പൊള്ളാച്ചി: ദിണ്ടിഗലിൽ ബൈക്കും കാറും കൂട്ടിയിടിച്ച് ബൈക്ക് യാത്രികരായ രണ്ട് യുവാക്കൾ മരിച്ചു. മധുര പെരുങ്കുടി സ്വദേശികളായ അജിത് കണ്ണൻ (20), കാമരാജ് (20) എന്നിവരാണ് കഴിഞ്ഞ ദിവസമുണ്ടായ അപകടത്തിൽ മരിച്ചത്. അജിത് കണ്ണൻ 20 അടി ഉയരത്തിലേക്ക് തെറിച്ച് വൈദ്യുതി കമ്പിയിൽ തൂങ്ങിയ നിലയിൽ ഷോക്കേറ്റാണ് മരിച്ചത്. കാമരാജ് നിലത്തേക്ക് തെറിച്ചുവീണ് തലക്ക് ഗുരുതരമായി പരിക്കേറ്റ് മരിച്ചു. കൊടൈക്കനാലിലേക്ക് കൂട്ടുകാർക്കൊപ്പം വിനോദസഞ്ചാരത്തിന് പോയി തിരിച്ചു വരുന്ന വഴിയാണ് ദിണ്ടിഗൽ നിലക്കോട്ടക്കടുത്ത സിൽക്കുവാർ പട്ടിയിൽ കാറും ബൈക്കും നേർക്കുനേർ ഇടിച്ചത്. ബൈക്ക് അമിത വേഗതയിലായിരുന്നുവെന്ന് പൊലീസ് പറഞ്ഞു. അജിത് കണ്ണനെ വൈദ്യുതി കമ്പിയിൽനിന്നാണ് ഇറക്കിയത്.
