ഇരിങ്ങാലക്കുട: മുരിയാട് ഗ്രാമപഞ്ചായത്ത് വൈസ് പ്രസിഡൻറും 13ാം വാര്‍ഡ് മെംബറുമായ തുറവന്‍കാട് കൊച്ചുകുളം വീട്ടില്‍ ഷീല ജയരാജ് (50) വാഹനാപകടത്തില്‍ മരിച്ചു. ബുധനാഴ്ച രാവിലെ 11ഓടെ ഇവർ സഞ്ചരിച്ച സ്‌കൂട്ടറും ബസും കൂട്ടിയിടിച്ചായിരുന്നു അപകടം. മുരിയാട് ഗ്രാമപഞ്ചായത്ത് ക്ഷേമകാര്യ സ്റ്റാൻഡിങ് കമ്മിറ്റി ചെയര്‍പേഴ്‌സൻ രതി ഗോപിയുടെ സ്കൂട്ടറിെൻറ പിറകിലിരുന്ന് ആനന്ദപുരത്തെ ആയുര്‍വേദ ആശുപത്രിയിലേക്ക് പോകുംവഴി എതിരെ വന്ന ഷാരോണ്‍ എന്ന സ്വകാര്യ ബസുമായി കൂട്ടിയിടിച്ചാണ് അപകടമുണ്ടായത്. ഷീല ജയരാജ് റോഡിലേക്ക് വീഴുകയും തല്‍ക്ഷണം ബസ് ശരീരത്തിലൂടെ കയറിയിറങ്ങുകയുമായിരുന്നു. ഉടന്‍ ഇരിങ്ങാലക്കുട ജനറല്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. പരിക്കേറ്റ രതി ഗോപിയെ അപ്പോളോ ആശുപത്രിയില്‍ പ്രവേശിപ്പിച്ചു. സി.പി.ഐ പ്രതിനിധിയായി മത്സരിച്ച് വിജയിച്ച ഷീല പുല്ലൂര്‍ സര്‍വിസ് സഹകരണ ബാങ്ക് ഭരണസമിതി അംഗം, സി.പി.ഐ മുരിയാട് ലോക്കൽ കമ്മിറ്റി അസി. സെക്രട്ടറി, ഇരിങ്ങാലക്കുട ടൗൺ ലൈേബ്രറിയൻ, കേരള മഹിള സംഘം മണ്ഡലം കമ്മിറ്റി അംഗം, തുറവൻകാട് നവകേരള വായനശാല ഭരണസമിതി അംഗം എന്നീ നിലകളിൽ പ്രവർത്തിച്ചിരുന്നു. സംസ്‌കാരം വ്യാഴാഴ്ച. ഭര്‍ത്താവ്: ജയരാജ്. മക്കള്‍: ജയേഷ്, രാജേഷ്. മരുമകള്‍: റോസ്‌.
