ​ര്‍ത്താ​നും താ​ഴ്ത്താ​നും ഉ​പ​യോ​ഗി​ച്ചി​രു​ന്ന മ​ര​ക്ക​പ്പി –ഇ​ങ്ങ​നെ നാ​വി​ക ജീ​വി​ത​വു​മാ​യി ബ​ന്ധ​പ്പെ​ട്ട സാ​ധ​ന​ങ്ങ​ളു​ടെ ശേ​ഖ​രം മ്യൂ​സി​യ​ത്തി​ലു​ണ്ട്. ഇ​തി​ല്‍ ഒ​രു പ്ര​ദ​ര്‍ശ​ന വ​സ്തു വേ​റി​ട്ടുനി​ല്‍ക്കു​ന്നു. അ​ത്‌ പി​ച്ച​ള​യി​ല്‍ തീ​ര്‍ത്ത മ​ണി​യാ​ണ്. ബ​ങ്കാ​രം ദ്വീ​പി​ന്‍റെ വ​ട​ക്കു​ഭാ​ഗ​ത്ത് ത​ക​ര്‍ന്ന ക​പ്പ​ല്‍ അ​വ​ശി​ഷ്ട​ങ്ങ​ളു​ടെ ഇ​ട​യി​ല്‍നി​ന്നും കി​ട്ടി​യ​താ​ണ് ഈ ​മ​ണി. ഇ​തി​ല്‍ 1792 പ്രി​ന്‍സ​സ് റോ​യ​ല്‍ എ​ന്ന് കൊ​ത്തി​വെ​ച്ചി​ട്ടു​ണ്ട്. ഈ ​ക​പ്പ​ല്‍ 18ാം നൂ​റ്റാ​ണ്ടി​ലാ​യി​രി​ക്കു​മോ ബ​ങ്കാ​ര​ത്ത് വ​ന്ന് ത​ക​ര്‍ന്ന​ത്? –ക​ട​ലും ഭാ​ഷ​യും മ​ത​ങ്ങ​ളും സ്മാ​ര​ക​ശി​ല​ക​ളും ന​ല്‍കു​ന്ന വി​വി​ധ ആ​ഖ്യാ​ന​ങ്ങ​ളി​ലൂ​ടെ സ​ഞ്ച​രി​ച്ച്‌ മ്യൂ​സി​യം വി​ട്ടി​റ​ങ്ങി.

മീ​ന്‍പാ​ത​ക​ളി​ല്‍ നീ​ന്താം, സി​ലി​ണ്ട​റി​ല്‍ പ്രാ​ണ​വാ​യു​വു​ണ്ട്‌

ക​ട​ലി​ല്‍ മു​ങ്ങി നീ​ന്താ​നു​ള്ള സൗ​ക​ര്യ​മു​ണ്ട്‌. ക​യാ​ക്കി​ങ്ങും സ്നോ​ര്‍ക്ക്ലി​ങ്ങും സ്കൂ​ബ​യു​മു​ണ്ട്‌. നീ​ന്താ​ന​റി​യാ​ത്ത​വ​ര്‍ക്കും മു​ങ്ങാം, കൂ​ടെ ഒ​രാ​ളു​ണ്ടാ​കും. ഒ​ന്നും പേ​ടി​ക്കാ​നി​ല്ല –ടൂ​ര്‍ ഓ​പ​റേ​റ്റ​ര്‍മാ​ര്‍ ന​ല്‍കു​ന്ന ഉ​റ​പ്പാ​ണ്. ക​ട​ല്‍ത്തീ​ര​ത്ത് നി​ര​ത്തി​വെ​ച്ചി​രി​ക്കു​ന്ന ഓ​ക്‌​സി​ജ​ന്‍ സി​ലി​ണ്ട​റു​ക​ള്‍ അ​ഗ​ത്തി​യി​ല്‍ എ​പ്പോ​ഴും കാ​ണാം. സ്‌​കൂ​ബ മു​ങ്ങ​ലു​കാ​ര്‍ക്കു​ള്ള​താ​ണ​ത്. മു​ഖ​ത്ത് ക​ണ്ണ​ട​യു​ള്ള മാ​സ്ക് വെ​ച്ച് പു​റ​ത്ത് ഓ​ക്സി​ജ​ന്‍ സി​ലി​ണ്ട​ര്‍ ബ​ന്ധി​ച്ചു വേ​ണം ക​ട​ലി​ല്‍ മു​ങ്ങാ​ന്‍. 16 കി​ലോ​യോ​ളം ഭാ​ര​മു​ണ്ട് ഓ​ക്സി​ജ​ന്‍ സി​ലി​ണ്ട​റു​ക​ള്‍ക്ക്. പ​ക്ഷേ വെ​ള്ള​ത്തി​ല്‍ മു​ങ്ങു​ന്ന​തോ​ടെ ഭാ​രം അ​നു​ഭ​വ​പ്പെ​ടാ​തെ​യാ​കും. പ്ല​വ​നക്ഷ​മ​ത​കൊ​ണ്ടാ​ണ് ഇ​തെ​ന്നു പ​റ​യു​ന്നു. അ​തി​ന്‍റെ ശാ​സ്ത്രീ​യ​വ​ശ​മൊ​ന്നു​മ​റി​യി​ല്ല. മു​ങ്ങി​യ​പ്പോ​ള്‍ ഭാ​ര​മി​ല്ലാ​യ്മ ശ​രി​ക്കും അ​നു​ഭ​വ​പ്പെ​ട്ടു. മു​ങ്ങു​ന്ന​തി​നു​മു​മ്പ് ന​ല്ല ഭാ​രം തോ​ന്നി​യി​രു​ന്നു​താ​നും.

