തൃശൂർ: കവിയും സാംസ്‌കാരിക പ്രവർത്തകനും ‘നുറുങ്ങ്‌’ മാസിക പത്രാധിപരുമായ കട്ടിലപൂവ്വം വടക്കിനിയത്ത്‌ മധു (മധു നുറുങ്ങ്‌-51) നിര്യാതനായി. സി.പി.എം വില്ലടം ബ്രാഞ്ച് അംഗം, കെ.എസ്‌.കെ.ടി.യു ഏരിയ കമ്മിറ്റിയംഗം, പുരോഗമന കലാസാഹിത്യ സംഘം വിൽവട്ടം മേഖല സെക്രട്ടറി എന്നീ നിലകളിലും പ്രവർത്തിച്ച്‌ വരുകയായിരുന്നു. സി.പി.എം വിൽവട്ടം ലോക്കൽ കമ്മിറ്റിയംഗവും ഡി.വൈ.എഫ്‌.ഐ തൃശൂർ ബ്ലോക്ക്‌ ജോയൻറ് സെക്രട്ടറിയുമായിരുന്നു. ഡി.വൈ.എഫ്‌.ഐ 1991ൽ സംഘടിപ്പിച്ച സംസ്ഥാന യൂത്ത്‌ മാർച്ചിൽ സ്ഥിരാംഗമായിരുന്നു.
ഒരാഴ്‌ച മുമ്പ് പക്ഷാഘാതത്തെ തുടർന്ന്‌ തൃശൂർ ഗവ. മെഡിക്കൽ കോളജിൽ ശസ്‌ത്രക്രിയക്ക്‌ ശേഷം വെൻറിലേറ്ററിലായിരുന്നു. ചൊവ്വാഴ്‌ച പുലർച്ച ഒന്നിനായിരുന്നു അന്ത്യം. കഴിഞ്ഞ ദിവസം നടത്തിയ പരിശോധനയിൽ കോവിഡ്‌ സ്ഥിരീകരിച്ചിരുന്നു. മാതാവ്: ഭാർഗവി.
ഭാര്യ: സുനിത (ജീവനക്കാരി, വിൽവട്ടം സർവിസ്‌ സഹകരണ ബാങ്ക്‌). മക്കൾ: ശ്രീജിത്ത്‌ (വില്ലടം ഗവ. ഹയർ സെക്കൻഡറി സ്‌കൂൾ പത്താം ക്ലാസ്‌ വിദ്യാർഥി), ശ്രീദേവ്‌ (വില്ലടം ഗവ. ഹയർ സെക്കൻഡറി സ്‌കൂൾ അഞ്ചാം ക്ലാസ്‌ വിദ്യാർഥി). സഹോദരർ: സത്യൻ, ശ്രീദേവി.
