മേത്തല: ബൈക്കിൽ കാറിടിച്ച് സി.പി.എം കോട്ടപ്പുറം ബ്രാഞ്ച് സെക്രട്ടറി മരിച്ചു. ഒരു കുട്ടി ഉൾപ്പെടെ രണ്ടുപേർക്ക് പരിക്കേറ്റു. കുര്യാപ്പിള്ളി ബഷീറി‍െൻറ മകൻ മുജീബാണ് (41) ആണ് മരിച്ചത്. ബൈക്ക് ഓടിച്ചിരുന്ന കോട്ടപ്പുറം പുഞ്ചപറമ്പിൽ അബുവി‍െൻറ മകൻ ഷെബീർ (40), ബൈക്കിന് മുന്നിൽ ഇരുന്ന ഇയാളുടെ മകൻ മുഹമ്മദ് ഫയാസ് (നാല്) എന്നിവർക്കാണ് പരിക്കേറ്റത്. ഇവരെ എറണാകുളം ആസ്റ്റർ മെഡ്സിറ്റിയിലേക്ക് കൊണ്ടുപോയി.
ചൊവ്വാഴ്ച രാവിലെ ദേശീയപാത 66ലുള്ള കോട്ടപ്പുറം പാലത്തിലെ വലിയ പണിക്കൻ തുരുത്തിലായിരുന്നു അപകടം. തുരുത്തിലെ ഇടറോഡിൽനിന്ന് ദേശീയപാതയിലേക്ക് കടക്കുന്നതിനിടെ ഇന്നോവ കാറ് വന്നിടിച്ചാണ് അപകടം. ബൈക്കി‍െൻറ പിറകിൽ ഇരിക്കുകയായിരുന്ന മുജീബ് തൽക്ഷണം മരിച്ചു.
മുജീബും ഷെബീറും സുഹൃത്തുക്കളും കോട്ടപ്പുറം മാർക്കറ്റിലെ ചുമട്ടുതൊഴിലാളികളുമാണ്. മൃതദേഹം പോസ്റ്റ്മോർട്ടത്തിന് ശേഷം കോട്ടപ്പുറം മാർക്കറ്റിൽ പൊതുദർശനത്തിന് വെച്ചു. വൈകീട്ടോടെ കൊടുങ്ങല്ലൂർ ചേരമാൻ ജുമാമസ്ജിദ് ഖബർസ്ഥാനിൽ ഖബറടക്കി. ഭാര്യ: ഷെജീന. മക്കൾ: മുഫീന, മുബീന, മുനർവ്വഷ.