അ​ണ്ട​ര്‍ വാ​ട്ട​ര്‍ ഫോ​ട്ടോ​ഗ്ര​ഫി​യാ​ണ് സ്കൂ​ബ​യി​ല്‍ സ​ഞ്ചാ​രി​ക​ളെ ആ​ക​ര്‍ഷി​ക്കു​ന്ന പ്ര​ധാ​ന ഘ​ട​കം. മു​ങ്ങി പ​വി​ഴ​പ്പു​റ്റു​ക​ള്‍ക്ക​രി​കി​ലൂ​ടെ​യോ മീ​ന്‍കൂ​ട്ട​ങ്ങ​ളു​ടെ അ​ടു​ത്തു​കൂ​ടെ​യോ പോ​കു​മ്പോ​ള്‍ ഒ​രു ഫോ​ട്ടോ​ഗ്രാ​ഫ​ര്‍ വെ​ള്ള​ത്തി​ന​ടി​യി​ല്‍നി​ന്ന് ഫോ​ട്ടോ​യെ​ടു​ക്കാ​ന്‍ പ​റ്റു​ന്ന കാ​മ​റ ഉ​പ​യോ​ഗി​ച്ച് പ​ട​ങ്ങ​ള്‍ എ​ടു​ത്തു ത​രും. ദ്വീ​പ് യാ​ത്ര​യി​ലെ ഏ​റ്റ​വും വ​ലി​യ സു​വ​നീ​ര്‍ പ​ല​ര്‍ക്കും ഈ ​ഫോ​ട്ടോ​ഗ്രാ​ഫു​ക​ളാ​ണ്. ഓ​ക്സി​ജ​ന്‍ സി​ലി​ണ്ട​റി​ല്‍നി​ന്നും വ​രു​ന്ന ര​ണ്ടു നോ​സി​ലു​ക​ള്‍ പ​ല്ലു​ക​ള്‍ക്കി​ട​യി​ല്‍ വ​ല​ത്തും ഇ​ട​ത്തും ഭാ​ഗ​ത്ത് ക​ടി​ച്ചു പി​ടി​ക്ക​ണം. പ​ട​മെ​ടു​ക്കു​മ്പോ​ള്‍ മു​ഖ​ത്തെ ക​ണ്ണ​ട​യും സി​ലി​ണ്ട​ര്‍ നോ​സു​ക​ളും മാ​റ്റി മു​ഖം കൂ​ടു​ത​ല്‍ വ്യ​ക്ത​മാ​കു​ന്ന​തുകൊ​ണ്ട്‌ ആ​ളെ കൃ​ത്യ​മാ​യി തി​രി​ച്ച​റി​യു​ന്ന പ​ടം കി​ട്ടും. അ​ങ്ങ​നെ നി​ല്‍ക്കു​ന്ന അ​ൽ​പ​നേ​രം ഓ​ക്സി​ജ​നി​ല്ലാ​തെ വെ​ള്ള​ത്തി​ന​ടി​യി​ല്‍ അ​തി​ജീ​വി​ക്കാ​നു​ള്ള ക​ഴി​വു​വേ​ണം.

