മുളങ്കുന്നത്തുകാവ്: ഗവ. മെഡിക്കൽ കോളജ് കാൻസർ വാർഡിൽനിന്ന് കാണാതായ വയോധികെൻറ മൃതദേഹം വെള്ളച്ചാലിൽ കണ്ടെത്തി. മെഡിക്കൽ കോളജ് നെഞ്ചു രോഗാശുപത്രിയിലെ അർബുദ ചികിത്സ വിഭാഗത്തിലെ പതിനാലാം വാർഡിൽനിന്ന് ഈ മാസം ഒന്നാം തീയതി മുതൽ കാണാതായ പടിഞ്ഞാറേ ചാലക്കുടി മൂഞ്ഞേലി കുരിശിങ്കൽ വീട്ടിൽ സെബാസ്റ്റ്യെൻറ (56) മൃതദേഹമാണ് കാമ്പസിലെ വെള്ളച്ചാലിൽ കണ്ടെത്തിയത്‌. അർബുദ ബാധിതനായി ചികിത്സയിൽ കഴിയവേയാണ് സെബാസ്റ്റ്യനെ കാണാതായത്. പൊലീസും ബന്ധുക്കളും തിരച്ചിൽ നടത്തി വരുന്നതിനിടയിലാണ് മൃതദേഹം കണ്ടത്. മരംവെട്ട് തൊഴിലാളിയായിരുന്നു. മെഡിക്കൽ കോളജ് പൊലീസ് തുടർ നടപടികൾ സ്വീകരിച്ചു. ഭാര്യ: ശാന്ത. മക്കൾ: സെബിൻ, ഫെബിൻ, ഫെമിൻ.
