എരുമപ്പെട്ടി: പുഴയിലൂടെ ഒഴുകിവരുന്ന തേങ്ങ ശേഖരിക്കുന്നതിനിടെ പാലത്തിൽനിന്ന് പുഴയിൽ വീണ് കാണാതായയാളുടെ മൃതദേഹം കണ്ടെത്തി. തയ്യൂർ ലോകരത്തികാവിന് പടിഞ്ഞാറ് താമസിക്കുന്ന നരിയംപുള്ളി വീട്ടിൽ മണിയുടെ (66) മൃതദേഹമാണ് വെള്ളിയാഴ്ച കണ്ടെത്തിയത്. പാലത്തി‍െൻറ 50 മീറ്റർ പടിഞ്ഞാറ് മാറി പുഴയിലെ കുറ്റിക്കാട്ടിൽ കുടുങ്ങിക്കിടക്കുന്ന വിധത്തിലായിരുന്നു മൃതദേഹം കിടന്നിരുന്നത്.
ബുധനാഴ്ച വൈകീട്ട് നാലരയോടെയാണ് ഇയാൾ പുഴയിൽ വീണത്. എരുമപ്പെട്ടി ആലിക്കൽ ചിറപ്പാലത്തി‍െൻറ കൈവരിയിൽനിന്ന് പുഴയിലൂടെ ഒഴുകിവരുന്ന തേങ്ങ വലത്തോട്ടി ഉപയോഗിച്ച് ശേഖരിക്കുന്നതിനിടെ അബദ്ധത്തിൽ പുഴയിലേക്ക് വീഴുകയായിരുന്നു. വാഴാനി ഡാം തുറന്നതിനാൽ പുഴയിൽ ശക്തമായ ഒഴുക്കുണ്ടായിരുന്നു. തുടർന്ന് വടക്കാഞ്ചേരിയിൽനിന്ന് എത്തിയ അഗ്നിരക്ഷ സേനയും എരുമപ്പെട്ടി പൊലീസും നാട്ടുകാരും തിരച്ചിൽ നടത്തിയെങ്കിലും ആളെ കണ്ടെത്താനായില്ല. രണ്ടു ദിവസമായി ദേശീയ ദുരന്ത പ്രതികരണ സേന നടത്തിയ തിരച്ചിലിനിടെയാണ് മൃതദേഹം കണ്ടെത്തിയത്.
എരുമപ്പെട്ടി പൊലീസ് മേൽനടപടി സ്വീകരിച്ചു. മൃതദേഹം പോസ്റ്റ്മോർട്ടത്തിനായി മുളംകുന്നത്തുകാവ് മെഡിക്കൽ കോളജ് ആശുപത്രി മോർച്ചറിയിലേക്ക് മാറ്റി. പ്ലാവില വെട്ടി വിൽപന നടത്തുന്ന തൊഴിൽ ചെയ്തിരുന്ന മണി പുഴയിലെ ജലനിരപ്പ് ഉയർന്നപ്പോൾ സഹായിക്കൊപ്പം പാലത്തിൽനിന്ന് പുഴയിലൂടെ ഒഴികിവരുന്ന തേങ്ങ ശേഖരിച്ചു കൊണ്ടിരിക്കെയാണ് അപകടം ഉണ്ടായത്. ഭാര്യ: ബിന്ദു. മക്കൾ: ഹരികൃഷ്ണൻ, അനന്തകൃഷ്ണൻ.