വെ​ള്ള​ത്തി​ന​ടി​യി​ലെ ഭാ​ഷ ആം​ഗ്യ​ങ്ങ​ള്‍കൊ​ണ്ടാ​ണ്. ഗൈ​ഡും സ​ഞ്ചാ​രി​യും ഉ​പ​യോ​ഗി​ക്കേ​ണ്ട ആം​ഗ്യ​ഭാ​ഷ​യെ​ക്കു​റി​ച്ച് ബോ​ട്ടി​ല്‍നി​ന്നും പ​രി​ശീ​ല​നം കി​ട്ടും. എ​ന്തെ​ങ്കി​ലും ബു​ദ്ധി​മു​ട്ടു​ണ്ടാ​വു​ക​യാ​ണെ​ങ്കി​ല്‍ അ​ത​റി​യി​ക്കാ​നു​ള്ള ആം​ഗ്യ​മു​ണ്ട്. എ​ല്ലാം ഒാ​കെ ആ​യെ​ങ്കി​ല്‍ ആ ​സ​ന്തോ​ഷം പ​ങ്കി​ടാ​നും മു​ദ്ര​യു​ണ്ട്. വെ​ള്ള​ത്തി​ല്‍ മു​ങ്ങി കു​റ​ച്ചു ക​ഴി​യു​മ്പോ​ള്‍ മ​റ്റൊ​രാ​ള്‍ നീ​ന്തി ക്രോ​സ് ചെ​യ്ത് ക​ട​ന്നു പോ​കും. അ​യാ​ളാ​ണ് കാ​മ​റാ​മാ​ന്‍. എ​നി​ക്ക് അ​ധി​ക​നേ​രം മു​ങ്ങി​നി​ല്‍ക്കാ​ന്‍ ക​ഴി​ഞ്ഞി​ല്ല. ശ്വാ​സ​കോ​ശം സ്പോ​ഞ്ചു​പോ​ലെ​യാ​ണ് എ​ന്ന​ത് മ​റ​ന്ന് 30 കൊ​ല്ലം സി​ഗ​ര​റ്റ്‌ വ​ലി​ച്ച​താ​യി​രി​ക്കാം കാ​ര​ണം. അ​തു​കൊ​ണ്ട്‌ ഓ​ക്സി​ജ​ന്‍ സി​ലി​ണ്ട​റു​ണ്ടാ​യി​ട്ടും കി​ത​പ്പ​ട​ക്കാ​നാ​യി​ല്ല. എ​ന്‍റെ മു​ന്നി​ലൂ​ടെ വ​ര്‍ണമ​ത്സ്യ​ങ്ങ​ളു​ടെ ഒ​രു കൂ​ട്ടം ക​ട​ന്നു​പോ​യി, അ​വ​യെ കാ​ണാ​ന്‍ പ​റ്റി എ​ന്ന​താ​ണ് എ​നി​ക്കു കി​ട്ടി​യ ബോ​ണ​സ്. മീ​ന്‍പാ​ത​ക​ളി​ല്‍ അ​വ​ര്‍ ക​ളി​ച്ചു​ല്ല​സി​ച്ചു നീ​ന്തു​ക​യാ​ണെ​ന്ന തോ​ന്ന​ലു​ണ്ടാ​യി. അ​വ​ര്‍ സം​സാ​രി​ക്കു​ന്ന ഭാ​ഷ ഏ​താ​യി​രി​ക്കും എ​ന്നാ​ലോ​ചി​ച്ചു. ഞാ​ന്‍ സി​ലി​ണ്ട​റു​മാ​യി മു​ക​ള്‍പ​ര​പ്പി​ലേ​ക്ക് പൊ​ന്തി.

