വടക്കാഞ്ചേരി: സംസ്ഥാന പാതയോരത്ത് മിണാലൂരിൽ ആളൊഴിഞ്ഞ പറമ്പിലെ കിണറ്റിൽ ദുരൂഹ സാഹചര്യത്തിൽ അജ്ഞാത മൃതദേഹം കണ്ടെത്തി.ഷൊർണൂർ-കൊടുങ്ങല്ലൂർ സംസ്ഥാനപാതയിൽ മിണാലൂർ ബൈപാസിനടുത്ത് കൂർക്കഞ്ചേരി മാളിയേക്കൽ അരുണിെൻറ ഉടമസ്ഥതയിലുള്ള പറമ്പിലെ ഉപയോഗശൂന്യമായ കിണറ്റിലാണ് അഞ്ച് ദിവസത്തോളം പഴക്കമുള്ള മൃതദേഹം കണ്ടെത്തിയത്. പ്രദേശത്ത് പശുവിനെ തീറ്റിക്കാൻ പോയ മിണാലൂർ സ്വദേശി പാണ്ട്യാട്ട് വീട്ടിൽ ജയനാണ് ഉച്ചയോടെ സംഭവം ആദ്യം കണ്ടത്. നാട്ടുകാർ വിവരമറിയിച്ചതിനെത്തുടർന്ന് വടക്കാഞ്ചേരി സി.ഐ മാധവൻകുട്ടിയുടെ നേതൃത്വത്തിലുള്ള പൊലീസും അഗ്നിരക്ഷ സേനാംഗങ്ങളും സ്ഥലത്തെത്തി. മൃതദേഹം പുറത്തെടുത്ത് മെഡിക്കൽ കോളജ് ആശുപത്രിയിലേക്ക്മാറ്റി.നിലവിൽ പ്രദേശവാസികളെ ആരെയും കാണാതായ സംഭവങ്ങൾ റിപ്പോർട്ട് ചെയ്തിട്ടില്ലെന്നും മൃതദേഹം തിരിച്ചറിയാനായിട്ടില്ലെന്നും നാട്ടുകാർ പറയുന്നു. പൊലീസ് കേസെടുത്ത് അന്വേഷണമാരംഭിച്ചു.
