വടക്കാഞ്ചേരി: അത്താണിയിൽ ജീപ്പും ബൈക്കും കൂട്ടിയിടിച്ച് ബൈക്ക് യാത്രികനായ യുവാവ് മരിച്ചു. പഴയന്നൂർ കല്ലേപാടത്തെ തൃക്കൂർ കൊപ്പാട്ടിൽ ബിനീഷാണ് (37) മരിച്ചത്. ഷൊർണൂർ-കൊടുങ്ങല്ലൂർ സംസ്ഥാനപാതയിലെ മിണാലൂരിൽ ബുധനാഴ്ച വൈകീട്ട് അഞ്ചോടെയാണ് സംഭവം. തൃശൂർ ഭാഗത്തുനിന്ന് വന്ന ജീപ്പ് എതിരെ വന്ന ബൈക്കിൽ ഇടിക്കുകയായിരുന്നു. മെഡിക്കൽ കോളജ് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. വടക്കാഞ്ചേരി പൊലീസ് തുടർനടപടി സ്വീകരിച്ചു.