സ്നോ​ര്‍ക്ക​ലി​ങ് കു​റ​ച്ചു​കൂ​ടി എ​ളു​പ്പ​മാ​യി തോ​ന്നി. മു​ഖ​ത്ത്‌, ലെ​ന്‍സു​ള്ള ഒ​രു മാ​സ്ക് വെ​ച്ച് ത​ല​മാ​ത്രം മു​ക്കി പ​തു​ക്കെ നീ​ന്തു​ന്ന രീ​തി​യാ​ണി​ത്. ലെ​ന്‍സു​ള്ള​തു​കൊ​ണ്ട് അ​ടി​ത്ത​ട്ട് വ്യ​ക്ത​മാ​യി കാ​ണാം. പ​വി​ഴ​പ്പു​റ്റു​ക​ളു​ടെ ഒ​രു പ്ര​ദേ​ശ​ത്താ​യി​രു​ന്നു സ്നോ​ര്‍ക്ക​ലി​ങ്. വ​ള​രെ അ​ടു​ത്തെ​ന്ന​പോ​ലെ പു​റ്റു​ക​ളെ ക​ണ്ടു. ക​യാ​ക്കി​ങ് തോ​ണി​യു​മാ​യി ക​ട​ലി​ല്‍ തു​ഴ​യ​ല്‍ ത​ന്നെ. ക​ര​യി​ല്‍നി​ന്നും വ​ള​രെ അ​ടു​ത്താ​ണി​ത്. തി​ര പൊ​ന്തു​മ്പോ​ഴും താ​ഴു​മ്പോ​ഴും ശ്ര​ദ്ധി​ക്ക​ണം. ലൈ​ഫ് ജാ​ക്ക​റ്റി​ട്ട​തി​നു​ ശേ​ഷ​മാ​ണ് ക​യാ​ക്കി​ങ്. ഒ​രു ഗൈ​ഡ് കൂ​ടെ​യു​ള്ള​തി​നാ​ല്‍ തു​ഴ​ച്ചി​ല്‍ കു​റ​ച്ചെ​ളു​പ്പ​മാ​യി​രു​ന്നു. ഗ്ലാ​സ്‌ ബോ​ട്ടി​ലു​ള്ള യാ​ത്ര​യും വ​ലി​യ ആ​ഴ​മി​ല്ലാ​ത്ത സ്ഥ​ല​ങ്ങ​ളി​ല്‍ ക​ട​ലി​ന്‍റെ അ​ടി​ത്ത​ട്ട്‌ കാ​ണാ​ന്‍ സ​ഹാ​യി​ക്കും. ബോ​ട്ടി​ന്‍റെ അ​ടി​ത്ത​ട്ടി​ല്‍ ഗ്ലാ​സ്‌ പ​തി​ച്ചി​രി​ക്കു​ക​യാ​ണ്. അ​തി​ലൂ​ടെ​യാ​ണ് ക​ട​ലി​ന്‍റെ അ​ടി​ത്ത​ട്ട്‌ കൂ​ടു​ത​ല്‍ സ​മീ​പ​സ്ഥ​മാ​യി വെ​ളി​പ്പെ​ടു​ന്ന​ത്.

ക​ട​ലി​ന്‍റെ സൗ​ന്ദ​ര്യം ഇ​തു​പോ​ലെ അ​ടു​ത്ത​റി​ഞ്ഞി​ട്ടു​ള്ള​ത് കു​റ​വാ​ണ്. ക​ട​ലാ​മ​ക​ളെ തേ​ടി പോ​ക​ലാ​ണ് സ​ഞ്ചാ​രി​ക​ള്‍ക്ക്‌ അ​ഗ​ത്തി ന​ല്‍കു​ന്ന മ​റ്റൊ​രാ​ക​ര്‍ഷ​ണം. പ​ഞ്ചാ​രമ​ണ​ല്‍ത്തീ​രം, സൂ​ര്യാ​സ്‌​ത​മ​യ​ങ്ങ​ള്‍, നി​റ​ഞ്ഞു​നി​ല്‍ക്കു​ന്ന പ്ര​കൃ​തിസൗ​ന്ദ​ര്യം –ല​ക്ഷ​ദ്വീ​പ്‌ ഏ​തൊ​രു സ​ഞ്ചാ​രി​ക്കും ഇ​പ്പ​റ​ഞ്ഞ കാ​ര്യ​ങ്ങ​ളെ​ല്ലാം ഉ​റ​പ്പി​ക്കു​ന്നു.

മ​ട​ങ്ങു​മ്പോ​ള്‍ പ​ക്ഷേ, എ​നി​ക്കൊ​പ്പം പോ​ന്ന​ത്, അ​ല്ലെ​ങ്കി​ല്‍ ഞാ​ന്‍ വ​ന്‍ക​ര​യി​ലേ​ക്ക്‌ കൊ​ണ്ടു​പോ​ന്ന​ത് ര​ണ്ടു കാ​ര്യ​ങ്ങ​ളാ​ണ്. ഒ​ന്ന്‌ ബീ​ക്കു​ഞ്ഞി​യു​ടെ ക​ഥ​ത​ന്നെ. മ​റ്റൊ​ന്ന്‌ ആ​യാ​പ്പ പാ​ടി​യ പാ​ട്ടി​ലെ വ​രി​ക​ള്‍.

‘‘മ​ക്കം അ​ടു​ത്ത മി​സ്‌​റാ​ണ​ാക്ക​ത്തീ

ആ​ദ്യം ക​ല​ങ്ങും ജ​സീ​റാ​ണാ​ക്ക​ത്തി.’’

ആ ​ജ​സീ​ര്‍, സൗ​ന്ദ​ര്യ​ത്തി​ന്റെ​യും ന​ല്ല മ​നു​ഷ്യ​രു​ടെ​യും നാ​ടു​മാ​ത്ര​മാ​യ ആ​ക്ക​ത്തി ഒ​രി​ക്ക​ലും ക​ല​ങ്ങാ​തി​രി​ക്ക​ട്ടെ.