തൃപ്രയാർ/പാലക്കാട്: പ്രമുഖ ഭാഷാധ്യാപകനും പൗരസ്ത്യ ഭാഷാധ്യാപക സംഘടന(പി.ബി.എസ്) സംസ്ഥാന സെക്രട്ടറിയും ആയിരുന്ന പ്രസാദ് തൃപ്രയാർ (82) പാലക്കാട് കൽവാകുളം ‘പ്രതിഭ’യിൽ നിര്യാതനായി. പ്രമുഖ സോഷ്യലിസ്റ്റും മദ്യവർജന സമിതി സംസ്ഥാന കമ്മിറ്റി അംഗവും ലോഹ്യ വിചാര വേദി പ്രവർത്തകനും പാലക്കാട് വി.വി.പി ഹൈസ്കൂളിലെ മുൻ ഭാഷാ അധ്യാപകനുമായ പ്രസാദ് തൃപ്രയാറിലെ കാരയിൽ കുടുംബാംഗമാണ്. തൃപ്രയാറിലെ പത്രപ്രവർത്തകനും പ്രമുഖ സോഷ്യലിസ്റ്റുമായിരുന്ന പരേതനായ കെ.ആർ. രവീന്ദ്രെൻറ സഹോദരനാണ്. റവന്യൂ ഇൻസ്പെക്ടറായി (പാലക്കാട്) വിരമിച്ച ശോഭയാണ് (ദിന വാർത്ത ഭാസ്കരെൻറ മകൾ) ഭാര്യ. മക്കൾ: സുജിത്ത് (ട്രിനിറ്റി ഫാർമസ്യൂട്ടിക്കൽസ് തൃശൂർ) സജിത്ത് (ന്യൂജേഴ്സി, യു.എസ്.എ). മരുമക്കൾ: പ്രിയ (പ്രധാനാധ്യാപിക, എസ്.ബി.ഒ.എ സ്കൂൾ ചിറ്റൂർ, എറണാകുളം), സിമി (ന്യൂജേഴ്സി യു.എസ്.എ). മറ്റ് സഹോദരങ്ങൾ: ശാരദ, രാജൻ, സോമൻ, പരേതരായ ഇന്ദിര, സുഗുണൻ, രഘുനാഥൻ. സംസ്കാരം വെള്ളിയാഴ്ച രാവിലെ എട്ടിന് പാലക്കാട് ചന്ദ്രനഗർ വൈദ്യുതി ശ്മശാനത്തിൽ.
