കൊടുങ്ങല്ലൂർ: വയോധികയായ മാതാവുമായി വീട് വിട്ട മകെൻറ മൃതദേഹം പുഴയിൽ കണ്ടെത്തി. പെരിഞ്ഞനം പൊന്മാനിക്കുടം വേളക്കാട്ട് വീട്ടിൽ പരേതനായ വേലായുധൻറ മകൻ രാധാകൃഷ്ണെൻറ (60) മൃതദേഹമാണ് വ്യാഴാഴ്ച രാവിലെ പുല്ലൂറ്റ് പുഴയിൽ ദർബാർ ഹാളിനു കിഴക്ക് കണ്ടത്. രാധാകൃഷ്ണനൊപ്പം ഉണ്ടായിരുന്ന മാതാവ് കാർത്യായനി (94) യെക്കുറിച്ച് വിവരമൊന്നും ലഭിച്ചിട്ടില്ല.
ഞായറാഴ്ചയാണ് ഇരുവരും വീട് വിട്ട് പോന്നത്. മാതാവും മകനും രാവിലെ പതിനൊന്നരയോടെ റോഡിലൂടെ നടന്ന് പോകുന്നത് പലരും കണ്ടിരുന്നു. രാധാകൃഷ്ണെൻറ ഭാര്യ സൂരജ മകളുടെ വീട്ടിൽ പോയ ദിവസമാണ് ഇവർ വീട്ടിൽ നിന്ന് ഇറങ്ങിയത്. ഇരുവരെയും കാണാതായതോടെ ബന്ധുക്കൾ കയ്പമംഗലം പൊലീസിൽ പരാതി നൽകിയിരുന്നു. ഭാര്യയും ബന്ധുക്കളും കൊടുങ്ങല്ലൂരിൽ എത്തിയാണ് കരക്കടിഞ്ഞ മൃതദേഹം തിരിച്ചറിഞ്ഞത്. ശ്രീനാരായണപുരത്തെ ബേക്കറിയിൽ ജോലി ചെയ്തിരുന്ന രാധാകൃഷ്ണന് ഇൗയിടെയായി ജോലി നഷ്ടപ്പെട്ടിരുന്നു. കൊടുങ്ങല്ലൂർ പൊലീസ് ഇൻക്വസ്റ്റ് നടപടികൾ പൂർത്തിയാക്കിയ മൃതദേഹം പോസ്റ്റ്മോർട്ടത്തിനായി തൃശൂരിലേക്ക് കൊണ്ടുപോയി.
