കൊടുങ്ങല്ലൂർ: മുൻ മിസ് കേരളയും റണ്ണറപ്പും മരിച്ച കാറപകടത്തിൽ പരിക്കേറ്റ കൊടുങ്ങല്ലൂർ സ്വദേശിയും മരിച്ചു. ശ്രീനാരായണപുരം വെമ്പല്ലൂർ കട്ടൻബസാർ കറപ്പംവീട്ടിൽ പരേതരായ അഷ്റഫിെൻറയും ഷാഹിദയുടെയും മകൻ മുഹമ്മദ് ആഷിഖാണ് (25) മരിച്ചത്. എറണാകുളം പാലാരിവട്ടം ചക്കരപ്പറമ്പിന് സമീപം നവംബർ ഒന്നിനുണ്ടായ അപകടത്തിൽ തലക്കും നെഞ്ചിനും ഗുരുതരമായി പരിക്കേറ്റ് എറണാകുളം മെഡിക്കൽ സെൻറർ ആശുപത്രിയിലായിരുന്നു ആഷിഖ്. 2019ലെ മിസ് കേരളയും ആറ്റിങ്ങൽ സ്വദേശിനിയുമായ അൻസി കബീർ (25), ആവർഷത്തെ റണ്ണറപ്പും തൃശൂർ ആളൂർ സ്വദേശിനിയുമായ അഞ്ജന ഷാജൻ (24) എന്നിവർ അപകടസ്ഥലത്ത് മരണമടഞ്ഞിരുന്നു. ഇവർ സഞ്ചരിച്ച കാർ ബൈക്കിലിടിച്ച് നിയന്ത്രണംവിട്ട് മീഡിയനിലെ മരത്തിലിടിച്ച് മറിയുകയായിരുന്നു. കാറോടിച്ചിരുന്ന തൃശൂർ മാള സ്വദേശി അബ്ദുറഹ്മാൻ ചികിത്സയിലാണ്. സുഹൃത്തും സഹപാഠിയുമായ അബ്ദുറഹ്മാൻ വിളിച്ചതനുസരിച്ച് കാറിൽ കൂടെ പോയതായിരുന്നു ആഷിക്ക്. മുമ്പ് മസ്കത്തിലായിരുന്ന ആഷിക്ക് വീണ്ടും ഗൾഫിൽ പോകാനുള്ള തയാറെടുപ്പിലായിരുന്നു. സൗദിയിലുണ്ടായ വാഹനപകടത്തിലാണ് ആഷിക്കിെൻറ പിതാവ് അഷ്റഫ് മരിച്ചത്. അർബുദം ബാധിച്ചായിരുന്നു മാതാവ് ഷാഹിദയുടെ വേർപാട്. ഏക സഹോദരൻ അൻഷാദിെൻറ തണലിലായിരുന്നു ആഷിക്കിെൻറ ജീവിതം. മൃതദേഹം വെക്കോട് ജുമാമസ്ജിദ് ഖബർസ്ഥാനിൽ ഖബറടക്കി.
